Green Chana Curry Recipe: શિયાળાની શરૂઆત થતાં જ બજારમાં તાજા લીલા ચણા મળવા લાગે છે. લીલા ચણામાંથી અનેક પ્રકારની વાનગીઓ બનાવી શકાય છે, પરંતુ તેનું રસાવાળું શાક ખાવાની મજા જ અલગ છે. ગરમાગરમ રોટલી, ભાખરી કે બાજરીના રોટલા સાથે આ શાક પીરસવામાં આવે તો ભોજનનો સ્વાદ બમણો થઈ જાય છે. જો તમે પણ રોજ એકસરખું શાક ખાઈને કંટાળી ગયા હોવ તો આ વખતે ઘરે ગુજરાતી સ્ટાઇલમાં લીલા ચણાનું રસાવાળું શાક જરૂર બનાવજો.
લીલા ચણાનું રસાવાળું શાક બનાવવા માટેની સામગ્રી
- લીલા ચણા – 2 કપ
- બારીક સમારેલી ડુંગળી – 2 નંગ
- સમારેલા ટામેટાં – 2 નંગ
- આદુ-લસણની પેસ્ટ – 1 ચમચી
- લીલા મરચાં – 2 નંગ
- તેલ – 3 ચમચી
- જીરું – અડધી ચમચી
- હિંગ – 1 ચપટી
- હળદર – અડધી ચમચી
- લાલ મરચું પાઉડર – 1 ચમચી
- ધાણાજીરું પાઉડર – 1 ચમચી
- ગરમ મસાલો – અડધી ચમચી
- મીઠું – સ્વાદ અનુસાર
- પાણી – જરૂરિયાત મુજબ
- કોથમીર – બારીક સમારેલી
લીલા ચણાનું રસાવાળું શાક બનાવવાની રીત
સૌથી પહેલાં લીલા ચણાને ફોલીને તેના દાણા અલગ કરી લો. ત્યારબાદ તેને પાણીથી બરાબર ધોઈ લો, જેથી તેમાં રહેલી ધૂળ કે અન્ય કચરો સાફ થઈ જાય. હવે એક કૂકરમાં લીલા ચણા, થોડું મીઠું અને જરૂરિયાત મુજબ પાણી ઉમેરીને 2થી 3 સીટી થાય ત્યાં સુધી બાફી લો. ધ્યાન રાખો કે ચણા વધારે પડતા ગળી ન જાય, જેથી શાકમાં તેનો સ્વાદ અને આકાર બંને જળવાઈ રહે.
હવે એક કડાઈ લો અને તેમાં તેલ ગરમ કરવા મૂકો. તેલ ગરમ થાય એટલે તેમાં જીરું અને હિંગ ઉમેરો. જીરું તતડે એટલે તેમાં બારીક સમારેલી ડુંગળી નાખીને મધ્યમ તાપે સાંતળો. ડુંગળી આછા સોનેરી રંગની થાય ત્યાં સુધી તેને બરાબર પકાવો. ત્યારબાદ તેમાં આદુ-લસણની પેસ્ટ અને સમારેલા લીલા મરચાં ઉમેરીને થોડીવાર સાંતળો, જેથી મસાલાની સુગંધ બહાર આવવા લાગે.
હવે તેમાં સમારેલા ટામેટાં ઉમેરો અને બરાબર મિક્સ કરો. ટામેટાં નરમ થાય ત્યાં સુધી તેને પકાવવાના છે. ત્યારબાદ તેમાં હળદર, લાલ મરચું પાઉડર, ધાણાજીરું પાઉડર અને સ્વાદ અનુસાર મીઠું ઉમેરો. આ બધા મસાલાને ધીમા તાપે તેલ છૂટું પડે ત્યાં સુધી બરાબર સાંતળો. મસાલો જેટલો સરસ શેકાશે એટલો જ શાકનો સ્વાદ પણ વધારે સરસ આવશે.
હવે તૈયાર કરેલા મસાલામાં બાફેલા લીલા ચણા ઉમેરીને હળવા હાથે મિક્સ કરો. ચણા મસાલા સાથે બરાબર ભળી જાય તે માટે તેને 2થી 3 મિનિટ સુધી ધીમા તાપે ચડવા દો. ત્યારબાદ તેમાં જરૂરિયાત મુજબ પાણી ઉમેરો. જો તમને ઘટ્ટ રસાવાળું શાક પસંદ હોય તો પાણી થોડું ઓછું રાખો અને પાતળો રસો જોઈતો હોય તો પાણીનું પ્રમાણ થોડું વધારી શકો છો.
હવે કડાઈને ઢાંકણથી ઢાંકી દો અને શાકને ધીમા તાપે 7થી 10 મિનિટ સુધી પકાવો. વચ્ચે એકવાર ચમચાથી હળવા હાથે હલાવી લેવું, જેથી મસાલો તળિયે ચોંટી ન જાય. શાક બરાબર ઉકળી જાય અને રસો ઘટ્ટ થવા લાગે ત્યારે તેમાં ગરમ મસાલો અને બારીક સમારેલી કોથમીર ઉમેરો. છેલ્લે એકવાર બરાબર મિક્સ કરીને ગેસ બંધ કરી દો. ગરમાગરમ લીલા ચણાનું રસાવાળું શાક તૈયાર છે!
આ સ્વાદિષ્ટ શાકને ગરમાગરમ રોટલી, બાજરીના રોટલા, ભાખરી કે જીરા રાઈસ સાથે પીરસી શકો છો. શિયાળાની ઠંડીમાં આ મસાલેદાર અને ચટાકેદાર શાક પરિવારના દરેક સભ્યને ભાવશે.