Gyanesh Kumar News: મુખ્ય ચૂંટણી કમિશનર (CEC) જ્ઞાનેશ કુમારની કામગીરી અને નિર્ણય લેવાની પદ્ધતિ સામે ગંભીર સવાલો ઉભા થયા છે. સુપ્રીમ કોર્ટ સોમવારે મુખ્ય ચૂંટણી કમિશનર જ્ઞાનેશ કુમારને તાત્કાલિક અસરથી સસ્પેન્ડ કરવાની અને તેમના દ્વારા લેવામાં આવેલા કથિત "બિન-અધિકૃત" નિર્ણયોને રદ કરવાની માંગ કરતી મહત્વપૂર્ણ અરજીઓ પર સુનાવણી હાથ ધરશે.
આ સંવેદનશીલ કેસની સુનાવણી દેશના ચીફ જસ્ટિસ સૂર્ય કાંત, જસ્ટિસ જોયમાલ્યા બાગચી અને જસ્ટિસ વી. મોહનાની બનેલી ખંડપીઠ દ્વારા કરવામાં આવશે. આ અરજીઓ પટનાના રહેવાસી રાકેશ કુમાર સિંહ અને વકીલ શૈલેન્દ્ર મણિ ત્રિપાઠી દ્વારા સુપ્રીમ કોર્ટમાં દાખલ કરવામાં આવી છે.
આ પણ વાંચો
એકપક્ષીય નિર્ણયો અને સામૂહિક પ્રક્રિયાના ભંગનો આરોપ
અરજીઓમાં મુખ્યત્વે એ કાનૂની મુદ્દો ઉઠાવવામાં આવ્યો છે કે, શું મુખ્ય ચૂંટણી કમિશનર જ્ઞાનેશ કુમારે વ્યક્તિગત રીતે એવી સત્તાઓનો ઉપયોગ કર્યો છે કે જે કાયદાકીય રીતે સમગ્ર ચૂંટણી પંચની બનેલી છે. અરજદારોનો ગંભીર આરોપ છે કે સીઈસી જ્ઞાનેશ કુમારે પંચના અન્ય બે ચૂંટણી કમિશનરો સુખબીર સિંહ સંધુ અને વિવેક જોશીની કોઈ પણ પ્રકારની સંમતિ કે સહમતિ લીધા વિના જ 'સ્પેશિયલ ઇન્ટેન્સિવ રિવિઝન' (SIR) ને લગતી માર્ગદર્શિકા અને તેના સોફ્ટવેરમાં ફેરફારો કર્યા હતા.
આ ઉપરાંત, એક મીડિયા રિપોર્ટને ટાંકીને અરજીમાં ખુલાસો કરવામાં આવ્યો છે કે છેલ્લા 10 મહિના દરમિયાન, અન્ય બે ચૂંટણી કમિશનરોએ તેમની જાણ બહાર એકપક્ષીય રીતે લેવાયેલા નીતિગત નિર્ણયો સામે ઓછામાં ઓછી 14 વખત લેખિત વાંધો ઉઠાવ્યો હતો.
સસ્પેન્શન અને ફોજદારી કાર્યવાહીની માંગ
વકીલ શૈલેન્દ્ર મણિ ત્રિપાઠી દ્વારા દાખલ કરવામાં આવેલી અરજીમાં દલીલ કરવામાં આવી છે કે મુખ્ય ચૂંટણી કમિશનરના આ પ્રકારના એકપક્ષીય પગલાં સામૂહિક નિર્ણય લેવાની સંસદીય અને બંધારણીય પ્રક્રિયાનું સીધું ઉલ્લંઘન કરે છે, જે કાયદાકીય રીતે અનિવાર્ય છે.
અરજદારોએ સુપ્રીમ કોર્ટ સમક્ષ માગણી કરી છે કે ચૂંટણી પંચની સામૂહિક ગરિમા, સ્વાયત્તતા અને તેના 'બહુ-સભ્ય સ્વરૂપ'નું રક્ષણ કરવા માટે, જ્યાં સુધી આ કેસની અંતિમ સુનાવણી પૂર્ણ ન થાય ત્યાં સુધી જ્ઞાનેશ કુમારને તેમની સત્તાવાર ફરજો અને પદ પરથી સસ્પેન્ડ કરવામાં આવે. આ સાથે જ, સત્તાવાર ફરજો અને કાયદાકીય જોગવાઈઓના કથિત ઉલ્લંઘન બદલ સીઈસી તથા અન્ય જવાબદાર અધિકારીઓ સામે કડક ફોજદારી કાર્યવાહી શરૂ કરવાની પણ અરજીમાં દાદ માંગવામાં આવી છે.
સર્વોચ્ચ અદાલતમાં થનારી આ સુનાવણી પર હવે સમગ્ર દેશના રાજકીય અને કાનૂની વર્તુળોની નજર ટકેલી છે.