Donald Trump India Visit: ભારતમાં અમેરિકાના રાજદૂત તરીકે નિયુક્ત થયેલા સર્જિયો ગોરે સંકેત આપ્યો છે કે અમેરિકી રાષ્ટ્રપતિ ડોનાલ્ડ ટ્રમ્પ આવતા વર્ષે (2027માં) ભારતની મુલાકાત લઈ શકે છે. સર્જિયો ગોરે વડાપ્રધાન નરેન્દ્ર મોદી અને ડોનાલ્ડ ટ્રમ્પ વચ્ચેના સંબંધોને સાચી મિત્રતા ગણાવી છે. તેમણે વધુમાં જણાવ્યું કે બંને નેતાઓ વચ્ચે ઊંડો ભરોસો અને સન્માન છે અને પીએમ મોદી ટ્રમ્પના અત્યંત પ્રિય મિત્ર છે. ગોરે એમ પણ ઉમેર્યું કે મિત્રો વચ્ચે ક્યારેક અસંમતિ હોઈ શકે છે, પરંતુ અંતે બધું ઠીક થઈ જતું હોય છે.
'પેક્સ સિલિકા' પહેલમાં ભારતનો સમાવેશ
અમેરિકી રાજદૂતે એક મહત્વની જાહેરાત કરતા જણાવ્યું કે, આવતા મહિને ભારતને 'પેક્સ સિલિકા' પહેલમાં પૂર્ણ સભ્ય તરીકે જોડાવા માટે આમંત્રણ આપવામાં આવશે. આ અમેરિકાના નેતૃત્વ હેઠળની એક વ્યૂહાત્મક પહેલ છે, જેનો મુખ્ય ઉદ્દેશ્ય સેમિકન્ડક્ટર, AI ડેવલપમેન્ટ, એડવાન્સ્ડ મેન્યુફેક્ચરિંગ અને લોજિસ્ટિક્સ માટે સુરક્ષિત અને સમૃદ્ધ 'સિલિકોન સપ્લાય ચેઈન' બનાવવાનો છે. આ જૂથમાં જાપાન, દક્ષિણ કોરિયા, યુનાઇટેડ કિંગડમ અને ઇઝરાયેલ જેવા દેશો અગાઉથી જ સામેલ છે.
ભારત-અમેરિકા વચ્ચે ટ્રેડ ડીલની શક્યતાઓ
ભારત અને અમેરિકા વચ્ચે લાંબા સમયથી પેન્ડિંગ ટ્રેડ ડીલ (વેપાર કરાર) અંગે સર્જિયો ગોરે હકારાત્મક પ્રતિસાદ આપ્યો છે. તેમણે જણાવ્યું કે આ બાબતે સતત ચર્ચાઓ ચાલી રહી છે અને બંને દેશો આ ડીલ પૂર્ણ થાય તેમ ઈચ્છે છે. ભારત અને અમેરિકાની ભાગીદારીને એક નવા સ્તરે લઈ જવી એ જ તેમનું મુખ્ય લક્ષ્ય છે.
ભારત પ્રત્યે સર્જિયો ગોરનો લગાવ
સર્જિયો ગોરે પોતાની ભારત મુલાકાતના અનુભવો પણ શેર કર્યા હતા. તેમણે જણાવ્યું કે તેઓ 2023માં પહેલીવાર ભારત આવ્યા હતા, જે દરમિયાન તેમણે જયપુર, રણથંભોર અને પંજાબની મુલાકાત લીધી હતી. તેમણે ભારતના લોકોના ખૂબ વખાણ કરતા તેમને અત્યંત મિલનસાર ગણાવ્યા હતા. નોંધનીય છે કે પીએમ મોદી અને ટ્રમ્પ વચ્ચે અત્યાર સુધીમાં અનેકવાર ફોન પર વાતચીત થઈ ચૂકી છે, જે બંને દેશોના મજબૂત થતા સંબંધોને દર્શાવે છે.