વડોદરામાં જન્માષ્ટમીના પર્વે મટકીફોડ કાર્યક્રમમાં વિવાદ: નરસિંહજીની પોળમાં મારામારી અને નાગરવાડામાં પોલીસ સાથે ઘર્ષણ

Vadodara News: વડોદરા શહેરમાં જન્માષ્ટમી મહોત્સવના પર્વ દરમિયાન ઉત્સાહનો માહોલ ફેરવાઈ જઈને બે અલગ-અલગ વિસ્તારોમાં ઘર્ષણ અને તંગદિલીની ઘટનાઓ સામે આવી છે. શહેરના ઐતિહાસિક માંડવી વિસ્તારમાં આવેલ નરસિંહજીની પોળ તેમજ નાગરવાડા વિસ્તારમાં મટકીફોડના કાર્યક્રમો દરમિયાન થયેલી બબાલને કારણે પોલીસ તંત્ર દોડતું થઈ ગયું છે. આ બંને ઘટનાઓમાં કાયદો અને વ્યવસ્થાની સ્થિતિ જાળવવા માટે પોલીસે તાત્કાલિક હસ્તક્ષેપ કરવો પડ્યો હતો.

નરસિંહજી પોળમાં મટકીફોડ કાર્યક્રમમાં બબાલ

પ્રથમ ઘટના માંડવી વિસ્તારની છે, જ્યાં નરસિંહજીની પોળમાં મટકીફોડ કાર્યક્રમ ચાલી રહ્યો હતો. આ પવિત્ર અને પરંપરાગત ઉજવણી દરમિયાન અચાનક બે જૂથો વચ્ચે બોલાચાલી બાદ મામલો ઉગ્ર બન્યો હતો અને મારામારી સુધી પહોંચી ગયો હતો. આ ઘર્ષણ દરમિયાન એક મહિલા પોલીસ કોન્સ્ટેબલ સામે પણ દાદાગીરી કરવાના અને ફરજમાં રૂબરૂ અડચણરૂપ બનવાના ગંભીર આક્ષેપો સામે આવ્યા છે. આ સમગ્ર મામલો ગરમાતા મામલો સિટી પોલીસ મથકે પહોંચ્યો હતો, જ્યાં બંને પક્ષો દ્વારા ફરિયાદ નોંધાવવાની તજવીજ હાથ ધરવામાં આવી છે. પોલીસે આ મામલે વીડિયો ફૂટેજ અને અન્ય પુરાવાઓના આધારે તપાસનો ધમધમાટ શરૂ કર્યો છે.

બીજી ઘટનામાં ડીજે વગાડવા અંગે વિવાદ

બીજી ઘટના નાગરવાડા વિસ્તારની નવી ધરતી ગોલવાડ ખાતે બની હતી. અહીં જન્માષ્ટમી નિમિત્તે યોજાયેલા મટકીફોડના ભવ્ય આયોજનમાં ડીજે વગાડવા બાબતે વિવાદ સર્જાયો હતો. મોટેથી વાગતા ડીજે અને નિયમોના ભંગને લઈને પોલીસ સ્થળ પર પહોંચી હતી અને ડીજે બંધ કરાવવાનો પ્રયાસ કર્યો હતો. જો કે, આયોજકો અને ત્યાં ઉપસ્થિત સ્થાનિક લોકોએ પોલીસની આ કાર્યવાહી સામે ભારે રોષ વ્યક્ત કરીને વાંધો ઉઠાવ્યો હતો.

લોકો અને પોલીસ વચ્ચે બોલાચાલી સર્જાઈ

પોલીસ અને પબ્લિક વચ્ચે થયેલી આ બોલાચાલી જોતજોતામાં સામાન્ય ઘર્ષણમાં ફેરવાઈ ગઈ હતી, જેના કારણે સમગ્ર વિસ્તારમાં તંગદિલી વ્યાપી ગઈ હતી. પરિસ્થિતિ વણસતી અટકાવવા માટે પોલીસે સ્થળ પર વધારાનો કાફલો બોલાવ્યો હતો અને કાયદો હાથમાં લેવાનો પ્રયાસ કરનાર કેટલાંક યુવાનોની અટકાયત કરી હતી. યુવાનોની અટકાયત કરવામાં આવતા સ્થાનિક લોકોમાં ભારે રોષ ફેલાયો હતો અને નારાજ લોકોનું એક મોટું ટોળું ઉશ્કેરાઈને કારેલીબાગ પોલીસ મથક ખાતે પહોંચી ગયું હતું.

લોકોએ યુવાનોને છોડી મૂકવા માંગ કરી

પોલીસ મથક બહાર લોકોએ સૂત્રોચ્ચાર કરીને અટકાયત કરાયેલા યુવાનોને છોડી મૂકવાની માંગ કરી હતી. ઉચ્ચ પોલીસ અધિકારીઓ ઘટનાસ્થળે અને પોલીસ મથકે દોડી આવ્યા હતા અને સ્થિતિને કાબૂમાં લીધી હતી. હાલ બંને પોલીસ મથકો દ્વારા આ મામલે ઊંડાણપૂર્વક તપાસ હાથ ધરવામાં આવી છે અને સીસીટીવી ફૂટેજના આધારે તોફાની તત્વોની ઓળખ કરવાની પ્રક્રિયા શરૂ કરી દેવાઈ છે.