Vadodara Road Accident: રાજકોટથી શ્રદ્ધાભેર પાવાગઢ મહાકાળી માતાના દર્શનાર્થે નીકળેલા એક પરિવાર ઉપર વહેલી સવારે આફત આવી પડી હતી. કંથારિયાથી વાસદ જવાના માર્ગ પર પૂરપાટ ઝડપે આવી રહેલા એક અજાણ્યા વાહને આગળ જઈ રહેલા પરિવારના ટેમ્પોને પાછળથી જોરદાર ટક્કર મારી હતી. આ ગમખ્વાર અકસ્માતમાં ટેમ્પો રોડની બાજુમાં પલટી ખાઈ ગયો હતો, જેના કારણે વાહનમાં સવાર 12 જેટલા સભ્યો નાની-મોટી ઈજાઓનો ભોગ બન્યા હતા.
આ ઘટનાની જાણ થતા જ આસપાસના સ્થાનિક રહીશો તાત્કાલિક મદદે દોડી આવ્યા હતા અને રાહત તથા બચાવ કામગીરી હાથ ધરી હતી. અકસ્માતમાં ઘાયલ થયેલા તમામ સભ્યોને તાત્કાલિક ધોરણે 108 એમ્બ્યુલન્સ અને અન્ય વાહનોની મદદથી નજીકની હોસ્પિટલમાં પ્રાથમિક સારવાર માટે ખસેડવામાં આવ્યા હતા. જોકે, ઈજાગ્રસ્તો પૈકી 8 જેટલા સભ્યોની તબિયત ગંભીર જણાતા તેમને વધુ અને વિશેષ સારવાર માટે વડોદરા સ્થિત SSG હોસ્પિટલમાં રીફર કરવામાં આવ્યા હતા.
વડોદરાની સયાજી હોસ્પિટલ ખાતે તમામ ઈજાગ્રસ્તોને તાત્કાલિક ઇમરજન્સી વોર્ડમાં દાખલ કરવામાં આવ્યા છે, જ્યાં તબીબોની ટીમ દ્વારા તેમની સઘન સારવાર શરૂ કરી દેવામાં આવી છે. પરિવારના સભ્યો અચાનક આ દર્દનાક હસતા-રમતા પ્રવાસમાંથી હોસ્પિટલના બિછાને પહોંચી જતા પરિવારજનોમાં શોક અને ચિંતાનું મોજું ફરી વળ્યું છે.
બીજી તરફ આ ગંભીર અકસ્માત સર્જીને નાસી છૂટેલા અજાણ્યા વાહનચાલક સામે કાયદેસરની કાર્યવાહી હાથ ધરવામાં આવી છે. પોલીસ દ્વારા આસપાસના વિસ્તારના સીસીટીવી ફૂટેજ મેળવવાની તેમજ નાકાબંધી કરીને ફરાર વાહનચાલકની શોધખોળ તેજ કરવામાં આવી છે. સ્થાનિક પોલીસ સ્ટેશનમાં ગુનો નોંધીને અકસ્માત કયા સંજોગોમાં સર્જાયો તેની વધુ તપાસ હાથ ધરવામાં આવી છે.