Air India Bomb Threat: જર્મનીના ફ્રેન્કફર્ટથી નવી દિલ્હી આવી રહેલી એર ઈન્ડિયાની આંતરરાષ્ટ્રીય ફ્લાઈટને બોમ્બથી ઉડાવી દેવાની ધમકી મળતાં જ એરપોર્ટ વિમાન મથકો પર ભારે અફરાતફરીનો માહોલ સર્જાયો હતો. સુરક્ષા અને મુસાફરોના જીવના જોખમને ધ્યાનમાં રાખીને વિમાનના ચાલક દળે તાત્કાલિક સાવચેતીના પગલાં લીધા હતા અને ફ્લાઈટનો માર્ગ બદલીને તેને રાજસ્થાનના જયપુર એરપોર્ટ તરફ ડાયવર્ટ કરવામાં આવી હતી, જ્યાં વિમાને સફળતાપૂર્વક ઈમરજન્સી લેન્ડિંગ કર્યું હતું.
સઘન તપાસ શરૂ
સમાચાર એજન્સી PTI ના અહેવાલ અનુસાર, ફ્લાઈટમાં બોમ્બ હોવાની આશંકા સબબ ધમકી મળતા જ જયપુર એરપોર્ટ ઓથોરિટી અને સુરક્ષા એજન્સીઓને હાઈ એલર્ટ પર મૂકી દેવામાં આવી હતી. ઈમરજન્સી લેન્ડિંગ બાદ તુરંત જ વિમાનને એરપોર્ટના મુખ્ય રનવેથી દૂર એક સુરક્ષિત આઈસોલેશન બે ખાતે લઈ જવામાં આવ્યું હતું.
તમામ મુસાફરો અને ક્રૂ મેમ્બર્સને સુરક્ષિત રીતે બહાર કાઢવામાં આવ્યા બાદ બોમ્બ ડિસ્પોઝલ સ્કવોડ (BDS), સેન્ટ્રલ ઈન્ડસ્ટ્રિયલ સિક્યુરિટી ફોર્સ (CISF) અને સ્થાનિક પોલીસ દ્વારા વિમાન તેમજ મુસાફરોના સામાનની ઝીણવટભરી અને ટેકનિકલ તપાસ હાથ ધરવામાં આવી રહી છે.
મુસાફરોની સુરક્ષા પ્રથમ પ્રાથમિકતા
સુરક્ષા એજન્સીઓના જણાવ્યા મુજબ, વિમાનમાં બોમ્બ હોવાની ધમકી ક્યાંથી અને કઈ રીતે મોકલવામાં આવી હતી તે અંગે સાયબર સેલ અને ગુપ્તચર એજન્સીઓ તપાસ કરી રહી છે. હાલ સુધી કોઈ શંકાસ્પદ વસ્તુ મળી આવી નથી, પરંતુ તપાસ પૂર્ણ ન થાય ત્યાં સુધી ફ્લાઈટને આગળની મુસાફરી માટે મંજૂરી આપવામાં આવશે નહીં. મુસાફરો માટે એરપોર્ટ પર જરૂરી સુવિધાઓની વ્યવસ્થા કરવામાં આવી છે. સમગ્ર ઘટના અંગે વધુ વિગતોની રાહ જોવાઈ રહી છે.