Vadodara: શહેરના લક્ષ્મીપુરા વિસ્તારમાં શનિવારે એક અત્યંત હૃદયદ્રાવક અને ગમખ્વાર દુર્ઘટના સામે આવી છે. અહીં આવેલા રડીયાત બા નગરમાં ફેબ્રિકેશનનું કામ ચાલી રહ્યું હતું, તે દરમિયાન અચાનક એક ગેસ સિલિન્ડરમાં પ્રચંડ બ્લાસ્ટ થયો હતો.
આ વિસ્ફોટ એટલો ભયાનક હતો કે, કામ કરી રહેલા મુકેશગીરી નામના યુવકને ગંભીર ઈજાઓ પહોંચી હતી. દુર્ઘટનાને પગલે આસપાસના લોકોમાં ભારે અફરાતફરી મચી ગઈ હતી અને સમગ્ર સ્થાનિક વિસ્તારમાં દહેશત વ્યાપી ગઈ હતી.
સારવાર મળે તે પહેલા જ તોડ્યો દમ
આ ઘટનાની ગંભીરતાને જોતાં સ્થાનિક લોકો અને અન્ય શ્રમિકો દ્વારા લોહીલુહાણ હાલતમાં મુકેશગીરીને તાત્કાલિક સારવાર અર્થે નજીકની ગોત્રી હોસ્પિટલમાં ખસેડવામાં આવ્યો હતો. જોકે ફરજ પરના તબીબોએ તેને મૃત જાહેર કર્યો હતો. યુવકના અકાળે અને કરુણ મોતથી તેના પરિવાર સહિત સ્થાનિકોમાં ઘેરા શોકની લાગણી ફરી વળી છે.
ધડાકો એટલો તીવ્ર હતો કે દીવાલ ધરાશાયી થઈ
પોલીસના જણાવ્યા અનુસાર, સિલિન્ડર બ્લાસ્ટ એટલો પ્રચંડ હતો કે તેનો અવાજ દૂર-દૂર સુધી સંભળાયો હતો. બ્લાસ્ટના જોરદાર આંચકાને કારણે ઘટનાસ્થળે આવેલી એક દીવાલ પણ પત્તાના મહેલની જેમ ધરાશાયી થઈ ગઈ હતી. આ ભયાનક દ્રશ્ય જોઈને આસપાસના રહીશો ભયભીત થઈ ગયા હતા અને થોડીવાર માટે વિસ્તારમાં અફરાતફરી મચી ગઈ હતી.
પોલીસ અને FSLની ટીમ દ્વારા તપાસનો ધમધમાટ
આ ભયાનક વિસ્ફોટની જાણ થતાં જ લક્ષ્મીપુરા પોલીસ સ્ટેશનનો કાફલો ઘટનાસ્થળે દોડી ગયો હતો. દુર્ઘટના પાછળનું ચોક્કસ કારણ જાણવા માટે પોલીસે તાત્કાલિક FSL (ફોરેન્સિક સાયન્સ લેબોરેટરી) ની ટીમને પણ સ્થળ પર બોલાવી લીધી હતી.
પોલીસે અકસ્માતે મોતનો ગુનો નોંધી આખી ઘટનાની વિગતવાર કાનૂની તપાસ શરૂ કરી છે. સિલિન્ડરમાં બ્લાસ્ટ કયા ટેકનિકલ કારણોસર કે બેદરકારીના લીધે થયો, તે અંગે FSLના રિપોર્ટ બાદ વધુ ખુલાસો થશે. હાલમાં એક આશાસ્પદ યુવકે જીવ ગુમાવતાં રડીયાત બા નગરમાં ગમગીની છવાઈ ગઈ છે.