Ajit Doval Speech: નવી દિલ્હીના ભારત મંડપમ ખાતે આયોજિત 'વિકસિત ભારત યંગ લીડર્સ ડાયલોગ' (VBYLD 2026) નો ઉદ્ઘાટન સમારોહ યોજાયો હતો. જેમાં રાષ્ટ્રીય સુરક્ષા સલાહકાર (NSA) અજિત ડોભાલે જણાવ્યું કે ભારતની આઝાદી ખૂબ મોટી કિંમત ચૂકવીને મળી છે. તેમણે યુવાનોને અપીલ કરી કે તેઓ ઇતિહાસમાંથી પ્રેરણા લઈને રાષ્ટ્રના પુનઃનિર્માણમાં જોડાય.
અજિત ડોભાલે જણાવ્યું કે આપણી અગાઉની પેઢીઓએ અપમાન, વિનાશ અને ભારે નુકસાન સહન કર્યું છે. આપણા પૂર્વજોએ અત્યંત લાચારીના સમય જોયા છે, જ્યાં આપણા ગામડાઓ સળગાવી દેવામાં આવ્યા, સભ્યતા નષ્ટ કરવામાં આવી અને આપણા મંદિરો લૂંટાયા છતાં આપણે તેને લાચાર બનીને જોતા રહ્યા. આ ઇતિહાસ આજના યુવાનો સામે એક પડકાર ફેંકે છે.
ઇતિહાસનો બદલો એ રીતે લેવાનો છે કે….
અજિત ડોભાલે પોતાના ભાષણમાં 'બદલો' શબ્દનો પ્રયોગ એક વિશિષ્ટ સંદર્ભમાં કર્યો હતો. તેમણે કહ્યું કે 'બદલો' શબ્દ કદાચ યોગ્ય ન લાગે, પરંતુ તે પોતે એક શક્તિશાળી શક્તિ છે. અહીં બદલાનો અર્થ કોઈ હિંસા નથી, પરંતુ ઇતિહાસનો બદલો એ રીતે લેવાનો છે કે ભારતને ફરીથી એ સ્થાને લઈ જવામાં આવે જ્યાં તે પોતાના અધિકારો, વિચારો અને માન્યતાઓ પર આધારિત એક મહાન રાષ્ટ્ર બની શકે.
સુરક્ષાના જોખમો પ્રત્યે ભૂતકાળની બેદરકારી
ભારતની પ્રાચીન સભ્યતા અત્યંત અદ્યતન અને શાંતિપ્રિય હતી, જેણે ક્યારેય કોઈના પર હુમલો કર્યો નથી કે કોઈના મંદિરો તોડ્યા નથી. તેમ છતાં ડોભાલે ચેતવણી આપી હતી કે આપણે ભૂતકાળમાં સુરક્ષાના જોખમોને સમજવામાં નિષ્ફળ રહ્યા હતા. જ્યારે આપણે આપણી સુરક્ષા પ્રત્યે બેદરકાર રહ્યા, ત્યારે ઇતિહાસે આપણને કઠોર પાઠ ભણાવ્યા છે. જો આવનારી પેઢીઓ આ પાઠ ભૂલી જશે, તો તે દેશ માટે સૌથી મોટી દુર્ઘટના હશે.