Vadodara: વડોદરા તાલુકાના સિકંદરપુરા ગામ પાસે આજે એક અત્યંત કરુણ અને ગંભીર અકસ્માત સર્જાયો છે. બાબા રામદેવપીરના પવિત્ર નેજા (ધજા) લઈને પગપાળા યાત્રામાં નીકળેલા 8 થી 10 યુવાનો અચાનક હાઈટેન્શન વીજળીના તારની ચપેટમાં આવી જતાં વીજકરંટ લાગવાની ઘટના સામે આવી છે. આ દુર્ઘટનાને પગલે સમગ્ર વિસ્તારમાં અફરાતફરી અને શોકનો માહોલ છવાઈ ગયો હતો.
આ અંગે પ્રાપ્ત વિગતો અનુસાર, સિકંદરપુરા ગામેથી યુવાનોનો એક સમૂહ પરંપરાગત રીતે રામદેવપીરનો નેજો લઈને ભક્તિભાવપૂર્વક નીકળ્યો હતો. યાત્રા દરમિયાન ઉત્સાહ સાથે જઈ રહેલા યુવાનોના હાથમાં રહેલો ધજાનો ઊંચો દંડો (નેજો) રસ્તા પરથી પસાર થતી વીજ કંપનીની મુખ્ય લાઈનના જીવંત વીજ તારને અડી ગયો હતો.
નેજો વીજળીના લાઈવ તાર સાથે સ્પર્શતાની સાથે જ ધાતુ અને ભીના દોરડાના કારણે સમગ્ર દંડામાં ભારે કરંટ દોડી ગયો હતો. જેના પરિણામે ધજા પકડીને ચાલી રહેલા તેમજ તેમની આસપાસ રહેલા 8 થી 10 જેટલા યુવાનો તીવ્ર વીજઝટકાનો ભોગ બન્યા હતા.
કરંટ લાગતા જ કેટલાક યુવાનો જમીન પર પટકાઈ પડ્યા હતા અને કીયારીઓ વચ્ચે બુમાબુમ મચી ગઈ હતી. ઘટનાની જાણ થતાં જ આસપાસના ગ્રામજનો તાત્કાલિક મદદ માટે દોડી આવ્યા હતા. આ ઘટના અંગેની માહિતી મળતાં જ પ્રદેશ ભાજપ નેતા વિરેન્દ્રસિંહ જાડેજા પણ સ્થાનિક આગેવાનો સાથે બનાવ સ્થળે દોડી આવ્યા હતા અને રાહત-બચાવ કામગીરીમાં જોડાયા હતા.
સ્થાનિકો અને ભાજપ નેતા વિરેન્દ્રસિંહ જાડેજાની આગેવાની હેઠળ ઇજાગ્રસ્ત તમામ યુવાનોને તાત્કાલિક ધોરણે ૧૦૮ એમ્બ્યુલન્સ અને ખાનગી વાહનો મારફતે વડોદરા શહેરની ખાનગી હોસ્પિટલમાં સારવાર અર્થે ખસેડવામાં આવ્યા છે. હોસ્પિટલ ખાતે તબીબોની ટીમ દ્વારા યુવાનોની તાત્કાલિક સારવાર શરૂ કરી દેવામાં આવી છે. ઇજાગ્રસ્તોમાંથી કેટલાકની હાલત ગંભીર હોવાનું જાણવા મળી રહ્યું છે.
આ ઘટનાની જાણ થતાં જ સ્થાનિક પોલીસ કાફલો પણ હોસ્પિટલ અને ઘટના સ્થળે પહોંચી ગયો હતો અને બનાવ અંગે કાયદેસરની તપાસ હાથ ધરી છે. ધાર્મિક પ્રસંગમાં સર્જાયેલી આ અણધારી દુર્ઘટનાને પગલે સિકંદરપુરા ગામ સહિત સમગ્ર વિસ્તારમાં ભારે અરેરાટી વ્યાપી ગઈ છે.