Dussehra 2025 Gujarati Calendar | દશેરા 2025 તારીખ, શુભ મુહૂર્ત, પૂજા વિધિ અને મહત્વ: દશેરા, જેને વિજયાદશમી તરીકે પણ ઓળખવામાં આવે છે, તે હિન્દુ ધર્મનો એક અત્યંત મહત્વપૂર્ણ તહેવાર છે. તે અસત્ય પર સત્ય અને અધર્મ પર ધર્મના વિજયનું પ્રતીક છે. દર વર્ષે આસો મહિનાના શુક્લ પક્ષની દસમી તિથિએ આ તહેવાર ઉજવવામાં આવે છે. આ દિવસે ભગવાન શ્રી રામે રાવણનો વધ કરીને માતા સીતાને મુક્ત કરાવ્યા હતા, જ્યારે માતા દુર્ગાએ મહિષાસુરનો સંહાર કર્યો હતો. વર્ષ 2025માં દશેરાની તારીખને લઈને લોકોમાં મૂંઝવણમાં છે. આ આર્ટિકલમાં જાણો દશેરાની સાચી તારીખ અને પૂજાનો શુભ મુહૂર્ત.
દશેરા 2025: સાચી તારીખ અને શુભ મુહૂર્ત (Dussehra 2025 Shubh Muhurat)
આ પણ વાંચો
હિંદુ ધર્મમાં દશેરાનો પર્વ દર વર્ષે આસો માસના શુક્લ પક્ષની દશમી તિથિએ ઉજવવામાં આવે છે. આ વર્ષે, દશમી તિથિનો પ્રારંભ 1 ઓક્ટોબર બપોરે 12:12 વાગ્યે થશે અને તેનું સમાપન 2 ઓક્ટોબર બપોરે 1:13 વાગ્યે થશે. ઉદયાતિથિને આધારે, આ વર્ષે દશેરાનો તહેવાર 2 ઓક્ટોબર, 2025 ના રોજ ઉજવાશે.
દશેરાની પૂજા માટેનો શુભ સમય (વિજય મુહૂર્ત)
દશેરાના દિવસે કરવામાં આવતી પૂજા માટે ખાસ વિજય મુહૂર્ત અત્યંત શુભ માનવામાં આવે છે. આ વર્ષે વિજય મુહૂર્ત બપોરે 1:57 થી 2:44 સુધી રહેશે, જેનો કુલ સમયગાળો 47 મિનિટનો રહેશે.
રાવણ દહન 2025 શુભ મુહૂર્ત (Ravan Dahana 2025 Shubh Muhurt)
હિન્દુ કેલેન્ડર મુજબ, વિજયાદશમીના દિવસે પ્રદોષ કાળ દરમિયાન રાવણ દહન કરવામાં આવે છે. પ્રદોષ કાળ સૂર્યાસ્ત પછી શરૂ થાય છે. આ દશેરામાં, સૂર્યાસ્ત સાંજે 06:05 વાગ્યે થશે. સૂર્યાસ્ત પછી રાવણ દહન કરવામાં આવશે.
દશેરાનું મહત્વ (Dussehra Significance)
- આ તહેવાર અનિષ્ટ પર સારાનો વિજય દર્શાવે છે. આ દિવસે ભગવાન શ્રી રામે રાવણનો વધ કરીને ધર્મનું રક્ષણ કર્યું હતું. આ દિવસે નવરાત્રી પછી દેવી દુર્ગાએ મહિષાસુરનો વધ કર્યો હતો.
- વિજયાદશમીના દિવસે શસ્ત્રો અને સાધનોની પૂજા કરવાની પરંપરા છે. એવું માનવામાં આવે છે કે તેનાથી વિજય અને સફળતા પ્રાપ્ત થાય છે.
- દશેરાનો દિવસ કોઈપણ નવા કાર્ય કે પ્રોજેક્ટ શરૂ કરવા માટે અત્યંત શુભ માનવામાં આવે છે. આ દિવસે નવા કામ શરૂ કરવાથી સફળતા મળવાની શક્યતા વધી જાય છે.
- દશેરાના પાવન પર્વ નિમિત્તે, દેશભરમાં રાવણ, મેઘનાથ અને કુંભકર્ણના પુતળા બનાવીને તેનું દહન કરવામાં આવે છે, જે અનિષ્ટ પર શુભના વિજયની ઉજવણીનું પ્રતીક છે.
આખો દિવસ રહેશે રવિ યોગ
આ વર્ષે દશેરા 2025 અત્યંત શુભ માનવામાં આવી રહ્યું છે, કારણ કે સમગ્ર દિવસે રવિ યોગ પ્રબળ રહેશે. આ યોગમાં સૂર્યદેવની સકારાત્મક ઉર્જા જીવનમાંથી દુઃખો અને દોષોને દૂર કરીને સફળતાનો માર્ગ ખોલે છે. સાથે જ, સુકર્મ યોગ સવારથી રાત્રે 11:29 વાગ્યા સુધી રહેશે અને ત્યારબાદ ધૃતિ યોગ શરૂ થશે. બંને યોગોને પૂજા અને શુભ કાર્યો માટે અત્યંત ફળદાયી માનવામાં આવે છે. નક્ષત્રોની વાત કરીએ તો, સવાર સુધી ઉત્તરાષાઢા નક્ષત્ર પ્રબળ રહેશે અને ત્યારબાદ આખી રાત શ્રવણ નક્ષત્રનો પ્રભાવ રહેશે. આ શુભ યોગો અને નક્ષત્રો દરમિયાન પૂજા-અર્ચના તથા નવા કાર્યોની શરૂઆત કરવી વિશેષ મંગલકારી માનવામાં આવે છે.