Palak Soup recipe: શિયાળાની ઠંડીમાં ગરમાગરમ સૂપ પીવાની મજા જ કંઈક અલગ હોય છે. ખાસ કરીને લીલા પાનવાળી પાલકમાંથી બનાવેલું સૂપ સ્વાદિષ્ટ હોવાની સાથે પોષક તત્ત્વો પણ આપે છે. જો તમને રોજ એક જ પ્રકારનું સૂપ પીવાનો કંટાળો આવે છે, તો આ વખતે ઘરે પાલક સૂપ બનાવી શકો છો. તેને બનાવવામાં વધારે સમય પણ લાગતો નથી અને ઘરના નાના-મોટા દરેકને પીરસી શકાય છે.
પાલક સૂપ બનાવવા માટેની સામગ્રી
આ પણ વાંચો
- પાલક – 2 કપ
- ડુંગળી – 1 નાની
- ટામેટું – 1 નાનું
- લસણ – 4થી 5 કળી
- આદુ – 1 નાનો ટુકડો
- લીલું મરચું – 1
- માખણ – 1 ચમચી
- કાળા મરીનો પાઉડર – અડધી ચમચી
- જીરું – અડધી ચમચી
- મીઠું – સ્વાદ પ્રમાણે
- પાણી – જરૂર મુજબ
- દૂધ અથવા ફ્રેશ ક્રીમ – 2 ચમચી
- લીંબુનો રસ – 1 ચમચી
પાલક સૂપ બનાવવાની રીત
સૌથી પહેલાં પાલકનાં પાનને ડાળીથી અલગ કરીને 2થી 3 વાર સ્વચ્છ પાણીથી ધોઈ લો. પાલકમાં માટી કે કચરો રહી ન જાય તેનું ખાસ ધ્યાન રાખવું. હવે એક વાસણમાં પાણી ગરમ કરવા મૂકો. પાણી ગરમ થાય એટલે તેમાં પાલકનાં પાન નાખીને 2થી 3 મિનિટ બ્લાન્ચ કરો. ત્યારબાદ પાલકને તરત જ ઠંડા પાણીમાં કાઢી લો, જેથી તેનો લીલો રંગ જળવાઈ રહે.
હવે એક કડાઈમાં માખણ ગરમ કરો. તેમાં જીરું ઉમેરો અને તે તતડવા લાગે એટલે બારીક સમારેલું લસણ, આદુ અને લીલું મરચું નાખીને સાંતળો. ત્યારબાદ તેમાં સમારેલી ડુંગળી ઉમેરીને થોડી પારદર્શક થાય ત્યાં સુધી પકાવો. હવે ટામેટાંના ટુકડા નાખીને તે નરમ થાય ત્યાં સુધી થોડીવાર ચડવા દો.
હવે બ્લાન્ચ કરેલી પાલકને આ મિશ્રણમાં ઉમેરો. તેમાં થોડું મીઠું અને જરૂર મુજબ પાણી નાખીને 3થી 4 મિનિટ સુધી ઉકાળો. ત્યારબાદ ગેસ બંધ કરીને મિશ્રણને થોડું ઠંડું થવા દો. હવે તેને મિક્સર જારમાં નાખીને એકદમ સ્મૂધ પેસ્ટ બનાવી લો. જો તમને સૂપ એકદમ રેશમી અને સ્મૂધ પસંદ હોય તો પેસ્ટને ગાળી પણ શકો છો.
હવે તૈયાર કરેલી પાલકની પેસ્ટને ફરીથી કડાઈમાં નાખો. તેમાં જરૂર મુજબ પાણી ઉમેરીને સૂપની ઘટ્ટતા તમારી પસંદ પ્રમાણે રાખો. ત્યારબાદ તેમાં કાળા મરીનો પાઉડર અને સ્વાદ પ્રમાણે મીઠું ઉમેરો. ધીમા તાપે 3થી 5 મિનિટ સુધી ઉકાળો. અંતમાં તેમાં દૂધ અથવા ફ્રેશ ક્રીમ ઉમેરીને બરાબર મિક્સ કરો. ગેસ બંધ કર્યા પછી થોડો લીંબુનો રસ ઉમેરો.
તૈયાર છે તમારું ગરમાગરમ અને સ્વાદિષ્ટ પાલક સૂપ. તેને સૂપ બાઉલમાં કાઢીને ઉપરથી થોડું ફ્રેશ ક્રીમ અને કાળા મરીનો પાઉડર છાંટીને સર્વ કરો. સાથે બ્રેડ ક્રૂટોન્સ અથવા ગાર્લિક બ્રેડ આપશો તો તેનો સ્વાદ વધુ વધી જશે.
પાલક સૂપ બનાવતી વખતે આ વાતોનું ધ્યાન રાખો
પાલકને વધારે સમય સુધી ઉકાળશો નહીં, નહીં તો તેનો લીલો રંગ અને સ્વાદ બદલાઈ શકે છે. સૂપમાં ક્રીમ ઉમેરવી ફરજિયાત નથી, તમે તેને ટાળીને પણ બનાવી શકો છો. સૂપ વધારે ઘટ્ટ થઈ જાય તો થોડું ગરમ પાણી ઉમેરી શકો છો.