Bakrid 2026, Cow Sacrifice Ban in Tamil Nadu: મદ્રાસ હાઈકોર્ટે તમિલનાડુ રાજ્યમાં બકરીદ (ઈદ-ઉલ-અઝહા) દરમિયાન અથવા અન્ય કોઈપણ દિવસે ગાય કે વાછરડાની કુરબાની આપવા પર સંપૂર્ણ પ્રતિબંધ ફરમાવ્યો છે. જસ્ટિસ જી.આર. સ્વામીનાથન અને જસ્ટિસ વી. લક્ષ્મીનારાયણનની વેકેશન બેન્ચે આ અંગેનો અત્યંત મહત્વપૂર્ણ આદેશ જારી કર્યો છે.
કોર્ટના મુખ્ય નિર્દેશો અને આદેશ
બૂચડખાના તરીકે માન્યતા પ્રાપ્ત ન હોય તેવા સ્થળોએ બકરીદ નિમિત્તે ગાયો અને વાછરડાઓની કુરબાની આપી શકાય કે કેમ તે પ્રશ્નને ધ્યાનમાં રાખીને મદ્રાસ હાઈકોર્ટે તમિલનાડુ સરકારને કડક સૂચનાઓ આપી છે. કોર્ટના મુખ્ય નિર્દેશો નીચે મુજબ છે:
- બકરીદની પૂર્વસંધ્યાએ કે અન્ય કોઈ પણ દિવસે રાજ્યમાં ક્યાંય પણ ગાય કે વાછરડાની કુરબાની ન આપી શકાય.
- જાહેર સ્થળ અથવા બિન-માન્યતા પ્રાપ્ત જગ્યા પર ગાયોની કુરબાની આપવા પર સંપૂર્ણ રોક લગાવવામાં આવે.
- મુખ્ય સચિવ અને એડિશનલ ડિરેક્ટર જનરલ ઓફ પોલીસ (કાયદો અને વ્યવસ્થા) સહિત તમામ સંબંધિત અધિકારીઓએ આ આદેશનું કડકાઈથી પાલન સુનિશ્ચિત કરવા માટે નિર્દેશો જારી કરવા પડશે.
કોણે દાખલ કરી હતી અરજી?
કોઈમ્બતુરના રહેવાસી કે. સૂર્યા ઉર્ફે કે. સૂર્યા પ્રશાંત દ્વારા આ મામલે જાહેર હિતની અરજી (PIL) દાખલ કરવામાં આવી હતી. તેમણે હાઈકોર્ટના ધ્યાન પર લાવ્યું હતું કે, બકરીદ નિમિત્તે બિન-માન્યતા પ્રાપ્ત વિસ્તારમાં ગાયો અને વાછરડાની કુરબાની માટે વ્યવસ્થા કરવામાં આવી રહી છે, જેના કારણે તેમને કોર્ટના શરણે જવાની ફરજ પડી હતી.
બંધારણીય જોગવાઈ અને ઐતિહાસિક સંદર્ભ
આ ચુકાદો આપતી વખતે ન્યાયાધીશોએ ભારતીય બંધારણની કલમ 48 (Article 48) નો વિશેષ ઉલ્લેખ કર્યો હતો. કોર્ટે નોંધ્યું કે બંધારણ મુજબ, રાજ્યની એ જવાબદારી છે કે તે ગાય, વાછરડાઓ અને અન્ય દુધાળા તેમજ ખેતી અને ભારવહન કામમાં આવતા પશુઓના સંરક્ષણ માટે યોગ્ય પગલાં ભરે.
હાઈકોર્ટે વધુમાં જણાવ્યું કે, બંધારણ સભાની ચર્ચામાં ગાયને પૂજનીય પશુ માનવામાં આવી હતી અને તે ભગવાન કૃષ્ણના સમયથી જ ભારતીય સંસ્કૃતિ અને સભ્યતા સાથે જોડાયેલી છે. ન્યાયાધીશોએ એ ઐતિહાસિક તથ્યનો પણ ઉલ્લેખ કર્યો કે ભૂતકાળમાં અનેક મુસ્લિમ રાજાઓના શાસનકાળ દરમિયાન પણ ગાયોની કતલ પર પ્રતિબંધ મૂકવામાં આવ્યો હતો.