Twisha Sharma Death Case: નોઈડાથી લગ્ન કરીને ભોપાલ આવેલી 31 વર્ષીય જાણીતી મોડલ અને અભિનેત્રી ટ્વિશા શર્માના શંકાસ્પદ મૃત્યુનો મામલો હવે દેશભરમાં ચર્ચાનો વિષય બન્યો છે. સતત વળાંકો લઈ રહેલા આ હાઈ-પ્રોફાઈલ કેસમાં રવિવારે હાઈકોર્ટના આદેશ બાદ ભોપાલ એઈમ્સ (AIIMS) ખાતે ચુસ્ત પોલીસ બંદોબસ્ત વચ્ચે ટ્વિશાના મૃતદેહનું ફરીથી પોસ્ટમોર્ટમ કરવામાં આવ્યું હતું. આ પ્રક્રિયા પાછળનો મુખ્ય હેતુ અભિનેત્રીના મોત પાછળ છુપાયેલા અસલી કારણો અને સત્યને બહાર લાવવાનો છે.
દિલ્હી એઈમ્સની ટીમે કર્યું ત્રણ કલાક સુધી રિ-પોસ્ટમોર્ટમ
કોર્ટના કડક વલણ બાદ દિલ્હી એઈમ્સના ખાસ નિષ્ણાતોની ટીમ ભોપાલ પહોંચી હતી. સ્થાનિક તબીબો અને દિલ્હીની ટીમે સંયુક્ત રીતે આશરે ત્રણ કલાક સુધી પુનઃ પોસ્ટમોર્ટમની જટિલ પ્રક્રિયા પૂર્ણ કરી હતી. આ તપાસ પ્રક્રિયા પૂરી થયા બાદ એઈમ્સની ટીમ દિલ્હી પરત રવાના થઈ ગઈ હતી અને મૃતદેહ પરિવારજનોને સોંપવામાં આવ્યો હતો.
લાલ જોડામાં આખરી વિદાય: ભાઈએ ભીની આંખે આપી મુખાગ્નિ
પોસ્ટમોર્ટમ બાદ જ્યારે ટ્વિશાનો પાર્થિવ દેહ બહાર આવ્યો ત્યારે ત્યાં ઉપસ્થિત તમામ લોકોની આંખો ભીની થઈ ગઈ હતી. ટ્વિશાને નવવધૂની જેમ લાલ જોડામાં સજાવીને અર્થી પર સુવડાવવામાં આવી હતી. સાંજે આશરે સવા પાંચ વાગ્યે ભોપાલના ભદભદા વિશ્રામ ઘાટ પર સગા-સંબંધીઓ અને મીડિયાકર્મીઓની ભારે હાજરી વચ્ચે તેના અંતિમ સંસ્કાર કરવામાં આવ્યા હતા. દેશની રક્ષા કાજે તૈનાત ટ્વિશાના સગા ભાઈ મેજર હર્ષિત શર્માએ બહેનની ચિતાને મુખાગ્નિ આપી ત્યારે વાતાવરણ અત્યંત ગમગીન બની ગયું હતું. આ અંતિમ યાત્રામાં આર્મીના અનેક પૂર્વ સૈનિકો પણ પરિવારને સાંત્વના આપવા પહોંચ્યા હતા.
સુપ્રીમ કોર્ટે લીધું ‘સ્વતઃ સંજ્ઞાન’, સોમવારે ખાસ સુનાવણી
બીજી તરફ, આ મામલાની ગંભીરતાને જોતા દેશની સર્વોચ્ચ અદાલતે (Supreme Court) આ કેસમાં આપમેળે સંજ્ઞાન લીધું છે. ચીફ જસ્ટિસ સૂર્યકાંત, જસ્ટિસ જોયમાલ્ય બાગચી અને જસ્ટિસ વિપુલ એમ. પંચોલીની વિશેષ બેંચ સોમવારે (25 મે) આ કેસ પર સુનાવણી હાથ ધરશે. સુપ્રીમ કોર્ટે આ ઘટનાને સસરા પક્ષમાં યુવતીના અપરાધિક મૃત્યુ સાથે જોડાયેલા કથિત સંસ્થાગત પૂર્વગ્રહ અને પ્રક્રિયાગત અનિયમિતતાઓ તરીકે નોંધ્યો છે, જે સ્થાનિક પોલીસ અને વહીવટીતંત્રની પ્રાથમિક કામગીરી પર મોટા સવાલો ઉભા કરે છે.
પતિ જેલના સળિયા પાછળ, સાસુ હજુ પણ ફરાર
ઉલ્લેખનીય છે કે, ગત ડિસેમ્બર મહિનામાં જ ટ્વિશાના લગ્ન થયા હતા. લગ્નના ગણતરીના મહિનાઓમાં જ એટલે કે 12 મેના રોજ ભોપાલના કટારા હિલ્સ સ્થિત સસરાના ઘરમાંથી ટ્વિશાનો મૃતદેહ ફાંસો ખાધેલી હાલતમાં મળી આવ્યો હતો. ટ્વિશાના પરિવારે દહેજ ઉત્પીડન અને પ્રતાડનાનો ગંભીર આક્ષેપ લગાવતા પતિ સમર્થ સિંહ અને સાસુ ગિરિબાલા સિંહ વિરુદ્ધ કેસ દાખલ કરાવ્યો હતો.
ઘટના બાદ આશરે 10 દિવસ સુધી ફરાર રહ્યા બાદ આરોપી પતિ સમર્થ સિંહે શુક્રવારે જબલપુર કોર્ટમાં સરેન્ડર કર્યું હતું, જ્યાંથી પોલીસ તેને ભોપાલ લાવી હતી અને કોર્ટે તેને 7 દિવસના રિમાન્ડ પર મોકલી આપ્યો છે. જોકે, વારંવાર નોટિસ આપવા છતાં સાસુ ગિરિબાલા સિંહ હજુ સુધી પોલીસ સમક્ષ હાજર થયા નથી.
CBI તપાસની માંગ તેજ
બહેનને ગુમાવનાર મેજર હર્ષિત શર્માએ આ સમગ્ર મામલાની નિષ્પક્ષ અને ઝડપી તપાસ માટે CBI (સેન્ટ્રલ બ્યુરો ઓફ ઇન્વેસ્ટિગેશન) તપાસ શરૂ કરવાની માંગ ફરી દોહરાવી છે. જોકે, રાજ્ય સરકાર આ પૂર્વે જ સીબીઆઈ તપાસની ભલામણ કરી ચૂકી છે. હાલમાં, સમગ્ર દેશની નજર એઈમ્સના બીજા પોસ્ટમોર્ટમ રિપોર્ટ અને સુપ્રીમ કોર્ટમાં થનારી સુનાવણી પર ટકેલી છે.