Nepal Flash Flood: આ રવિવારે વહેલી સવારે નેપાળના ગોરખા જિલ્લામાં કુદરતનું અત્યંત ભયાનક રૂપ જોવા મળ્યું હતું. ગોરખા જિલ્લામાં બુઢી ગંડક નદીમાં અચાનક આવેલા પૂર અને ભૂસ્ખલનના કારણે ભારે તારાજી સર્જાઈ છે. આ ભયાનક આપદામાં 35થી વધુ ઘરો અને અનેક પુલો તણાઈ ગયા છે.
ચુમનુવ્રી ગ્રામીણ નગરપાલિકા-3 ના વોર્ડ અધ્યક્ષ રામ કુમાર ગુરુંગના જણાવ્યા અનુસાર, બુઢી ગંડક નદીમાં આવેલા ઉછાળાને કારણે સાલેરી, પૈયુકા અને જગતના નદી કિનારાના વિસ્તારોમાં બનેલા ડઝનબંધ મકાનો પાણીમાં તણાઈ ગયા હતા. આ ઉપરાંત વોર્ડને જોડતો એક ઝૂલા પુલ તથા ન્યાકચેત અને ફિલિમ બજારને જોડતો પુલ પણ વહી ગયો છે.
આ અચાનક આવેલી આપદા અંગે સ્થાનિક લોકોએ જણાવ્યું કે, સવારે લગભગ 4 વાગ્યાથી જ મોટો ગર્જના જેવો અવાજ આવવા લાગ્યો હતો. પાણીનો પ્રવાહ વારંવાર રોકાઈને અચાનક ઝડપથી આવી રહ્યો હતો, જેના કારણે લોકોને સંભાળવાનો મોકો પણ મળ્યો ન હતો અને તેઓ સામાન લીધા વિના જ ઘરોમાંથી ભાગીને સુરક્ષિત સ્થળોએ પહોંચ્યા હતા.
બીજી તરફ, ગોરખાના મુખ્ય જિલ્લા અધિકારી ધર્મેન્દ્ર કુમાર મિશ્રાએ જણાવ્યું કે, અહેવાલ સૂચવે છે કે સિઉરિબાસની ઉપર ભૂસ્ખલન થયું હતું. જ્યારે સ્થાનિક લોકોને આશંકા છે કે ચુમનુવ્રી-6 માં લોકપા અને ચુમલિંગ વચ્ચે બુઢી ગંડકીની સહાયક નદી 'સ્યાર'નો માર્ગ અવરોધાવવાના કારણે અચાનક પૂર આવ્યું છે. હજી સુધી કોઈ જાનહાનિના સમાચાર નથી.
ગૃહ મંત્રી સુદન ગુરુંગે જણાવ્યું કે, નદીનું જળસ્તર સતત વધી રહ્યું હોવાથી અસરગ્રસ્ત વિસ્તારોમાં બચાવ કામગીરી કરવા, રાહત સામગ્રી વહેંચવા અને લોકોને સુરક્ષિત બહાર કાઢવા માટે હેલિકોપ્ટરો તૈનાત કરવામાં આવ્યા છે.
નેપાળ પોલીસ, સશસ્ત્ર પોલીસ બળ (APF) અને સ્થાનિક વહીવટીતંત્ર રાહત અને બચાવ કામગીરીમાં પૂર્ણપણે જોતરાયેલા છે. આ ઉપરાંત અધિકારીઓ દ્વારા લાઉડસ્પીકર મારફતે સતત જાહેરાત કરીને નદી કિનારે વસેલા ગામોના લોકોને સાવચેત રહેવા અને ઊંચા તથા સુરક્ષિત સ્થળોએ જવા અપીલ કરવામાં આવી રહી છે.