Weather News: પંજાબ અને હરિયાણા સહિત ઉત્તર ભારતના અનેક રાજ્યો ભારે વરસાદ અને પૂરની ઝપેટમાં છે. પંજાબમાં સૌથી વધુ નુકસાન થયું છે, જ્યાં લગભગ 2000 ગામ પાણીમાં ડૂબી ગયા છે. પંજાબમાં ભયાવહ પૂરની સ્થિતિ સર્જાઈ છે. વડાપ્રધાન નરેન્દ્ર મોદી ટૂંક સમયમાં પૂર પ્રભાવિત રાજ્યોની મુલાકાત લઈને સ્થિતિની સમીક્ષા કરશે.
પીએમ મોદી પૂરગ્રસ્ત રાજ્યોની મુલાકાત લેશે
શુક્રવારે સત્તાવાર સૂત્રોએ જણાવ્યું હતું કે વડા પ્રધાન નરેન્દ્ર મોદી ટૂંક સમયમાં પૂરગ્રસ્ત રાજ્યોની મુલાકાત લેશે અને પરિસ્થિતિનો તાગ મેળવશે. ભારે વરસાદે ઉત્તર ભારતના રાજ્યોને ભારે નુકસાન પહોંચાડ્યું છે, જેના કારણે રસ્તાઓ અને સંપત્તિનો નાશ થયો છે અને ઘણા લોકો માર્યા ગયા છે. હિમાચલ પ્રદેશ, ઉત્તરાખંડ અને પંજાબ જેવા રાજ્યોના કેટલાક ભાગો સૌથી વધુ અસરગ્રસ્ત વિસ્તારોમાં સામેલ છે.
ભાખરા બ્યાસ મેનેજમેન્ટ બોર્ડ (BBMB) ના અધ્યક્ષ મનોજ ત્રિપાઠીએ જણાવ્યું હતું કે ડેમમાં મર્યાદિત જળસંગ્રહ ક્ષમતા હોય છે અને તેનાથી વધુ પાણી આવે તો તેને નીચેના પ્રવાહમાં છોડવું પડે છે. તેમણે ઉમેર્યું કે આ વર્ષે પોંગ ડેમમાં 11.7 બિલિયન ક્યુબિક મીટર (BCM) પાણી આવ્યું, જે 1988ના 7.9 BCM કરતાં ઘણું વધારે છે. તેમણે ચેતવણી આપી કે જો આ ડેમ ન હોત તો પંજાબમાં જૂન મહિનાથી જ પૂર આવી ગયું હોત.
વુલર તળાવનું જળસ્તર વધ્યું
જમ્મુ-કાશ્મીરમાં વુલર તળાવનું જળસ્તર સતત વધી રહ્યું છે, જેના કારણે નીચલા ગામોમાં પૂરની આશંકા છે. રાજસ્થાનના દૌસામાં મોરલ ડેમ ભરાઈ ગયો, જ્યારે અજમેરમાં બોરાજ તળાવની દીવાલ તૂટવાથી લગભગ એક હજાર ઘરોમાં પાણી ભરાયું. અરુણાચલ પ્રદેશમાં ગ્લેશિયર પીગળવાથી તળાવ ફાટવાની આશંકા વૈજ્ઞાનિકોએ વ્યક્ત કરી છે. પાંચ દિવસ પછી ચારધામ યાત્રા ફરી શરૂ કરાઈ છે, જોકે કેટલાક હાઈવે અવરોધિત હોવાથી ગંગોત્રી અને યમુનોત્રી ધામની યાત્રા હજુ શક્ય નથી.
હિમાચલમાં ભૂસ્ખલનથી રસ્તાઓ બંધ
હવામાન વિભાગે આગામી ત્રણ-ચાર દિવસ સુધી ભારે વરસાદની સંભાવના નકારી કાઢી છે, જેનાથી ઉત્તરાખંડ, જમ્મુ-કાશ્મીર અને હિમાચલ પ્રદેશમાં રાહત કાર્યમાં ગતિ આવી છે. જોકે, હિમાચલમાં ભૂસ્ખલન અને રસ્તાઓ બંધ હોવાથી મુશ્કેલીઓ યથાવત છે. ચાર રાષ્ટ્રીય ધોરીમાર્ગ અને 1087 રસ્તાઓ હજુ પણ બંધ છે. કુલ્લુમાં કાટમાળ નીચેથી ત્રણ મૃતદેહો મળી આવ્યા, જ્યારે કિન્નૌરમાં કૃત્રિમ તળાવ બન્યું છે. હરિયાણામાં પૂરના જોખમને પહોંચી વળવા સેનાની મદદ લેવાઈ છે.