Canada Terrorist List: સોમવારે કેનેડાએ લોરેન્સ બિશ્નોઈ ગેંગને સત્તાવાર રીતે આતંકવાદી સંગઠન જાહેર કર્યું. સરકારે હત્યા, ગોળીબાર, આગચંપી, ખંડણી અને ધાકધમકીમાં તેની સંડોવણીનો ઉલ્લેખ કર્યો.
એક નિવેદનમાં કહેવામાં આવ્યું છે કે કેનેડામાં હિંસા અને આતંકના કૃત્યો માટે કોઈ સ્થાન નથી, ખાસ કરીને એવા કૃત્યો જે ચોક્કસ સમુદાયોને લક્ષ્ય બનાવીને ભય અને ધાકધમકીનું વાતાવરણ બનાવે છે. કેનેડાના જાહેર સલામતી મંત્રાલય દ્વારા જારી કરાયેલા એક નિવેદન અનુસાર, આતંકવાદી યાદીમાં સમાવેશનો અર્થ એ છે કે કેનેડામાં જૂથની માલિકીની કોઈપણ મિલકત, વાહનો અને નાણાં જપ્ત કરી શકાય છે અને તે કેનેડિયન કાયદા અમલીકરણ એજન્સીઓને આતંકવાદી ગુનાઓ સામે કાર્યવાહી કરવા માટે વધુ સત્તાઓ આપશે.
અજિત ડોભાલે તેમના કેનેડિયન સમકક્ષ સાથે મુલાકાત કરી
આ વિકાસ રાષ્ટ્રીય સુરક્ષા સલાહકાર અજિત ડોભાલ અને તેમના કેનેડિયન સમકક્ષ નથાલી ડ્રોઈન વચ્ચે નવી દિલ્હીમાં વ્યાપક વાટાઘાટો પછી થયો છે. વાટાઘાટો દરમિયાન, બંને પક્ષો દ્વિપક્ષીય સંબંધોમાં એક નવા અધ્યાય તરફ સહયોગી અભિગમ અપનાવવા સંમત થયા, જેમાં આતંકવાદ અને આંતરરાષ્ટ્રીય ગુનાઓ સામે લડવા માટે સાથે મળીને કામ કરવાનો સમાવેશ થાય છે.
આતંકવાદી સંગઠન કેમ જાહેર કરવામાં આવ્યું?
કેનેડાના જાહેર સલામતી મંત્રી ગેરી આનંદસંગરીએ જણાવ્યું હતું કે- લોરેન્સ બિશ્નોઈ અને તેની ગેંગ, જે ભારત અને વિદેશમાં હત્યા, ખંડણી, હથિયારો અને ડ્રગ્સની હેરાફેરીમાં સામેલ છે તેમને કેનેડાના ક્રિમિનલ કોડ હેઠળ આતંકવાદી સંગઠન તરીકે જાહેર કરવામાં આવ્યું છે.
મંત્રી ગેરી આનંદસંગરીએ સોમવારે જણાવ્યું હતું કે- લોરેન્સ બિશ્નોઈ ગેંગ આતંક, હિંસા અને ધાકધમકી દ્વારા ચોક્કસ સમુદાયોને નિશાન બનાવી રહી છે. તેમને આતંકવાદી જૂથ તરીકે સૂચિબદ્ધ કરવાથી આપણને તેમને રોકવા માટે વધુ શક્તિશાળી અને અસરકારક સાધનો મળે છે.
કેટલા આતંકવાદી સંગઠનોની યાદી બનાવવામાં આવી છે?
લોરેન્સ બિશ્નોઈ ગેંગના સમાવેશ સાથે હવે કેનેડામાં 88 આતંકવાદી સંગઠનો સૂચિબદ્ધ છે. લોરેન્સ બિશ્નોઈની આગેવાની હેઠળની ગેંગ એક આંતરરાષ્ટ્રીય ગુનાહિત સંગઠન છે. તેમની હાજરી કેનેડામાં છે અને નોંધપાત્ર ઇમિગ્રન્ટ સમુદાયો ધરાવતા વિસ્તારોમાં સક્રિય છે. કેનેડિયન પોલીસે કેટલાક ખંડણીના કેસોને આ ગેંગ સાથે જોડ્યા છે, જેનો નેતા ભારતની જેલમાં છે.