TCS Nashik Case Nida Khan: ટાટા કન્સલ્ટન્સી સર્વિસિસ (TCS)-નાસિક બ્રાન્ચમાં બળજબરીથી ધર્માંતરણ અને યૌન ઉત્પીડન કેસમાં ફસાયેલ નિદા ખાન છેલ્લા એક સપ્તાહથી ફરાર છે. આ તપાસ દરમિયાન નિદા ખાનના છુપાવવાના સ્થળને લઈને તેમના પતિ પોલીસ સમક્ષ વારંવાર પોતાના નિવેદન બદલી અને પોલીસને ગુમરાહ કરી રહ્યા છે.
પોલીસ તપાસ અને પતિના ભ્રામક નિવેદન
શુક્રવારે પોલીસ પૂછપરછ દરમિયાન નિદા ખાનના પતિએ જણાવ્યું કે, નિદા 14 એપ્રિલના રોજ ઘર છોડીને જતી રહી હતી, અને હાલ એક સંબંધીના ઘરે રહી રહી છે. પરંતુ જ્યારે પોલીસ તપાસ માટે તે સંબંધીના ઘરે પહોંચી તો ઘરને તાળું મારેલું હતું, અને નિદા તેમજ સંબંધી બંનેના મોબાઈલ ફોન પણ સ્વીચ ઓફ હતા.
સૂત્રોના જણાવ્યા અનુસાર, બાદમાં નિદા ખાનના પતિએ એવો દાવો કર્યો કે નિદાની માસી નૂરી શેખ આ સપ્તાહની શરૂઆતમાં તેને નાસિક લઈ ગઈ હતી, અને હાલ તેને નિદા ખાન ક્યાં છે તેની કોઈ જ જાણકારી નથી.
નિદા ખાનના આગોતરા જામીન માટે અરજી
TCS કંપનીએ કડક કાર્યવાહી કરતા નિદા ખાનને 9 એપ્રિલના રોજ TCS માંથી સસ્પેન્ડ કરી દીધી છે. બીજી તરફ, નિદાના પરિવારે જણાવ્યું છે કે તે ગર્ભવતી છે. આ મેડિકલ સ્થિતિને મુખ્ય આધાર બનાવીને તેણે ધરપકડથી બચવા માટે નાસિકની એક સ્થાનિક કોર્ટમાં આગોતરા જામીન માટે અરજી પણ કરી છે.
શું છે ધર્માંતરણ અને યૌન ઉત્પીડનનો કેસ?
આ વિવાદ ત્યારે પ્રકાશમાં આવ્યો જ્યારે TCS નાસિકની એક મહિલા કર્મચારીએ તેના સહકર્મી દાનિશ શેખ પર ગંભીર આરોપ લગાવ્યો કે, દાનિશ પહેલાથી જ પરણિત હોવા છતાં 2022 માં તેણે લગ્નની ખોટી લાલચ આપીને તેની સાથે શારીરિક સંબંધ બાંધ્યા હતા. પોલીસ રિપોર્ટ અનુસાર, આરોપી નિદા ખાન એ મુખ્ય આરોપી દાનિશ શેખની બહેન છે.
રિપોર્ટમાં એવો ખુલાસો થયો છે કે નિદા ખાને પીડિતાના ધર્મ વિશે કથિત રીતે અપમાનજનક ટિપ્પણી કરી હતી, અને તેના પર ધર્મ પરિવર્તન કરવા માટે ભારે દબાણ કર્યું હતું. આ ઉપરાંત, નિદા ખાન અને તૌસીફ અખ્તર નામના અન્ય એક શખ્સ પર એવો પણ આરોપ છે કે તેઓએ પીડિતાથી દાનિશના પહેલાથી પરણિત હોવાની વાત છુપાવી રાખી હતી.
આ મામલે કુલ 7 લોકોની ધરપકડ થઈ
પોલીસે જેવી આ મામલાની ઊંડાણપૂર્વક તપાસ શરૂ કરી, કે તરત જ અન્ય 7 મહિલાઓ પણ સામે આવી હતી. આ મહિલાઓએ દાવો કર્યો છે કે ફેબ્રુઆરી 2022 થી માર્ચ 2026 ની વચ્ચે તેમના વરિષ્ઠ સહકર્મીઓએ તેમનું માનસિક અને યૌન ઉત્પીડન કર્યું હતું. હાલ પોલીસે આ ગંભીર મામલામાં સંડોવાયેલા 6 પુરુષ અને 1 મહિલા HR હેડ સહિત કુલ સાત કર્મચારીઓની ધરપકડ કરી લીધી છે.