Allahabad High Court: અલ્હાબાદ હાઈકોર્ટની લખનૌ બેન્ચે એક ઐતિહાસિક ચુકાદો આપતા સ્પષ્ટ કર્યું છે કે પતિ દ્વારા લેવામાં આવેલી પર્સનલ લોનની ચુકવણી માટે તેની પત્ની કે વિધવાને ક્યારેય જવાબદાર ઠેરવી શકાય નહીં. આ કેસમાં કોર્ટે સ્ટેટ બેંક ઓફ ઈન્ડિયા (SBI) ની આકરી ઝાટકણી કાઢી છે. બેંકના આચરણને નિયમોનું સીધું ઉલ્લંઘન ગણાવીને કોર્ટે આદેશ આપ્યો છે કે મહિલાની ફિક્સ્ડ ડિપોઝિટ (FD) તોડીને તેમાંથી કાપવામાં આવેલી 19.90 લાખ રૂપિયાની સંપૂર્ણ રકમ બેંકે વ્યાજ સાથે પરત કરવી પડશે.
શું કેસ છે?
નેહા મિશ્રાના પતિ, જે લખનૌના રહેવાસી છે અને રિંગ રોડ પરની મેડિસિન હોસ્પિટલમાં આસિસ્ટન્ટ પ્રોફેસર તરીકે ફરજ બજાવતા હતા. તેમણે નવેમ્બર 2020 માં SBI પાસેથી ₹15 લાખની વ્યક્તિગત લોન લીધી હતી. મે 2021 માં તેમનું COVID-19 થી અવસાન થયું હતું.
પતિના મૃત્યુ પછી, બેંકે તેની પત્ની નેહા મિશ્રાને બાકી લોન વસૂલવા માટે કાનૂની નોટિસ મોકલી અને તેનું પગાર ખાતું ફ્રીઝ કરી દીધું (જે પાછળથી RBI લોકપાલના હસ્તક્ષેપ બાદ પુનઃસ્થાપિત કરવામાં આવ્યું હતું). આ પછી, બેંકે મહિલાની ફિક્સ ડિપોઝિટ તોડી નાખી અને તેમાંથી ₹19.90 લાખ કાપી લીધા.
કોર્ટે ભારે નારાજગી વ્યક્ત કરી
આ મામલાની સુનાવણી કરતા, ન્યાયાધીશ શેખર બી. સરાફ અને ન્યાયાધીશ અવધેશ કુમાર ચૌધરીની બનેલી ડિવિઝન બેન્ચે SBIના પગલાને બેંકિંગ પ્રક્રિયાઓનું 'સ્પષ્ટ ઉલ્લંઘન' ગણાવ્યું.