Sheikh Hasina Big Update:ભારતમાં લાંબા સમયથી આશ્રય લઈ રહેલા બાંગ્લાદેશના પૂર્વ વડાપ્રધાન શેખ હસીના જો પોતાના દેશમાં પરત ફરશે, તો તેમને વચગાળાની સરકાર દ્વારા સંપૂર્ણ સુરક્ષા પૂરી પાડવામાં આવશે. જો કે, તેમના ભવિષ્ય અંગેનો અંતિમ નિર્ણય ત્યાંની અદાલતો દ્વારા જ લેવામાં આવશે. બાંગ્લાદેશ સરકારના વડાપ્રધાનના માહિતી અને પ્રસારણ સલાહકાર જાહિદ ઉર રહમાન દ્વારા આ અંગે એક મહત્વની જાહેરાત કરવામાં આવી છે.
કાયદાકીય પ્રક્રિયાનો સામનો કરવો પડશે
માહિતી સલાહકાર જાહિદ ઉર રહમાનના જણાવ્યા પ્રમાણે શેખ હસીનાએ આગામી December મહિનામાં પોતાના વતન બાંગ્લાદેશ પરત ફરવાની ઈચ્છા વ્યક્ત કરી છે. જ્યારે પણ તેઓ દેશમાં પાછા આવશે, ત્યારે તેમને તમામ પ્રકારની કાયદાકીય અને બંધારણીય સુરક્ષા આપવામાં આવશે, પરંતુ તેમણે ન્યાયિક પ્રક્રિયાનો સામનો કરવો પડશે. ત્યારબાદ અદાલત જે પણ ચુકાદો આપશે, તે તમામ પક્ષોએ માન્ય રાખવો પડશે.
ગંભીર ગુનાના આરોપીઓના અધિકારોનું પણ રક્ષણ કરાશે
સરકારના પ્રવક્તાએ સ્પષ્ટતા કરી છે કે બાંગ્લાદેશમાં વર્ષ 2024 ના હિંસક બળવા દરમિયાન ગંભીર ગુનાઓના આરોપી બનેલા તમામ લોકોના નાગરિક અને બંધારણીય અધિકારો સુરક્ષિત રાખવામાં આવશે. આ સુરક્ષા અવામી લીગના પૂર્વ સાંસદ અને જાણીતા ક્રિકેટર શાકિબ અલ હસનથી લઈને ખુદ પૂર્વ વડાપ્રધાન શેખ હસીના સુધીના તમામ આરોપીઓને સમાન રીતે મળશે. તેમણે વધુમાં ઉમેર્યું કે, તેઓ દેશમાં ફરી ક્યારેય શેખ હસીના જેવું 'માફિયા શાસન' અથવા કોઈપણ પ્રકારનું ફાસીવાદી શાસન ચલાવવા દેશે નહીં, કારણ કે બાંગ્લાદેશ હવે એક સંપૂર્ણ લોકશાહી દેશ છે.
અગાઉ 5 ઓગસ્ટના રોજ નવી દિલ્હીથી યોજાયેલી વર્ચ્યુઅલ પ્રેસ કોન્ફરન્સમાં શેખ હસીનાએ કહ્યું હતું કે તેમને દેશમાં પરત ફરતી વખતે ધરપકડ થવાનો કોઈ ડર નથી. ત્યારબાદ બાંગ્લાદેશના વિદેશ મંત્રાલયે તેમને ગુનેગાર નરસંહારક તરીકે સંબોધ્યા હતા, જો કે તાજેતરમાં વિદેશ મંત્રી ખલીલુર રહમાન અને અન્ય સરકારી અધિકારીઓએ પ્રેસ કોન્ફરન્સમાં આ શબ્દનો પ્રયોગ કરવાનું ટાળ્યું છે.
ભારતીય એજન્સીઓ પર નિયંત્રણ અને RAW પ્રમુખની મુલાકાત
બીજી તરફ, ભારતીય ગુપ્તચર એજન્સી 'રો' (RAW) ના પ્રમુખ પરાગ જૈનની આગેવાની હેઠળના પ્રતિનિધિમંડળે તાજેતરમાં ઢાકાની મુલાકાત લીધી હતી. આ અંગે સલાહકાર જાહિદે ખુલાસો કર્યો હતો કે આ મુલાકાત બંને દેશો વચ્ચેની નિયમિત સુરક્ષા વાટાઘાટોનો એક ભાગ હતી. જો કે, તેમણે સ્પષ્ટ શબ્દોમાં જણાવ્યું છે કે વર્તમાન વચગાળાની સરકાર હેઠળ કોઈપણ ભારતીય એજન્સી કે સંસ્થાને બાંગ્લાદેશમાં એ રીતે મુક્તપણે કામ કરવાની મંજૂરી આપવામાં આવશે નહીં, જેવી શેખ હસીનાના શાસનકાળ દરમિયાન મળતી હતી. તેમણે જણાવ્યું કે આ મુલાકાત બાંગ્લાદેશની મિલિટરી ઇન્ટેલિજન્સ (DGFI) ના વડાની ભારત મુલાકાત જેવી જ સમાન કક્ષાની હતી.