Cleaning Hacks: ઘરની સફાઈ કરતી વખતે ફ્લોર, ટેબલ અને અન્ય વસ્તુઓ તો સરળતાથી સાફ થઈ જાય છે, પરંતુ બેડ અને સોફાની નીચેની સફાઈ ઘણીવાર રહી જાય છે. ભારે ફર્નિચર વારંવાર ખસેડવું મુશ્કેલ હોવાથી અહીં ધૂળ, માટી અને વાળ જમા થતા રહે છે. જો તમારા ઘરમાં પણ બેડ કે સોફા નીચે આવી ગંદકી જમા થઈ ગઈ છે, તો ફર્નિચર ખસેડવાની જરૂર નથી. કેટલીક સરળ Cleaning Hacksની મદદથી તમે આ મુશ્કેલ જગ્યાઓની સફાઈ સરળતાથી કરી શકો છો.
ઘરની સફાઈ કરતી વખતે માત્ર દેખાતી જગ્યાઓ જ નહીં, પરંતુ ફર્નિચરની નીચેનો ભાગ પણ સાફ કરવો જરૂરી છે. બેડ અને સોફા નીચે લાંબા સમય સુધી ધૂળ જમા રહે તો ત્યાં વાળ અને નાના કચરાના કણો પણ એકઠા થઈ શકે છે. જોકે યોગ્ય સાધનોની મદદથી આ જગ્યાઓને સાફ કરવી મુશ્કેલ નથી.
મોટા ભાગની ધૂળ માટે ફ્લેટ માઇક્રોફાઇબર મોપ
બેડ કે સોફાની નીચેનો ભાગ મોટો હોય અને હાથ સરળતાથી ન પહોંચી શકે તો ફ્લેટ માઇક્રોફાઇબર મોપ ખૂબ ઉપયોગી સાબિત થાય છે. મોપને ફર્નિચરની નીચે અંદર સુધી લઈ જઈને જમા થયેલી ધૂળ અને વાળ બહાર કાઢી શકાય છે. શરૂઆતમાં સૂકા મોપથી સફાઈ કરો અને ત્યારબાદ જરૂર હોય તો ભીના મોપથી ફ્લોર સાફ કરો.
પહેલા સૂકી ધૂળ અને વાળ દૂર કરો
જો બેડ કે સોફાની નીચે વધારે ધૂળ અને વાળ જમા થયા હોય તો સીધો ભીનો પોચો ન લગાવવો. પાણીના સંપર્કમાં આવતા ધૂળ અને માટી ફ્લોર પર ચોંટી શકે છે. તેથી પહેલાં લાંબા કપડા, ડસ્ટર અથવા સૂકા માઇક્રોફાઇબર મોપની મદદથી ધૂળ બહાર કાઢી લો અને પછી ફ્લોર સાફ કરો.
વેક્યૂમ ક્લીનરથી ખૂણાની સફાઈ
ઘરમાં વેક્યૂમ ક્લીનર હોય તો બેડ અને સોફા નીચેની સફાઈ વધુ સરળ બની જાય છે. ખાસ કરીને વેક્યૂમનું પાતળું Crevice Attachment સાંકડા ભાગો અને ખૂણામાં સરળતાથી પહોંચી શકે છે. તેની મદદથી જમા થયેલી ધૂળ, વાળ અને નાના કચરાના કણોને સરળતાથી દૂર કરી શકાય છે.
પાતળા માઇક્રોફાઇબર ડસ્ટરનો ઉપયોગ કરો
બેડ કે સોફાની નીચેના એવા ખૂણા જ્યાં મોપ પહોંચી શકતો નથી ત્યાં પાતળા માઇક્રોફાઇબર ડસ્ટરનો ઉપયોગ કરી શકાય છે. માઇક્રોફાઇબરના રેશા ધૂળ અને વાળને પકડી રાખવામાં મદદ કરે છે. ડસ્ટર પર વધારે ધૂળ જમા થઈ જાય તો તેને વચ્ચે-વચ્ચે સાફ કરતા રહેવું, જેથી ધૂળ ફરી ફ્લોર પર ન પડે.
સફાઈ કરતી વખતે આ બાબતોનું ધ્યાન રાખો
બેડ અને સોફા નીચે સફાઈ કરતી વખતે પહેલાં સૂકી ધૂળ અને વાળ દૂર કરવા જોઈએ. ત્યારબાદ જ ભીના મોપ અથવા કપડાનો ઉપયોગ કરવો. જો ફ્લોર લાકડાનો હોય તો વધારે પાણીનો ઉપયોગ ન કરવો અને સફાઈ કર્યા બાદ ફ્લોરને સારી રીતે સૂકવવો. નિયમિત સફાઈ કરવાથી ફર્નિચરની નીચે ધૂળના મોટા ગૂંચળા જમા થતા અટકાવી શકાય છે.