Premanand Maharaj Keli Kunj Ashram: વૃંદાવનના પ્રખ્યાત સંત પ્રેમાનંદ મહારાજ ગુરુવારના રોજ સવારે કેલિકુંજ આશ્રમ પહોંચ્યા અને ભક્તોને દર્શન આપ્યા હતા. શિષ્યના નિધન અને આશ્રમ અંગે ફેલાયેલી અફવાઓ વચ્ચે કેલિકુંજ આશ્રમે પ્રેસ નોટ જાહેર કરી સ્થિતિ સ્પષ્ટ કરી છે. વધુમાં, એક સત્તાવાર ફેસબુક પેજ પરથી પણ આ અફવાઓ અંગે નિવેદન જાહેર કરી સ્પષ્ટતા કરવામાં આવી છે.
પ્રેમાનંદ મહારાજ આશ્રમ પહોંચ્યા, ભક્તોને દર્શન આપ્યા
વૃંદાવનના પ્રખ્યાત સંત પ્રેમાનંદ મહારાજના શિષ્ય દીપક લોધી ઉર્ફે રસિક દુલારી શરણના અવસાન બાદ ફેલાયેલી વિવિધ અફવાઓ પર હવે વિરામ લાગી ગયો છે. પ્રેમાનંદ મહારાજ ગુરુવારે સવારે 6 વાગ્યે રાધા કેલીકુંજ આશ્રમ પહોંચ્યા અને તેમણે ભક્તોને દર્શન આપ્યા હતા. આ સાથે જ આશ્રમ તરફથી સોશિયલ મીડિયા પર સત્તાવાર સ્પષ્ટતા પણ કરવામાં આવી છે.
પ્રેમાનંદ મહારાજના આગમનથી ભક્તોમાં ખુશીની લહેર
વૃંદાવનમાં પ્રેમાનંદ મહારાજના ભક્તો છેલ્લા કેટલાક દિવસોથી તેમના દર્શનની આતુરતાપૂર્વક રાહ જોઈ રહ્યા હતા. કેટલાક ભક્તો સીધા આશ્રમ પહોંચી રહ્યા હતા, તો કેટલાક સોશિયલ મીડિયા પર તેમના સમાચાર શોધી રહ્યા હતા. મહારાજના આશ્રમ આવવા અંગે જાતજાતની વાતો વહેતી થતાં ભક્તોના મનમાં અનેક સવાલો ઉભા થઈ રહ્યા હતા.
ગુરુવારના રોજ સવારે લગભગ 6 વાગ્યે પ્રેમાનંદ મહારાજ રાધા કેલીકુંજ આશ્રમ પહોંચતા જ ત્યાં હાજર ભક્તોમાં ભારે ખુશી જોવા મળી હતી. મહારાજે આશ્રમમાં ભક્તોને દર્શન આપ્યા હતા અને તેઓ લગભગ બે કલાક સુધી આશ્રમમાં રોકાયા હતા. ઘણા દિવસોથી કલાકો સુધી રાહ જોતા શ્રદ્ધાળુઓ માટે આ સમાચાર મોટો રાહતરૂપ સાબિત થયા છે.
એકાંતવાસ અને આશ્રમ અંગેની અફવાઓ પર વિરામ
મહારાજના શિષ્ય દીપક લોધી ઉર્ફે રસિક દુલારી શરણના અવસાન પછી સોશિયલ મીડિયા પર જાતજાતની ચર્ચા શરૂ થઈ હતી. કેટલાક લોકોએ એવો પણ દાવો કર્યો કે પ્રેમાનંદ મહારાજ કેલીકુંજ આશ્રમ છોડીને એકાંતવાસમાં જતા રહ્યા છે. તેમજ આશ્રમો અલગ થવા અંગે પણ અલગ-અલગ વાતો કરવામાં આવી રહી હતી. આ તમામ ચર્ચા વચ્ચે ભક્તોના મનમાં સવાલ હતો કે મહારાજ હવે ક્યાં છે. જોકે, હવે મહારાજના પ્રત્યક્ષ દર્શન થતાં જ તમામ અફવાઓનો અંત આવ્યો છે.
આશ્રમે ફેસબુક પેજ પર સ્પષ્ટતા કરી: પ્રેસનોટ જાહેર
કેલીકુંજ આશ્રમ સાથે જોડાયેલા 'સંત મહિમા' (Sant Mahima) ફેસબુક પેજ પર આ મામલે એક સત્તાવાર પ્રેસ નોટ જાહેર કરવામાં આવી છે. આશ્રમ દ્વારા સ્પષ્ટ કરવામાં આવ્યું છે કે રાધા કેલીકુંજ આશ્રમ અને બીજો આશ્રમ બંને અલગ-અલગ છે. આ ઉપરાંત આશ્રમે ભ્રામક અને ખોટી ખબર ફેલાવનારા લોકોને પણ જવાબ આપ્યો છે, અને બંને આશ્રમો અંગે ચાલતા અલગ-અલગ દાવા વચ્ચે પોતાની સ્થિતિ બિલકુલ સ્પષ્ટ કરી દીધી છે.
શિષ્યના અવસાન બાદ આશ્રમની વ્યવસ્થામાં બદલાવ
પ્રેમાનંદ મહારાજના શિષ્ય રસિક દુલારી શરણ ઉર્ફે દીપક લોધીના નિધન બાદ કેલીકુંજ આશ્રમની વ્યવસ્થાઓમાં કેટલાક મોટા ફેરફારો કરવામાં આવ્યા હતા. આ નવી વ્યવસ્થા ક્યાં સુધી લાગુ રહેશે તે અંગે હજુ કોઈ ચોક્કસ માહિતી સામે આવી નથી.
દીક્ષા કાર્યક્રમ મોકૂફ: આશ્રમમાં દીક્ષા આપવાનો કાર્યક્રમ અચોક્કસ મુદત માટે સ્થગિત કરી દેવામાં આવ્યો છે.
ટોકન દર્શન પર રોક:ટોકન દ્વારા થતા દર્શન પર પણ રોક લગાવી દેવામાં આવી છે.
યમુના વિહાર કુંજ બેલવાન આશ્રમ: યમુના વિહાર કુંજ બેલવાન સ્થિત આશ્રમમાં પણ ભક્તો માટે દર્શન બંધ કરી દેવામાં આવ્યા હતા.
સેવાદારોની માહિતી અને વેશભૂષા: આશ્રમમાં સેવા આપતા સેવાદારોએમાઈક દ્વારા ભક્તોને આ નવી વ્યવસ્થા અંગે માહિતગાર કર્યા અને સેવાદારોની વેશભૂષામાં પણ બદલાવ કરવામાં આવ્યો હતો.
શિષ્ય દીપક લોધીનું અવસાન અને પોલીસ તપાસ
મધ્ય પ્રદેશના જબલપુરના રહેવાસી અને પ્રેમાનંદ મહારાજના શિષ્ય રસિક દુલારી શરણ ઉર્ફે દીપક લોધીનું ગત 25 સપ્ટેમ્બરના રોજ સવારે લગભગ 10:36 વાગ્યે અવસાન થયું હતું. પોલીસના જણાવ્યા અનુસાર, CCTV ફૂટેજમાં તેઓ એપાર્ટમેન્ટના ચોથા માળની છત પરથી નીચે પડતા જોવા મળ્યા હતા. આ ઘટનામાં તેમને ગંભીર ઈજાઓ પહોંચી, જેના કારણે તેમનું મૃત્યુ નીપજ્યું હતું. હાલમાં પોલીસ આ મામલાની ઊંડાણપૂર્વક તપાસ કરી રહી છે.