Parvinder Jhota Murder, Punjab Bandh: માનસામાં પરવિંદર સિંહ ઝોટાની હત્યાના વિરોધમાં આજે પંજાબ બંધનું આહવાન કરવામાં આવ્યું છે, જેની સમગ્ર રાજ્યમાં ભારે અસર જોવા મળી રહી છે. રાજ્યના મોટાભાગના શહેરોની બજારોમાં સન્નાટો છવાયો છે, રસ્તાઓ વેરાન બની ગયા છે. આ વિરોધ પ્રદર્શનને સમાજના દરેક વર્ગ તરફથી સમર્થન મળી રહ્યું છે.
બજારો બંધ અને આક્રોશ રેલીનું આયોજન
ફાઝિલ્કા જિલ્લામાં વ્યાપાર મંડળ, ખેડૂત યુનિયનો અને વિવિધ સામાજિક સંગઠનોએ બંધને સમર્થન આપીને વેપાર-રોજગાર સંપૂર્ણપણે બંધ રાખવાનો નિર્ણય લીધો છે. બજારોમાં દુકાનો બપોરે 1 વાગ્યા સુધી બંધ રાખવામાં આવશે. આ સિવાય વિવિધ સંગઠનો દ્વારા સવારે 10:30 વાગ્યે શહેરના બજારોમાં આક્રોશ રેલી કાઢીને DC કાર્યાલય સુધી પહોંચી વિરોધ નોંધાવવાનું આયોજન કરવામાં આવ્યું છે.
ખેડૂત અને સામાજિક નેતાઓની અટકાયત
પંજાબ બંધને પગલે કાયદો અને વ્યવસ્થા જાળવવા માટે પોલીસે રાજ્યભરમાં કડક વલણ અપનાવ્યું છે. જાલંધરમાં ખેડૂતોના વિરોધ પ્રદર્શન અગાઉ જ પોલીસે ખેડૂત નેતાઓને ઘરમાં નજરકેદ કરી દીધા છે, જેમાં જંડિયાલા નજીકના ગામમાંથી પોલીસ દ્વારા પ્રમુખ કુલવિંદર સિંહ મછિયાણાની અટકાયત કરવામાં આવી છે. ફિરોઝપુરમાં પણ બંધનુંઆહવાન કરનાર વંચિત સમાજના નેતા દીપ દર્શનાનંદ અને મિસલ સતલુજના પદાધિકારી માન સિંહ કિલીને ફિરોઝપુર પોલીસે સવારે તેમના ઘરેથી કસ્ટડીમાં લઈ લીધા છે.
ડ્રગ માફિયા સામે શાંતિપૂર્ણ આંદોલનની અપીલ
આ બંધ આંદોલનને વિવિધ ખેડૂત સંગઠનોનું પણ મોટું સમર્થન મળી રહ્યું છે. કિસાન મજદૂર સંઘર્ષ સમિતિના નેતા સરવન સિંહ પંઢેરે જણાવ્યું કે, તમામ યુનિયનોએ પંજાબની જનતાને ડ્રગ માફિયા વિરુદ્ધ 'પંજાબ બંધ' ને સફળ બનાવવા અપીલ કરી છે. કિસાન મજદૂર સંઘર્ષ સમિતિ દ્વારા સમગ્ર પંજાબમાં જિલ્લા મુખ્યાલય પર પ્રદર્શનનું આહવાન કરાયું છે. તેમણે સ્પષ્ટ કર્યું હતું કે, ઈમરજન્સી સેવાઓ ચાલુ રહેશે અને વિરોધ પ્રદર્શન સંપૂર્ણપણે શાંતિપૂર્ણ રહેશે.
શાળાઓ અને ઈમરજન્સી સેવાઓ પર ભારે અસર
પંજાબ બંધના આહવાનને ધ્યાનમાં રાખીને રાજ્યની અનેક ખાનગી શાળાઓએ બાળકોની સુરક્ષા અને અભ્યાસને ધ્યાને રાખી અગાઉથી જ વાલીઓને મેસેજ મોકલીને રજા જાહેર કરી દીધી હતી. જોકે, સરકારી શાળાઓ સામાન્ય દિવસોની જેમ જ ખુલ્લી રહી છે. બીજી તરફ, ફાઝિલકા ડિસ્ટ્રિક્ટ કેમિસ્ટ એસોસિએશને પણ બંધને સમર્થન આપ્યું છે, જેના હેઠળ દવાની દુકાનો સવારે 11 વાગ્યા સુધી બંધ રહેશે.
ટ્રેન વ્યવહાર સામાન્ય, બસ વ્યવહાર ખોરવાયો
પંજાબ બંધની રેલ વાહનવ્યવહાર પર કોઈ વિપરીત અસર પડી નથી અને ટ્રેનો સામાન્ય રીતે ચાલુ છે. પરંતુ બસ સેવાઓ ઠપ્પ થવાના કારણે માર્ગ વાહન વ્યવહારને માળખાકીય અસર પહોંચી છે. કારણ કે, માત્ર 10 ટકા બસો મુખ્યત્વે લોંગ રૂટની જ રસ્તા પર દોડી રહી છે. માર્ગ વ્યવહાર પ્રભાવિત થવાના કારણે મુસાફરો રેલવે સ્ટેશન તરફ વળ્યા છે, જેથી સ્ટેશન પર મુસાફરોની ભારે ભીડ જોવા મળી રહી છે.
- ભઠિંડા: તમામ પ્રાઇવેટ બસ બંધ, જ્યારે સરકારી બસો ચાલી રહી છે.
- તરણ તારન: સવારથી જ બોહડી ચોક ખાતે ભારે પોલીસ બંદોબસ્ત ખડકી દેવાયો છે, તમામ દુકાનો બંધ છે અને બસોની અવરજવર નહિવત્ છે.
- ફરીદકોટ: સામાન્ય નાગરિકોના સમર્થનને કારણે બજારો સંપૂર્ણ બંધ છે, જિલ્લાની તમામ શાળાઓ બંધ છે પરંતુ બસ વ્યવહાર ચાલુ જોવા મળ્યો છે.