Gut Health Recovery: ઉનાળાની ઋતુમાં ઘણા લોકો પરિવાર અને મિત્રો સાથે પર્વતો અથવા મનપસંદ સ્થળોએ ફરવા જવાનું આયોજન કરે છે. મુસાફરી કરવાથી માનસિક તણાવ ઓછો થાય છે અને તાજગી મળે છે, પરંતુ વેકેશન પરથી પાછા ફર્યા પછી ઘણા લોકોને પેટ સંબંધિત સમસ્યાઓ જેમ કે પેટનું ફૂલવું, એસિડિટી, કબજિયાત અથવા પેટમાં જકડાઈ જવાનો સામનો કરવો પડે છે. ગેસ્ટ્રોએન્ટેરોલોજી કન્સલ્ટન્ટ ડૉ. સચિન એચ.જે. જણાવે છે કે મુસાફરી દરમિયાન ખોરાક અને જીવનશૈલીમાં અચાનક આવતો બદલાવ આ સમસ્યાઓનું મુખ્ય કારણ છે.
વેકેશન પછી પાચન સમસ્યાઓ કેમ થાય છે?
- રજાઓ દરમિયાન લોકો અવારનવાર ભારે, તીખો, તેલયુક્ત અને પ્રોસેસ્ડ ખોરાક ખાય છે. ઠંડા પીણાં, મીઠાઈઓ અને સ્ટ્રીટ ફૂડનું વધુ પડતું સેવન પાચનતંત્રને બગાડે છે.
- તેમજ મુસાફરીમાં ઘણીવાર ભોજનનો સમય ફિક્સ નથી હોતો અથવા લોકો જમવાનું છોડી દે છે. આ અનિયમિતતા થોડા દિવસોમાં એસિડિટી અને કબજિયાત વધારે છે.
- બસ, ટ્રેન કે ફ્લાઇટમાં કલાકો સુધી બેસી રહેવાને કારણે શારીરિક હલનચલન ઓછી થાય છે, જેનાથી મેટાબોલિઝમ ધીમું પડી જાય છે.
- મોડે સુધી બહાર રહેવાથી શરીરનું ઊંઘ-જાગવાનું ચક્ર ખોરવાય છે, જેની સીધી નકારાત્મક અસર પાચન પર પડે છે.
પાચન સુધારવા માટે આહારમાં કરો આ જરૂરી ફેરફાર
સંતુલિત અને હળવો આહાર
ઘરે પાછા ફરતા જ તરત ભારે ખોરાક ખાવાને બદલે હળવો આહાર લો. દાળ, ખીચડી અને બાફેલા શાકભાજી જેવા સુપાચ્ય ખોરાકનું સેવન કરો. આનાથી પાચનતંત્ર પરનો ભાર ઘટશે.
પ્રોબાયોટિક્સનું સેવન વધારો
આંતરડામાં સારા બેક્ટેરિયા વધારવા માટે પ્રોબાયોટિક ખૂબ જ જરૂરી છે. આ માટે ડાયેટમાં દહીં, છાશ, ઈડલી કે ઘરે બનાવેલા આથોવાળા ખોરાકનો સમાવેશ કરો. તે ગેસ અને પેટ ફૂલવાની સમસ્યામાં રાહત આપે છે.
પૂરતું હાઇડ્રેશન
શરીરમાંથી ઝેરી તત્વો બહાર કાઢવા અને આંતરડાની મૂવમેન્ટ યોગ્ય રાખવા માટે પુષ્કળ પાણી પીવો. હૂંફાળું પાણી, હર્બલ ટી અને નાળિયેર પાણી ઉત્તમ વિકલ્પો છે. આ સમયે કેફીન અને સોડાવાળા ઠંડા પીણાંથી દૂર રહો.
ફાઇબરયુક્ત ખોરાક
કબજિયાત રોકવા માટે તમારા આહારમાં ફાઇબરનું પ્રમાણ વધારો. સલાડ, પપૈયું, સફરજન, આખા અનાજ અને ફણગાવેલા કઠોળ ખાવાથી પાચનક્રિયા ઝડપી બને છે.
આદુ, વરિયાળી અને ફુદીનાનો ઉપયોગ
જો પેટમાં અસ્વસ્થતા લાગતી હોય તો દિવસમાં બે વાર આદુ, વરિયાળી અને ફુદીનામાંથી બનાવેલી હર્બલ ચા પીવો. આ દેશી ઉપાય પેટના દુખાવા અને ભારેપણુંને દૂર કરવામાં મદદ કરે છે.
મહત્વની સલાહ
રજાઓ પછી થોડા દિવસ સુધી આલ્કોહોલ, દૂધવાળી ચા અને પેકેજ્ડ ફૂડ બિલકુલ ન લો. જો પેટની સમસ્યા 2 થી 3 દિવસથી વધુ સમય સુધી ચાલુ રહે, તો વિલંબ કર્યા વિના ડૉક્ટરની સલાહ લેવી હિતાવહ છે.