પ્રેમ અને આદર એ કમાવા પડે છે, માંગી શકાતા નથી; પૂજ્ય ભાઈશ્રી પાસેથી જાણો જીવનની સફળતાનું સૂત્ર

Pujya Bhaishri Rameshbhai Oza inspirational quotes: ન્યૂઝીલેન્ડના ઓકલેન્ડમાં શ્રી રાધા કૃષ્ણ મંદિરના 25 માં પાટોત્સવ નિમિત્તે આયોજિત શ્રીમદ્ ભાગવત સપ્તાહના છઠ્ઠા દિવસે શ્રદ્ધાળુઓ માટે જ્ઞાન અને ભક્તિની સરવાણી વહી હતી. પૂજ્ય ભાઈશ્રી રમેશભાઈ ઓઝાએ વ્યાસપીઠ પરથી જીવનને ઉન્નત બનાવતી અનેક પ્રેરણાત્મક વાતો રજૂ કરી હતી. તેમણે સમજાવ્યું હતું કે કથા માત્ર સાંભળવા માટે નથી, પરંતુ તે ચરિત્રના નિર્માણ અને ચિત્તની શુદ્ધિ માટે છે, જે મનુષ્યને તેના મૂળ સનાતન ધર્મ સાથે જોડે છે.

બુદ્ધિ અને ભાવનાનો સમન્વય: જીવનની સફળતાનું સૂત્ર

પૂજ્ય ભાઈશ્રીએ મનુષ્યના વ્યવહારિક અને આધ્યાત્મિક જીવન વચ્ચે સંતુલન જાળવવા માટે એક અત્યંત મહત્વનું સૂત્ર આપ્યું હતું. તેમણે જણાવ્યું હતું કે જ્યારે વ્યવહારિક કે કૌટુંબિક જીવનની વાત હોય, ત્યારે બુદ્ધિને આગળ રાખીને વિચારીને નિર્ણય લેવા જોઈએ, જેથી લાગણીઓમાં વહી જઈને કોઈ ખોટો નિર્ણય ન લેવાય. પરંતુ, જ્યારે વાત પરમાર્થ કે આધ્યાત્મિકતાની હોય, ત્યારે તર્કને બાજુ પર મૂકીને હૃદય અને ભાવનાઓને અનુસરવું જોઈએ, કારણ કે ભગવાન ભાવનાથી જ વશ થાય છે. જે મતિ કે બુદ્ધિ હૃદયના ભાવોનું અનુસરણ કરે તેને જ સાચી 'મનીષા' કહેવામાં આવે છે.

પ્રેમ અને આદર: કમાવા પડે છે, માંગી શકાતા નથી

સંબંધોમાં આવતી કડવાશ અને અપેક્ષાઓ પર માર્ગદર્શન આપતા ભાઈશ્રીએ જણાવ્યું કે, "Love is not demanded, Love is commanded". પ્રેમ કે આદર ભીખમાં મળતા નથી. તમારો વ્યવહાર અને તમારું આચરણ એટલું પવિત્ર અને પ્રભાવશાળી હોવું જોઈએ કે સામેની વ્યક્તિ આપોઆપ તમારા પ્રત્યે આદર અને પ્રેમ અનુભવે. તેમણે રામાયણનું ઉદાહરણ આપતા કહ્યું કે સીતાજીએ રામચંદ્રજી સાથે વનમાં જવાનો નિર્ણય કોઈ દબાણને કારણે નહીં, પરંતુ અતૂટ પ્રેમ અને સમર્પણને કારણે લીધો હતો. સાચો પ્રેમ શરત વગરનો અને સંપૂર્ણ સમર્પણ વાળો હોય છે.

નકારાત્મકતાને હરાવવાની કળા

જીવનમાં આવતી સમસ્યાઓ પ્રત્યેના અભિગમ વિશે ભાઈશ્રીએ પ્રેરક વાત કહી હતી. તેમણે શ્રોતાઓને શિખામણ આપી કે ક્યારેય ભગવાન પાસે જઈને એવી ફરિયાદ ન કરો કે "મારી પાસે બહુ મોટી સમસ્યા છે", પરંતુ સમસ્યાની સામે જોઈને હિંમતથી કહો કે "મારી પાસે બહુ મોટા ભગવાન છે". મનુષ્ય એ બીજું કંઈ નહીં પણ તેના વિચારોનો જ પુંજ છે, માટે આપણી દ્રષ્ટિ હકારાત્મક હોવી જોઈએ. જેવી રીતે અડધો ભરેલો ગ્લાસ કોઈને અડધો ખાલી લાગે છે તો કોઈને અડધો ભરેલો, તેમ જીવનની પરિસ્થિતિઓને જોવાની આપણી દ્રષ્ટિ જ આપણું સુખ-દુઃખ નક્કી કરે છે.

પુસ્તકો: ક્યારેય દગો ન દેનારા સાચા મિત્રો

વર્તમાન સમયમાં જ્યારે લોકો એકલતા અનુભવે છે, ત્યારે ભાઈશ્રીએ પુસ્તકોને મનુષ્યના શ્રેષ્ઠ મિત્ર ગણાવ્યા હતા. તેમણે કહ્યું કે સારી પુસ્તકો ક્યારેય માણસને દગો નથી દેતી અને તે ક્યારેય ખોટી સલાહ પણ આપતી નથી. ભાગવત, રામાયણ કે ગીતા જેવા ગ્રંથોનું વાંચન અને સ્વાધ્યાય કરવાથી મનુષ્યનું વૈચારિક સ્તર ઊંચું આવે છે. ભાઈશ્રીએ શ્રોતાઓને નિયમિતપણે થોડું સાહિત્ય વાંચવા અને જીવનને ઉત્સવમય બનાવવા માટે અનુરોધ કર્યો હતો, કારણ કે આનંદમાં જીવનારો વ્યક્તિ સંસારના કોઈ પણ ભયથી ડરતો નથી.