Manjalpur Assembly Bypoll: આજે 15 ટેબલ પર 19 રાઉન્ડમાં મતગણતરી, 42 કાઉન્ટિંગ સ્ટાફ અને 200 પોલીસ કર્મીઓ સાથે તંત્ર સજ્જ

Manjalpur Assembly Bypoll: ભારતીય ચૂંટણી પંચ દ્વારા જાહેર કરવામાં આવેલ 145-માંજલપુર વિધાનસભા મતવિસ્તારની પેટાચૂંટણી-2026 અંતર્ગત મતદાન પ્રક્રિયા સફળતાપૂર્વક પૂર્ણ થયા બાદ, હવે ચૂંટણીના પરિણામો માટેની મતગણતરીની તૈયારીઓને વડોદરા ચૂંટણી તંત્ર દ્વારા આખરી ઓપ આપી દેવામાં આવ્યો છે.

માંજલપુર વિસ્તારમાં આવેલા ભવન્સ સ્કૂલ ખાતે અત્યંત કડક સુરક્ષા વ્યવસ્થા વચ્ચે આજે સોમવાર, તારીખ 3 ઓગસ્ટ 2026ના રોજ સવારે 8 વાગ્યેથી મતગણતરીનો પ્રારંભ થનાર છે. આ ગણતરીને સંપૂર્ણપણે શાંતિપૂર્ણ, નિષ્પક્ષ અને પારદર્શી વાતાવરણમાં સંપન્ન કરવા માટે વહીવટી તંત્ર દ્વારા તમામ આવશ્યક વ્યવસ્થાઓ સુનિશ્ચિત કરવામાં આવી છે.

Nasha Mukt Yuva for Viksit Bharat: BAPS સ્વામિનારાયણ સંસ્થાના 30 હજારથી વધુ યુવાનો 'નશામુક્ત યુવા ફૉર વિકસિત ભારત' અભિયાનમાં જોડાયા

આ અંગે પ્રાપ્ત વિગતો અનુસાર, માંજલપુર વિધાનસભા મતવિસ્તાર અંતર્ગત આવતા કુલ 260 મતદાન મથકોના મતોની ગણતરી માટે સુચારૂ આયોજન કરવામાં આવ્યું છે. મતગણતરી કેન્દ્ર ખાતે ઈલેક્ટ્રોનિક વોટિંગ મશીન (EVM) માટે 14 અને પોસ્ટલ બેલેટ માટે 1, એમ કુલ 15 કાઉન્ટિંગ ટેબલની વિશેષ વ્યવસ્થા કરવામાં આવી છે.

આ 260 મતદાન મથકોના મતોની ગણતરી તબક્કાવાર કુલ 19 રાઉન્ડમાં પૂર્ણ કરવામાં આવશે. સવારે બરાબર 8 વાગ્યે સર્વપ્રથમ પોસ્ટલ બેલેટની ગણતરી હાથ ધરવામાં આવશે અને ત્યારબાદ EVMના મતોની ગણતરી શરૂ થશે.

જિલ્લા ચૂંટણી અધિકારી અને જિલ્લા મેજિસ્ટ્રેટ ડૉ. અનિલ ધામેલીયાના કુશળ માર્ગદર્શન હેઠળ આ સમગ્ર મતગણતરી પ્રક્રિયા હાથ ધરવામાં આવી રહી છે. ગણતરીની આ કામગીરીને યોગ્ય રીતે પાર પાડવા માટે 42 કુશળ ગણતરી સ્ટાફ તેમજ દરેક ટેબલ દીઠ સઘન દેખરેખ માટે 42 માઇક્રો ઓબ્ઝર્વર્સની નિમણૂંક કરવામાં આવી છે.

આ ઉપરાંત ચૂંટણી સંચાલનને લગતી અન્ય વ્યવસ્થાપકીય કામગીરી માટે 200 જેટલા અન્ય ચૂંટણી સ્ટાફના કર્મચારીઓ સતત સેવામાં હાજર રહેશે. ભારતીય ચૂંટણી પંચ દ્વારા નિયુક્ત કરાયેલા જનરલ ઓબ્ઝર્વર, પોલીસ ઓબ્ઝર્વર અને એક્સપેન્ડીચર ઓબ્ઝર્વરની પ્રત્યક્ષ ઉપસ્થિતિ અને માર્ગદર્શન હેઠળ સમગ્ર પ્રક્રિયા પારદર્શક રીતે પૂર્ણ કરાશે.

મતગણતરી કેન્દ્રની આસપાસ અને અંદરના ભાગમાં કોઈ પણ અનિચ્છનીય બનાવ ન બને તે માટે ચુસ્ત ત્રિસ્તરીય સુરક્ષા બંદોબસ્ત ગોઠવવામાં આવ્યો છે. કાયદો અને વ્યવસ્થાની પરિસ્થિતિની ઉત્તમ જાળવણી માટે 200થી વધુ પોલીસ જવાનો, અધિકારીઓ અને સુરક્ષાકર્મીઓ ખડેપગે ફરજ બજાવશે.

આ માંજલપુર પેટાચૂંટણીમાં ભાજપ અને કોંગ્રેસ દ્વારા તેમના દિગ્ગજ નેતાઓને પ્રચાર માટે મેદાનમાં ઉતારવામાં આવ્યા હતા. આમ છતાં મતદારોમાં ઉત્સાહ ઓછો જોવા મળતા મતદાન માત્ર 37.5 ટકા જેટલું જ સીમિત રહ્યું છે, જ્યારે અગાઉની 2022ની વિધાનસભા ચૂંટણીમાં દિવંગત નેતા યોગેશ પટેલની જીતની લીડ 64.8 ટકા રહી હતી.