Aamir Khan Target Bishnoi Gang: બોલિવૂડ અભિનેતા ટાઈગર શ્રોફ પર તાજેતરમાં થયેલા જીવલેણ હુમલા અને ફાયરિંગના કેસમાં અત્યંત ચોંકાવનારો ખુલાસો સામે આવ્યો છે. 18 ઓક્ટોબરે ટાઈગર શ્રોફ પર થયેલા ગોળીબારના મામલાની તપાસ કરી રહેલી મુંબઈ પોલીસની પૂછપરછ દરમિયાન જાણવા મળ્યું છે કે હુમલાખોરોનું અસલી અને મુખ્ય નિશાન ટાઈગર શ્રોફ નહીં પરંતુ બોલિવૂડના મિસ્ટર પરફેક્ટનિસ્ટ આમિર ખાન હતા.
આમિર ખાનના ઘરની 3 વખત કરી હતી રેકી
મળતી વિગતો અનુસાર, પોલીસ દ્વારા શંકાસ્પદ આરોપીઓની સઘન પૂછપરછ કરવામાં આવી રહી છે. અહેવાલો મુજબ, હુમલાખોરોએ મુંબઈમાં આમિર ખાનના નિવાસસ્થાનની ત્રણ વખત રેકી કરી હતી અને તેમની દિનચર્યા તથા હિલચાલ પર સતત નજીકથી નજર રાખી રહ્યા હતા. જોકે, અતિશય સુરક્ષા અને યોગ્ય તક ન મળવાના કારણે હુમલાખોરો આમિર ખાન પર હુમલો કરવામાં નિષ્ફળ રહ્યા હતા. આમિર ખાન પર હુમલો કરવાની તક ન મળતાં તેમણે પોતાનો પ્લાન બદલ્યો હતો અને તેમનું ધ્યાન ટાઈગર શ્રોફ તરફ વાળ્યું હતું.
જુહુમાં ફૂટબોલ રમવા ગયેલા ટાઈગર શ્રોફની કાર પર કર્યો હતો હુમલો
આમિર ખાનને નિશાન બનાવવામાં નિષ્ફળ ગયા બાદ હુમલાખોરોએ જાણકારી મેળવી હતી કે ટાઈગર શ્રોફ નિયમિતપણે ફૂટબોલ રમવા માટે જુહુના એક પાર્કમાં આવે છે. તક મળતાં જ 18 ઓક્ટોબરે હુમલાખોરોએ જુહુ વિસ્તારમાં ટાઈગર શ્રોફની કાર પર તાબડતોબ ગોળીબાર કર્યો હતો. આ ભયાનક અને જીવલેણ હુમલામાં ટાઈગર શ્રોફનો આબાદ બચાવ થયો હતો.
સલમાન ખાન સાથે કામ કરનારાઓને ધમકી
આ ગોળીબારની ઘટના બાદ લોરેન્સ બિશ્નોઈ ગેંગના સભ્યોએ સોશિયલ મીડિયા પર આ હુમલાની સત્તાવાર જવાબદારી સ્વીકારી હતી. બિશ્નોઈ ગેંગે ખુલ્લેઆમ ચેતવણી આપતાં જણાવ્યું હતું કે, જે કોઈ પણ સલમાન ખાન સાથે સંબંધ રાખશે કે તેમની સાથે કામ કરશે, તેને આવી જ રીતે ગંભીર પરિણામો ભોગવવા પડશે.
ઉલ્લેખનીય છે કે, તપાસ દરમિયાન હુમલાખોરોના હિટલિસ્ટમાં માત્ર આમિર ખાન જ નહીં પરંતુ રણબીર કપૂર, અક્ષય કુમાર અને સલમાન ખાન સહિતના અન્ય દગ્ગજ બોલિવૂડ સ્ટાર્સ પણ ટાર્ગેટ પર હોવાની ચોંકાવનારી વિગતો પ્રકાશમાં આવી છે. હાલમાં મુંબઈ પોલીસે આ મામલે કડક તપાસ શરૂ કરી છે અને તમામ સ્ટાર્સની સુરક્ષા વ્યવસ્થાની સમીક્ષા હાથ ધરી છે.