Farali Dhokla Recipe In Gujarati | ફરાળી ઢોકળા બનાવવાની રીત | ફરાળી ઢોકળા ની રેસીપી: ઉપવાસમાં ખવાય તેવા ફરાળી ઢોકળા કેવી રીતે બનાવવા તેની રેસિપી ગુજરાતી જાગરણ તમને અહીં જણાવશે. ફરફેક્ટ માપ સાથે આ ફરાળી ઢોકળા એકદમ સોફ્ટ બનશે. તો ચાલો બનાવીએ ફરાળી ઢોકળા. આ ઢોકળા ખૂબ જ સ્વાદિષ્ટ લાગશે અને ઝટપટ બની જાય છે. તમે તેને શીંગદાણાની ચટણી સાથે ખાશો તો ખાવાની ખૂબ જ મજા આવશે.
સામગ્રી :
- ઢોકળાના ખીરા માટે:
- 1 કપ મોરૈયો
- 1/3 કપ સાબુદાણા
- 1/3 કપ દહીં
- 1 કપ પાણી (જરૂર મુજબ)
- 3 ચમચી તેલ
- 1 મોટી ચમચી આદુ-મરચાની પેસ્ટ
- 1 ચમચી મીઠું (સ્વાદ મુજબ)
- 1 પેકેટ ઇનો (અથવા 1/2 ચમચી ખાવાનો સોડા)
- થોડું લાલ મરચું પાવડર (ઉપર છાંટવા માટે)
- વઘાર માટે:
- 2 મોટી ચમચી તેલ
- 1 ચમચી જીરું
- થોડા લીલા મરચાં
- થોડા મીઠા લીમડાના પાન
- લીલા ધાણા
- ફરાળી ચટણી માટે:
- 3 મોટી ચમચી શીંગદાણા
- 1/2 કેપ્સિકમ
- 2 લીલા મરચાં
- થોડા મીઠા લીમડાના પાન
- 1 મોટી ચમચી કોપરાનું છીણ
- 1/2 કપ દહીં
- 1 ચમચી મીઠું (સ્વાદ મુજબ)
- 2 મોટી ચમચી પાણી
બનાવવાની રીત (Method):
- 1). ઢોકળાનું ખીરું બનાવવાની રીત:
- સૌ પ્રથમ, 1 કપ મોરૈયાને કોરા કપડાથી બરાબર સાફ કરી લો જેથી તેમાં કોઈ કચરો ન રહે.
- હવે તેને મિક્સર જારમાં લઈ થોડો કકરો (જાડો) રહે તે રીતે દળી લો. જો લોટ વધુ ઝીણો હશે તો ઢોકળા કઠણ થઈ શકે છે. આ લોટને એક મોટા બાઉલમાં કાઢી લો.
- તે જ રીતે, 1/3 કપ સાબુદાણાને પણ મિક્સરમાં થોડા કકરા દળી લો, તેનો પણ સાવ ઝીણો પાઉડર નથી કરવાનો.
- આ સાબુદાણાના લોટને મોરૈયાના લોટમાં મિક્સ કરી દો.
- હવે તેમાં 1/3 કપ દહીં અને 3 ચમચી તેલ ઉમેરો.
- ત્યારબાદ, ધીમે ધીમે પાણી ઉમેરતા જાઓ અને મિશ્રણને હલાવતા રહો જેથી તેમાં ગાંઠા ન પડે.
- આ ખીરાને ઢાંકીને 2 કલાક માટે પલળવા માટે મૂકી દો. આમ કરવું ખૂબ જરૂરી છે, જેથી સાબુદાણા અને લોટ નરમ થઈ જાય અને ઢોકળા એકદમ સોફ્ટ બને.
2). ફરાળી ચટણી બનાવવાની રીત:
- ઢોકળાનું ખીરું પલળે ત્યાં સુધી, મિક્સર જારમાં 3 મોટી ચમચી શીંગદાણા, 1/2 સમારેલું કેપ્સિકમ, 2 લીલા મરચાં, મીઠા લીમડાના પાન, 1 મોટી ચમચી કોપરાનું છીણ અને 1/2 કપ દહીં લો.
- તેમાં સ્વાદ મુજબ 1 ચમચી મીઠું ઉમેરો.
- બધું બરાબર ગ્રાઈન્ડ કરી લો. જો ચટણી જાડી લાગે તો તેમાં 2 મોટી ચમચી પાણી ઉમેરીને ફરીથી ગ્રાઈન્ડ કરી લો.
- આ ઇન્સ્ટન્ટ ફરાળી ચટણી ઢોકળા સાથે ખૂબ જ સ્વાદિષ્ટ લાગે છે.
3). ઢોકળા બનાવવા (વરાળમાં બાફવા) ની રીત:
- એક સ્ટીમરમાં પાણી ગરમ કરવા મૂકી દો.
- ઢોકળા બનાવવાની પ્લેટને તેલથી સારી રીતે ગ્રીસ કરી લો, જેથી ઢોકળા સરળતાથી નીકળી જાય.
- 2 કલાક પછી, તૈયાર થયેલા ખીરામાં 1 મોટી ચમચી આદુ-મરચાની પેસ્ટ અને સ્વાદ મુજબ 1 ચમચી મીઠું ઉમેરીને બરાબર મિક્સ કરો.
- ખાસ નોંધ: જ્યારે સ્ટીમરનું પાણી બરાબર ગરમ થઈ જાય, ત્યારે જ ખીરામાં 1 પેકેટ ઇનો ઉમેરો. જો ઇનો ન હોય તો તમે 1/2 ચમચી ખાવાનો સોડા પણ ઉમેરી શકો છો.
- ઇનો ઉમેરીને ખીરાને બરાબર મિક્સ કરી લો જેથી તે બધી જગ્યાએ સારી રીતે ભળી જાય.
- આ ખીરાને તરત જ ગ્રીસ કરેલી પ્લેટમાં પાતળું લેયર બને એ રીતે પાથરી દો. તેની ઉપર થોડું લાલ મરચું પાવડર છાંટો.
- પ્લેટને તરત જ ગરમ સ્ટીમરમાં મૂકી દો અને 20-25 મિનિટ માટે વરાળમાં બાફવા દો.
- 20 મિનિટ પછી, ઢોકળામાં ચપ્પુ નાખીને તપાસો. જો ચપ્પુ સાફ બહાર આવે તો ઢોકળા તૈયાર છે.
- પ્લેટને સ્ટીમરમાંથી બહાર કાઢીને 10 મિનિટ માટે ઠંડુ થવા દો. આમ કરવાથી ઢોકળાના ટુકડા કાપતી વખતે તૂટી નહીં જાય.
- હવે તેને તમારા મનપસંદ આકારમાં કાપી લો.
4). વઘાર કરવાની રીત:
- એક પેનમાં 2 મોટી ચમચી તેલ ગરમ કરો.
- તેલ ગરમ થાય એટલે તેમાં 1 ચમચી જીરું, સમારેલા લીલા મરચાં અને મીઠા લીમડાના પાન ઉમેરો.
- આ તૈયાર થયેલા વઘારને ઢોકળાના ટુકડા પર રેડી દો.
- જો તમે વ્રતમાં લીલા ધાણા ખાતા હો તો ઉપરથી તેનાથી ગાર્નિશ કરી શકો છો.
- તમારા સુપર સોફ્ટ અને જાળીદાર ફરાળી ઢોકળા તૈયાર છે. તેને ફરાળી ચટણી સાથે સર્વ કરો.