Dharmendra Pradhan: NEET પેપર લીક મામલે દેશભરમાં થયેલા ભારે વિરોધ પ્રદર્શનો વચ્ચે કેન્દ્રીય શિક્ષણ મંત્રી પદેથી રાજીનામું આપ્યાના બરાબર બે અઠવાડિયા પછી ભાજપના જ્યેષ્ઠ નેતા અને સંબલપુરના સાંસદ ધર્મેન્દ્ર પ્રધાને આખરે પોતાનું મૌન તોડ્યું છે. ભુવનેશ્વર સ્થિત GM યુનિવર્સિટી ખાતે વિદ્યાર્થીઓ અને ફેકલ્ટીઓને સંબોધતા ધર્મેન્દ્ર પ્રધાને જણાવ્યું હતું કે, આ આંદોલન દરમિયાન Gen Z ને કેટલાક લોકો દ્વારા ગેરમાર્ગે દોરવાનો પ્રયાસ કરવામાં આવ્યો હતો. દિલ્હીના જંતર-મંતર ખાતે સતત વધતા વિરોધ વચ્ચે તેમણે 25 જુલાઈના રોજ પોતાના પદ પરથી રાજીનામું આપી દીધું હતું.
‘મારા માટે પદ નહીં, દેશના 20 કરોડ બાળકોનું ભવિષ્ય મહત્ત્વનું’: ધર્મેન્દ્ર પ્રધાન
પોતાના રાજીનામા પાછળનું કારણ સ્પષ્ટ કરતાં ધર્મેન્દ્ર પ્રધાને જણાવ્યું હતું કે, "જનરલ ઝેડ આપણા જ બાળકો છે, પરંતુ કેટલાક લોકોએ તેમને ભડકાવવાનો અને ગેરમાર્ગે દોરવાનો પ્રયાસ કર્યો. આ મારા માટે કોઈ વ્યક્તિગત પ્રતિષ્ઠાનો મુદ્દો નહોતો." તેમણે દેશના ડેમોગ્રાફિક ડિવિડન્ડનો ઉલ્લેખ કરતાં ઉમેર્યું કે, "ભારતમાં દર વર્ષે આશરે 2 કરોડ બાળકો જન્મે છે અને છેલ્લા 10 વર્ષમાં 20 કરોડ બાળકોનો જન્મ થયો છે. આ યુવાનો પોતાની ઊંચી આકાંક્ષાઓ ધરાવે છે અને તેઓ જ ભારતને 'વિશ્વ ગુરુ' બનાવશે. મારા માટે શિક્ષણ મંત્રીનું પદ એટલું મહત્ત્વનું નહોતું." તેમણે જાહેરાત કરી હતી કે વિરોધ વધતાં તેમણે પોતે વડાપ્રધાન નરેન્દ્ર મોદીનો સંપર્ક કરીને કેન્દ્રીય મંત્રી પરિષદમાંથી રાજીનામું આપવાની પેશકશ કરી હતી.
નવીન પટનાયક પર આકરા પ્રહારો
યુનિવર્સિટીના કાર્યક્રમ બાદ રાયરાખોલમાં આયોજિત એક સભામાં ધર્મેન્દ્ર પ્રધાને ઓડિશાના ભૂતપૂર્વ મુખ્યમંત્રી અને બીજેડી (BJD) પ્રમુખ નવીન પટનાયક સામે આકરા પ્રહારો કર્યા હતા. એરપોર્ટ નજીક BJD યુવા અને વિદ્યાર્થી પાંખ દ્વારા કરવામાં આવેલા વિરોધ પ્રદર્શન અને 'ધર્મેન્દ્ર પ્રધાન પાછા જાઓ' ના નારાઓનો જવાબ આપતાં તેમણે કહ્યું, "હું એક સામાન્ય ખેડૂતનો પુત્ર છું. જો તમે મને પાછા જવાનું કહો તો પણ હું ઓડિશાના લોકોની સેવા કરવા પાછો આવીશ."
પ્રધાને બીજેડી પ્રમુખ પર વિરોધ પ્રદર્શનોમાં યુવાનોનો દુરુપયોગ કરવાનો આરોપ લગાવતા કહ્યું કે, "નવીન બાબુ મને ઓડિશાના લોકો માટે શરમજનક વ્યક્તિ ગણાવે છે, પરંતુ હું પૂછવા માંગુ છું કે શું મેં ક્યારેય એવું કોઈ કામ કર્યું છે જેનાથી ઓડિશાના નાગરિકોએ શરમ અનુભવવી પડે? હું ભલે રાજ્યને મોટું ગૌરવ ન અપાવી શકું, પણ મેં ક્યારેય મારા કાર્યોથી રાજ્યને બદનામ થવા દીધું નથી."
રાજકીય મંચ પરથી વિરોધ પક્ષને પણ આપ્યો સણસણતો જવાબ
ધર્મેન્દ્ર પ્રધાને યાદ અપાવ્યું હતું કે તેઓ 12 વર્ષ પહેલાં ભગવાન જગન્નાથ અને સમલેશ્વરી માતાના આશીર્વાદથી કેન્દ્રીય મંત્રી બન્યા હતા. વિશેષ વાત એ હતી કે, તેમણે બીજેડી વિરૂદ્ધ આ નિવેદનો એવા મંચ પરથી આપ્યા હતા જ્યાં ઓડિશા વિધાનસભાના નાયબ નેતા અને BJD ધારાસભ્ય પ્રસન્ના આચાર્ય પણ હાજર હતા. પ્રધાને ખુલાસો કર્યો હતો કે, વિરોધ છતાં તેઓ પ્રસન્ના આચાર્ય સાથે સલાહ-મશવરો કરીને અને તેમની ખાતરી મળ્યા બાદ જ આ કાર્યક્રમમાં ઉપસ્થિત રહ્યા હતા.