Thackeray Brothers Unite: શિવસેના (UBT) પ્રમુખ ઉદ્ધવ ઠાકરે અને મહારાષ્ટ્ર નવનિર્માણ સેના (MNS) ના પ્રમુખ રાજ ઠાકરેએ આગામી મ્યુનિસિપલ કોર્પોરેશન (BMC) ની ચૂંટણી પહેલા ગઠબંધનની સત્તાવાર જાહેરાત કરી દીધી છે. લગભગ 20 વર્ષ પછી ઠાકરે ભાઈઓ ફરી એકવાર રાજકીય મેદાનમાં એકબીજાની સાથે ઊભા જોવા મળી રહ્યા છે. બંને નેતાઓએ સંયુક્ત પ્રેસ કોન્ફરન્સ યોજીને આ ગઠબંધનની જાણકારી આપી હતી.
'બટેંગે તો કટેંગે'ના નારા સાથે ચૂંટણી રણશિંગુ ફુંક્યું
ગઠબંધનની જાહેરાતની સાથે જ ઉદ્ધવ ઠાકરેએ 'બટેંગે તો કટેંગે'નો નારો આપ્યો હતો. પ્રેસ કોન્ફરન્સમાં તેમણે ભારપૂર્વક જણાવ્યું હતું કે અમે એકજૂથ રહેવા માટે જ સાથે આવ્યા છીએ. બીજી તરફ રાજ ઠાકરેએ આગામી BMC ચૂંટણીઓ અંગે હૂંકાર ભરતા કહ્યું હતું કે મુંબઈને હવે એક મરાઠી મેયર જ મળશે.
ભાજપથી નારાજ નેતાઓ માટે ગઠબંધનના દ્વાર ખુલ્લા
પ્રેસ કોન્ફરન્સ દરમિયાન ઉદ્ધવ ઠાકરેએ અન્ય રાજકીય પક્ષોના નેતાઓને પણ આમંત્રણ આપતા કહ્યું કે જે લોકો ભાજપની અંદર થઈ રહેલી ગતિવિધિઓને સહન કરી શકતા નથી, તેઓ પણ શિવસેના (UBT) અને MNS ના આ ગઠબંધનમાં જોડાઈ શકે છે. આ ગઠબંધનને કારણે મુંબઈના રાજકારણમાં નવું સમીકરણ સર્જાયું છે, જ્યારે કોંગ્રેસે મહાવિકાસ આઘાડી (MVA) થી અંતર જાળવી રાખ્યું હોવાના અહેવાલ છે.
બાળાસાહેબ ઠાકરેને શ્રદ્ધાંજલિ
આ ઐતિહાસિક જાહેરાત કરતા પહેલા ઉદ્ધવ અને રાજ ઠાકરે પોતપોતાની પત્નીઓ સાથે શિવાજી પાર્ક સ્થિત સ્મૃતિ સ્થળ પર જઈને પિતા બાળાસાહેબ ઠાકરેને શ્રદ્ધાંજલિ આપી હતી. પ્રેસ કોન્ફરન્સ દરમિયાન મંચ પર એક ખાસ પોસ્ટર લગાવવામાં આવ્યું હતું, જેમાં માત્ર બાળાસાહેબ ઠાકરેની તસવીર હતી. આ પોસ્ટર પર ન તો ઉદ્ધવની તસવીર હતી કે ન તો રાજની, પરંતુ બંને પક્ષોના ચૂંટણી ચિહ્નોની વચ્ચે બાળાસાહેબનો ફોટો રાખવામાં આવ્યો હતો, જે તેમની વિચારધારા સાથે ફરી જોડાવાનો સંકેત આપે છે.
શ્રદ્ધાંજલિ આપવા સમયે શિવસેના (UBT) નેતા આદિત્ય ઠાકરે અને MNS નેતા અમિત ઠાકરે પણ પરિવાર સાથે જોવા મળ્યા હતા. પ્રેસ કોન્ફરન્સ બાદ આખો ઠાકરે પરિવાર મંચ પર એકસાથે ઉભેલો જોવા મળ્યો હતો. આ પ્રસંગે શિવસેના (UBT) ના વરિષ્ઠ નેતા સંજય રાઉત પણ મંચ પર ઉપસ્થિત રહ્યા હતા.