Kulgam Terror Attack: દક્ષિણ કાશ્મીરના કુલગામમાં શુક્રવારની રાત્રે લશ્કર-એ-તૈયબાના આતંકી લતીફ ભટ્ટે માનવતા અને વિશ્વાસની હત્યા કરી છે. તેણે છત્તીસગઢથી રોજીરોટી કમાવવા આવેલા બે નિર્દોષ શ્રમિકોની ગોળી મારીને હત્યા કરી દીધી છે. આ ઘટનાએ ફરી એકવાર કાશ્મીરમાં આતંકીઓના ક્રૂર ચહેરાને દુનિયા સામે ખુલ્લો પાડ્યો છે.
પહેલા વિશ્વાસ જીત્યો, પછી કર્યો વિશ્વાસઘાત
મળતી માહિતી મુજબ, આતંકી લતીફ ભટ્ટ ઈંટના ભઠ્ઠા પર કામ કરતા શ્રમિકોની વચ્ચે જઈને લગભગ 15-20 મિનિટ સુધી બેઠો હતો. તેણે શ્રમિકો સાથે સામાન્ય વાતચીત કરી, તેમના નામ પૂછ્યા અને તેમને એવો વિશ્વાસ અપાવ્યો કે તે તેમને કોઈ નુકસાન પહોંચાડશે નહીં. તેની પાસે એક કાળો બેગ હતો, જેમાં તેણે એસોલ્ટ રાઈફલ છુપાવી રાખી હતી.
પાણી માંગ્યું અને પછી ગોળીઓ ચલાવી દીધી
જ્યારે શ્રમિકોને આતંકી પર પૂરો ભરોસો થઈ ગયો, ત્યારે તેણે પોતાનો અસલી ચહેરો બતાવ્યો. આતંકીએ ત્યાંથી જતી વખતે જણાવ્યું કે તેને તરસ લાગી છે. જેવી એક શ્રમિકની પત્ની તેના માટે પાણી લેવા ગઈ, તરત જ તેણે પોતાની રાઈફલ કાઢીને બંને શ્રમિકો પર અત્યંત નજીકથી ગોળીઓ ચલાવી દીધી.
હૃદયદ્રાવક વાત એ છે કે જ્યારે આ હત્યાકાંડ આચરવામાં આવ્યો, ત્યારે ત્યાં માત્ર દોઢ થી બે વર્ષનું એક નાનું બાળક પણ હાજર હતું. હત્યા કર્યા બાદ આતંકી લતીફ ભટ્ટ તેના અન્ય એક સાથીદાર સાથે ત્યાંથી ફરાર થઈ ગયો હતો.
ભય અને વિભાજનની નવી આતંકી રણનીતિ
આ ઘટના અગાઉ પહેલગામમાં પણ આ જ રીતે પ્રવાસીઓના નામ અને ધર્મ પૂછીને તેમની હત્યા કરવામાં આવી હતી. આ બંને ઘટના વચ્ચેની સમાનતા દર્શાવે છે કે આતંકી સંગઠનો હવે માત્ર હત્યા કરવા પૂરતા સીમિત નથી, પરંતુ તેઓ સમાજમાં ભય, વિભાજન અને સાંપ્રદાયિક તણાવ પેદા કરવાની એક સુનિયોજિત રણનીતિ પર કામ કરી રહ્યા છે.