Tvisha Sharma Case: નોઈડાની વતની અને લગ્નના માત્ર પાંચ મહિનામાં જ ભોપાલના કટારા હિલ્સ સ્થિત સાસરીમાં રહસ્યમય સંજોગોમાં મૃત મળી આવેલી ટ્વિશા શર્માના કેસમાં એક નવો વળાંક આવ્યો છે. ભોપાલની સ્થાનિક અદાલતે ટ્વિશાના પરિવારજનો દ્વારા દિલ્હી AIIMSમાં ફરીથી પોસ્ટમોર્ટમ કરાવવાની અરજીને ફગાવી દીધી છે. જોકે, બીજી તરફ આ મામલાની ગંભીરતાને જોતા મધ્યપ્રદેશના મુખ્યમંત્રી ડો. મોહન યાદવે આ હાઈ-પ્રોફાઈલ કેસની CBI તપાસ માટે કેન્દ્ર સરકારને પત્ર લખવાની મંજૂરી આપી દીધી છે.
કોર્ટે પુનઃ પોસ્ટમોર્ટમની અરજી કેમ ફગાવી?
ભોપાલ સ્થિત જ્યુડિશિયલ મેજિસ્ટ્રેટ અનુદિતા ગુપ્તાની કોર્ટે આ મામલે ચુકાદો આપતા જણાવ્યું હતું કે, ટ્વિશાનું પ્રાથમિક પોસ્ટમોર્ટમ ભોપાલની AIIMS જેવી પ્રતિષ્ઠિત તબીબી સંસ્થામાં કરવામાં આવ્યું હતું. અત્યાર સુધી પોલીસ પ્રશાસન દ્વારા આ રિપોર્ટ પર કોઈ વાંધો ઉઠાવવામાં આવ્યો નથી.
કોર્ટે કાયદાકીય મર્યાદાઓનો ઉલ્લેખ કરતા સ્પષ્ટ કર્યું કે, ભારતીય ન્યાય સંહિતા (BNS) 2023ની કલમ 197 હેઠળ સ્થાનિક અદાલતના અધિકારક્ષેત્રની અમુક મર્યાદાઓ હોય છે. આથી ભોપાલ કોર્ટ દિલ્હી સ્થિત AIIMSમાં ફરીથી પોસ્ટમોર્ટમ કરાવવાનો આદેશ આપી શકે નહીં.
પીડિત પરિવારે મુખ્યમંત્રી ડો. મોહન યાદવ સાથે મુલાકાત કરી
અદાલતના ચુકાદા પહેલા જ ટ્વિશાના ન્યાય માટે લડી રહેલા તેના પરિવારના સભ્યો મંત્રાલય ખાતે મધ્યપ્રદેશના મુખ્યમંત્રી ડો. મોહન યાદવને મળ્યા હતા. પરિવારે મુખ્યમંત્રી સમક્ષ મુખ્ય 5 માંગણીઓ રજૂ કરી હતી-
- સમગ્ર મામલાની સેન્ટ્રલ બ્યુરો ઓફ ઈન્વેસ્ટિગેશન (CBI) દ્વારા તપાસ થાય.
- નિવૃત્ત જજ અને ટ્વિશાની સાસુ ગિરિબાલા સિંહની જામીન અરજી ફગાવવામાં આવે.
- ફરાર પતિ સમર્થ સિંહની તાત્કાલિક ધરપકડ કરવામાં આવે.
- દિલ્હીમાં ફરીથી પોસ્ટમોર્ટમની મંજૂરી મળે.
- પાર્થિવ દેહના સ્થાનાંતરણ માટે લોજિસ્ટિક્સ સહાય પૂરી પાડવામાં આવે.
મુખ્યમંત્રીએ આમાંથી 4 મુખ્ય બિંદુઓ પર પોતાની સહમતિ દર્શાવી છે અને CBI તપાસની ભલામણ સ્વીકારી છે. જ્યારે જામીન અરજી અંગે તેમણે સ્પષ્ટ કર્યું કે તે સંપૂર્ણપણે કોર્ટનો વિષય છે.
શું છે સમગ્ર મામલો?
નોઈડાની 33 વર્ષીય ટ્વિશા શર્માના લગ્ન ભોપાલના કટારા હિલ્સ વિસ્તારમાં રહેતા સમર્થ સિંહ સાથે થયા હતા. સમર્થના માતા ગિરિબાલા સિંહ નિવૃત્ત જિલ્લા અને સત્ર ન્યાયાધીશ છે. લગ્નના માંડ 5 મહિના બાદ, ગત 12 મેની રાત્રે ટ્વિશા તેની સાસરીમાં ફાંસીના ફંદે લટકતી હાલતમાં મળી આવી હતી. ટ્વિશાના પરિવારે તેની સાસુ ગિરિબાલા અને પતિ સમર્થ વિરુદ્ધ દહેજ હત્યાનો ગુનો દાખલ કરાવ્યો છે.
પોસ્ટમોર્ટમ રિપોર્ટમાં ચોંકાવનારા ખુલાસા અને ફરાર પતિ પર ઈનામ
ટ્વિશાના પ્રથમ પોસ્ટમોર્ટમ રિપોર્ટમાં આત્મહત્યાના દાવાઓ સામે મોટા સવાલો ઉભા થયા છે. રિપોર્ટ અનુસાર, ટ્વિશાના માથા, કાન અને હાથ પર ઈજાના નિશાન મળી આવ્યા છે. ડોક્ટરોના જણાવ્યા અનુસાર, આ ઈજાઓ મૃત્યુ પહેલાની છે અને કોઈ મજબૂત અથવા બોથડ પદાર્થ વડે હુમલો કરવાને કારણે થઈ હોવાનું જણાય છે.
આ દરમિયાન સોમવારે જિલ્લા અદાલતે મુખ્ય આરોપી અને પતિ સમર્થ સિંહની જામીન અરજી ફગાવી દીધી હતી. હાલમાં સમર્થ ફરાર છે અને ભોપાલ પોલીસે તેની ધરપકડ પર ઈનામની રકમ રૂ. 10,000 થી વધારીને રૂ. 30,000 કરી દીધી છે.
પુરાવા સુરક્ષિત રાખવા કોર્ટનો મોટો આદેશ
ભવિષ્યની કાનૂની જરૂરિયાતો અને પુરાવાઓ સાથે કોઈ છેડછાડ ન થાય તે માટે કોર્ટે કટારા હિલ્સ પોલીસ સ્ટેશનના પ્રભારીને કડક આદેશ આપ્યો છે. કોર્ટે જણાવ્યું છે કે, ટ્વિશાના પાર્થિવ દેહને મધ્યપ્રદેશની સીમાની અંદર જ કોઈ મોટી હોસ્પિટલ અથવા તબીબી સંસ્થામાં માઈનસ 80 ડિગ્રી સેલ્સિયસ (-80°C) તાપમાન પર સુરક્ષિત રાખવામાં આવે, જેથી ભવિષ્યમાં જો કોઈ પુનઃ તપાસ કે સાક્ષ્યની જરૂર પડે તો ન્યાયિક પ્રક્રિયા પ્રભાવિત ન થાય.