US White House Media Ban: અમેરિકી ડિસ્ટ્રિક્ટ જજ ટીમ કેલીએ રાષ્ટ્રપતિ ડોનાલ્ડ ટ્રમ્પને મોટો આંચકો આપતા CNN, MSNBC અને Politico પર લગાવેલો પ્રતિબંધ હટાવી વ્હાઈટ હાઉસમાં પ્રવેશ બહાલ કરવાનો આદેશ આપ્યો છે. અદાલતે ટ્રમ્પ પ્રશાસનને મીડિયા આઉટલેટ્સના પ્રેસ પાસ તાત્કાલિક પરત કરવા અને અધિકારીઓને 14 દિવસ સુધી બેન લાગુ કરવાથી રોક્યા છે. આ કાનૂની વિવાદ 3 નવેમ્બરના રોજ યોજાનાર US મધ્યસત્ર ચૂંટણીના થોડા અઠવાડિયા પહેલાં જ સામે આવ્યો છે.
અમેરિકન અદાલતનો ટ્રમ્પ પ્રશાસનને આંચકો
અમેરિકી રાષ્ટ્રપતિ ડોનાલ્ડ ટ્રમ્પને મોટો કાનૂની આંચકો લાગ્યો છે. એક યુએસ ડિસ્ટ્રિક્ટ જજે ગુરુવારે સીએનએન (CNN), એમએસએનબીસી (MSNBC) અને પોલિટિકો (Politico) માટે વ્હાઈટ હાઉસમાં પ્રવેશ પુનઃસ્થાપિત કરવાનો આદેશ આપ્યો છે. જજ કેલીએ જણાવ્યું કે, આ ત્રણેય મીડિયા સંસ્થાઓ પર વ્હાઈટ હાઉસે લગાલેવ પ્રતિબંધ શક્યતઃ અસંવૈધાનિક હતો. રાષ્ટ્રપતિ દ્વારા 18 સપ્ટેમ્બરે ઘોષિત કરવામાં આવેલ પ્રતિબંધને પડકારતા ન્યૂઝ સંગઠનોએ દાખલ કરેલા કેસમાં ડિસ્ટ્રિક્ટ જજ ટીમ કેલીએ આ આદેશ જારી કર્યો છે.
રાષ્ટ્રીય સુરક્ષાનો દાવો ફગાવતા જજનું વલણ
જજ કેલીએ ટ્રમ્પ પ્રશાસનને આદેશ આપ્યો કે તેઓ તાત્કાલિક મીડિયા આઉટલેટ્સના પ્રેસ પાસ પરત કરે અને અધિકારીને 14 દિવસ સુધી બેન લાગુ કરવાથી રોકી દીધા છે. અદાલતે સરકારના દાવાને ફગાવી દીધો કે રાષ્ટ્રીય સુરક્ષાની ચિંતાઓને કારણે આ પ્રતિબંધ લગાવવામાં આવ્યો હતો. જજે આદેશમાં જણાવ્યું કે, રેકોર્ડ પર કોઈ તથ્યાત્મક આધાર નથી જે દર્શાવે કે વાદીઓના હાર્ડ પાસ રદ કરવાથી રાષ્ટ્રીય સુરક્ષાનું રક્ષણ થશે અથવા અદાલત દ્વારા પાસ પુનઃસ્થાપિત કરવાથી રાષ્ટ્રીય સુરક્ષા ખતરામાં મુકાઈ જશે.
જજ કેલીએ ઉમેર્યું કે, ખુદ રાષ્ટ્રપતિ ટ્રમ્પે કહ્યું કે આ આઉટલેટ્સ રિપોર્ટિંગમાં કથિત સત્યતાની કમી અને નકારાત્મકતાના કારણે આ પ્રતિબંધ મૂકવામાં આવ્યો હતો. આદેશ બાદ વ્હાઈટ હાઉસ અને આ મીડિયા સંસ્થાઓના પ્રતિનિધિઓ તરફથી કોઈ ટિપ્પણી આવી નહોતી. બુધવારે યોજાયેલી સુનાવણીમાં જજે ડિસ્ટ્રિક્ટ ઓફ કોલંબિયા સર્કિટ માટે યુએસ કોર્ટ ઓફ અપીલ્સના બે જૂના નિર્ણયો ટાંકીને કહ્યું કે, પત્રકારોને પ્રેસ પાસ રદ કરતા પહેલા યોગ્ય પ્રક્રિયાનો અધિકાર મળે છે.
મીડિયાના કાનૂની આક્ષેપો અને બંધારણીય અધિકારો
ન્યૂઝ આઉટલેટ્સના વકીલે અદાલતને જણાવ્યું કે, કોઈ પણ કાનૂની રીતે જરૂરી પૂર્વ સૂચના (નોટિસ) આપ્યા વિના અથવા નિર્ણયને પડકારવાની તક આપ્યા વિના જ તેમના પર પ્રતિબંધ મૂકી દેવામાં આવ્યો હતો. તેમણે વ્હાઇટ હાઉસના આ નિર્ણયને અભૂતપૂર્વ, અન્યાયી અને સખત સજા સમાન ગણાવ્યો હતો. સોમવારે આ ત્રણેય મીડિયા આઉટલેટ્સે વોશિંગ્ટનની ફેડરલ કોર્ટમાં ટ્રમ્પ અને તેમના પ્રશાસનના અન્ય સભ્યો સામે દાવો દાખલ કર્યો હતો.
કેસમાં જણાવ્યું કે, આ પ્રતિબંધ અમેરિકી બંધારણના પ્રથમ સુધારા (First Amendment) હેઠળ મળેલા અભિવ્યક્તિની સ્વતંત્રતા અને પ્રેસની સ્વતંત્રતાના અધિકારો તેમજ યોગ્ય પ્રક્રિયાના અધિકારોનું સીધું ઉલ્લંઘન કરે છે. તેમણે અદાલતમાં એક અસ્થાયી રોક આદેશ (Temporary Restraining Order) ની માંગ કરી, જેથી તેમની કાનૂની પડકાર અરજી પર સુનાવણી થાય ત્યાં સુધી વ્હાઇટ હાઉસમાં તેમની પહોંચ તરત જ પુનઃસ્થાપિત થઈ શકે.
રાષ્ટ્રપતિ ટ્રમ્પનું નિવેદન અને મધ્યસત્ર ચૂંટણીનો સંદર્ભ
બીજી તરફ, ડોનાલ્ડ ટ્રમ્પે સોશિયલ મીડિયા પર દાવો કર્યો કે, આ ત્રણેય આઉટલેટ્સે સતત મનઘડંત વાતો અને અસત્ય લખવું કે રિપોર્ટ ન કરવું જોઈએ. જસ્ટિસ ડિપાર્ટમેન્ટના વકીલોએ રાષ્ટ્રીય સુરક્ષાના આધારે આ પ્રતિબંધને યોગ્ય ઠેરવવાનો પ્રયાસ કર્યો હતો. આ હાઈ-પ્રોફાઈલ કાનૂની લડાઈ 3 નવેમ્બરે યોજાનારી યુએસ મધ્યસત્ર ચૂંટણીના થોડા જ અઠવાડિયા પહેલાં શરૂ થઈ છે. આ ચૂંટણીમાં ટ્રમ્પની રિપબ્લિકન પાર્ટીના નેતાઓ યુએસ કોંગ્રેસ પર પોતાનું નિયંત્રણ જાળવી રાખવા માટે ભારે સંઘર્ષ કરી રહ્યા છે.