Delhi CJP Protest Update: મુખ્ય ચૂંટણી કમિશનર જ્ઞાનેશ કુમાર સામે કોકરોચ જનતા પાર્ટી (CJP) દ્વારા પ્રસ્તાવિત વિરોધ પ્રદર્શન મુદ્દે વિપક્ષી દળો વચ્ચે મતભેદો સ્પષ્ટપણે સામે આવ્યા છે. વિરોધ પ્રદર્શનમાં ડાબેરી પક્ષો અને આમ આદમી પાર્ટી (AAP) એ ખુલ્લેઆમ પોતાનું સમર્થન વ્યક્ત કર્યું છે, ત્યારે કોંગ્રેસ પક્ષ તેનાથી દૂર રહ્યો છે. બીજી તરફ, લોકસભામાં વિપક્ષના નેતા રાહુલ ગાંધી ચેન્નઈમાં યોજાનાર 'છાત્રો કી ગૂંજ' કાર્યક્રમમાં ભાગ લેવા ગયા છે.
ડાબેરી દળો અને AAP દ્વારા ખુલ્લું સમર્થન
CJP દ્વારા તમામ વિપક્ષી દળોને આ વિરોધ પ્રદર્શનમાં ભાગ લેવા માટે આમંત્રણ આપવામાં આવ્યું હતું. આ આમંત્રણ સ્વીકારીને ડાબેરી દળો અને આમ આદમી પાર્ટીએ ભાગીદારીની જાહેરાત કરી દીધી છે. જોકે, તૃણમૂલ કોંગ્રેસ (TMC) ના વલણ અંગે શુક્રવાર રાત સુધી ચિત્ર સ્પષ્ટ નહોતું. દિલ્હી પહોંચતા પહેલાં મમતા બેનરજીએ સંકેત આપ્યો હતો કે તેઓ પ્રદર્શનમાં સામેલ થઈ શકે છે, પરંતુ કોઈ આખરી નિર્ણય લેવાયો નહોતો. તેમણે CJP સાથેના સંબંધો અને સમર્થન અંગે પણ વાત કરી હતી.
કેજરીવાલ પરિવાર સાથે જંતર-મંતર પહોંચશે
આમ આદમી પાર્ટીના રાષ્ટ્રીય કન્વીનર અરવિંદ કેજરીવાલ પરિવાર સાથે પ્રદર્શનમાં ભાગ લેશે. અરવિંદ કેજરીવાલે દેશના તમામ નાગરિકોને વધુમાં વધુ સંખ્યામાં દિલ્હીના જંતર-મંતર ખાતે પહોંચવા અપીલ કરી છે. તેમણે જણાવ્યું હતું કે, આ મુદ્દો કોઈ એક વ્યક્તિ કે પાર્ટીનો નથી પરંતુ સમગ્ર દેશનો છે, તેથી તેઓ અને તેમનો આખો પરિવાર ત્યાં ઉપસ્થિત રહેશે.
વિરોધ કરવાનો અધિકાર, સુપ્રીમ કોર્ટમાં અરજી
ડાબેરી પક્ષો જેમ કે CPM, સીપીઆઈ (CPI), સીપીઆઈ-એમએલ (CPI-ML), આરએસપી (RSP) અને ઓલ ઈન્ડિયા ફોરવર્ડ બ્લોકે એક સંયુક્ત નિવેદન જારી કરીને જણાવ્યું કે, સભા યોજવી અને પ્રદર્શન કરવું એ નાગરિકોનો મૂળભૂત અધિકાર છે. CPM મહાસચિવ એમ.એ. બેબીએ પ્રદર્શન પર મૂકવામાં આવેલા પ્રતિબંધ સામે સુપ્રીમ કોર્ટમાં અરજી દાખલ કરી અને સ્પષ્ટ કર્યું કે ડાબેરી દળો પૂરી તાકાત સાથે પ્રદર્શનમાં હાજર રહેશે.
રાહુલ ગાંધી તામિલનાડુના પૂર્વ નિર્ધારિત પ્રવાસે
દિલ્હીમાં SIR ને લઈને મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે વિપક્ષી પ્રદર્શનો ચાલુ હોવા છતાં, લોકસભામાં વિપક્ષના નેતા રાહુલ ગાંધી 10 ઓક્ટોબરે પોતાના નિર્ધારિત કાર્યક્રમ અનુસાર ચેન્નઈ જશે. તામિલનાડુ કોંગ્રેસ સમિતિના પ્રમુખ માણિકમ ટાગોરે શુક્રવારે આ અંગે વિગતો આપી હતી.
કોંગ્રેસ નેતાઓએ માહિતી આપી કે મોટી સંખ્યામાં વિદ્યાર્થીઓએ QR કોડ મારફતે કાર્યક્રમમાં સીધા અથવા પરોક્ષ રીતે જોડાવા માટે નોંધણી કરાવી છે. કોંગ્રેસના નેતા ગુલામ અહમદ મીર સાથેની સંયુક્ત પત્રકાર પરિષદમાં માણિકમ ટાગોરે જણાવ્યું હતું કે, જ્યાં એક તરફ વિપક્ષી નેતાઓ દેશની રાજધાની દિલ્હીમાં એકઠા થઈ રહ્યા છે. બીજી તરફ રાહુલ તામિલનાડુમાં પોતાના અગાઉથી નક્કી કરેલ જનસંપર્ક કાર્યક્રમ પર અડગ રહ્યા છે.