VIDEO: રવિવારે કેરળના ત્રિશૂર રેલવે સ્ટેશન પર ભીષણ આગ લાગી હતી, જેમાં સ્ટેશનના પાર્કિંગમાં પાર્ક કરેલા 200થી વધુ ટુ-વ્હીલર બળીને ખાખ થઈ ગયા હતા. આ ઘટના પ્લેટફોર્મ નંબર 2 પાસેના ટુ-વ્હીલર પાર્કિંગ વિસ્તારમાં બની હતી જેના કારણે મુસાફરો અને નજીકમાં રહેતા રહેવાસીઓમાં ગભરાટ ફેલાયો હતો.
શરૂઆતના અહેવાલો અનુસાર આગ સવારે 6:45 વાગ્યાની આસપાસ લાગી હતી. આગની જ્વાળાઓ ઝડપથી પાર્કિંગ વિસ્તારમાં ફેલાઈ ગઈ હતી, જ્યાં સામાન્ય રીતે દરરોજ 500થી વધુ મોટરસાયકલ અને સ્કૂટર પાર્ક થતા જોવા મળે છે.
એવું માનવામાં આવે છે કે પાર્ક કરેલા વાહનોમાં રહેલા બળતણને કારણે આગ ઝડપથી ફેલાઈ અને તીવ્ર બની, જેના કારણે થોડીવારમાં જ નોંધપાત્ર નુકસાન થયું. આગની માહિતી મળતા જ ફાયર અને રેસ્ક્યુ સર્વિસના કર્મચારીઓ તાત્કાલિક ઘટનાસ્થળે પહોંચી ગયા હતા.
Thrissur, Kerala: A massive fire broke out at Thrissur Railway Station. The blaze originated in the bike parking area near the station’s rear entrance, destroying several motorcycles. Preliminary reports indicate that more than 600 bikes were parked in the affected area pic.twitter.com/XQoSURUtUB
— IANS (@ians_india) January 4, 2026
ફાયર ટેન્ડરોએ આગ પર કાબુ મેળવ્યો
ફાયર ટેન્ડરોને આગ ઓલવવામાં લગભગ અડધો કલાક લાગ્યો અને આગ સફળતાપૂર્વક ઓલવાઈ ગઈ. જોકે, થોડા સમય માટે વિસ્તારમાં ધુમાડો છવાયેલો રહ્યો, જેના કારણે મુસાફરો અને સ્ટેશન સ્ટાફને અસુવિધા થઈ.
અનેક ગાડીઓ બાળીને ખાખ
પ્રત્યક્ષદર્શીઓએ જણાવ્યું હતું કે ઘણા વાહનો સંપૂર્ણપણે બળી ગયા હતા જ્યારે અન્યને થોડું નુકસાન થયું હતું. પાર્ક કરેલા વાહનોના માલિકો, જેમાંથી ઘણા રોજના મુલાકાતીઓ હતા, ઘટનાની જાણ થતાં જ ઘટનાસ્થળે દોડી ગયા હતા, પરંતુ તેમને તેમના ટુ-વ્હીલર બળીને ખાખ થયેલા જોવા મળ્યા. અધિકારીઓ હજુ પણ કેટલા વાહનો બળી ગયા છે તે શોધી રહ્યા છે.
આ ઉપરાંત, આગને રેલવે સ્ટેશન પ્લેટફોર્મ સુધી ન ફેલાય તે માટે જરૂરી પગલાં લેવામાં આવ્યા હતા. અધિકારીઓના જણાવ્યા અનુસાર, આગ સ્થળની નજીક રેલવે લાઇન પર એક એન્જિન પાર્ક કરવામાં આવ્યું હતું, પરંતુ રેલવેએ એન્જિનને કોઈ નુકસાન થયું હોવાની પુષ્ટિ કરી નથી.
આગને કારણે ટુ-વ્હીલર અને સમગ્ર ટીન-શીટવાળા શેડને વ્યાપક નુકસાન થયું છે. ફાયર અધિકારીઓના જણાવ્યા અનુસાર, પોલીસ અને રેલવે અધિકારીઓએ આગનું કારણ નક્કી કરવા માટે તપાસ શરૂ કરી છે.
જોકે, આગનું કારણ હજુ સુધી જાણી શકાયું નથી. અધિકારીઓએ જણાવ્યું હતું કે આગ ઇલેક્ટ્રિક શોર્ટ સર્કિટ, ઇંધણ લીકેજ કે અન્ય કોઈ કારણોસર લાગી હતી તે નક્કી કરવા માટે વિગતવાર તપાસ કરવામાં આવશે.