વડોદરા: ગોત્રી હરિનગર પાસે રામાપીરના નેજા યાત્રામાં હાઈટેન્શન લાઈનના કરંટથી દાઝેલા યુવકનું થયું કરૂણ મોત

Vadodara News: ગોત્રી હરિનગર વિસ્તારમાં આવેલા રાજેશ ટાવર નજીકથી પસાર થઈ રહેલી રામાપીરના નેજા યાત્રા દરમિયાન બનેલી વીજ કરંટની ગંભીર દુર્ઘટનામાં આજે એક દિલધડક અને દુઃખદ સમાચાર સામે આવ્યા છે. ગત અઠવાડિયે બનેલી આ ઘટનામાં ગંભીર રીતે દાઝી ગયેલા પિયુષ બજાણીયા નામના યુવકનું આજે સારવાર દરમિયાન ગોત્રી હોસ્પિટલમાં કરૂણ મોત નીપજ્યું છે. આ બનાવથી પરિવારજનો પર આભ તૂટી પડ્યું છે અને સમગ્ર ગોત્રી વિસ્તારમાં ઘેરા શોકની લાગણી ફરી વળી છે.

હાઈટેન્શન વાયરથી 2 યુવકો દાઝ્યા

મળતી માહિતી અનુસાર, ગત અઠવાડિયે રાજેશ ટાવર નજીકથી શ્રદ્ધાળુઓ દ્વારા ઉત્સાહભેર રામાપીરના નેજા લઈ જવામાં આવી રહ્યા હતા. આ દરમિયાન અચાનક નેજો ઊંચેથી પસાર થતી હાઈટેન્શન વીજ લાઈનને અડી ગયો હતો. ક્ષણવારમાં જ વીજળીનો ભારે કરંટ નેજામાં પ્રસરી જતાં ત્યાં હાજર લોકોમાં ભારે ભાગદોડ અને નાસભાગ મચી ગઈ હતી. આ અકસ્માતમાં નેજો પકડીને ચાલી રહેલા પિયુષ બજાણીયા સહિત બે યુવાનો વીજ કરંટની ઝપેટમાં આવી જઈને ગંભીર રીતે દાઝી ગયા હતા.

યુવકનું સારવાર દરમિયાન મોત

બનાવ બનતા જ આસપાસના સ્થાનિક લોકો અને યાત્રામાં સામેલ અન્ય શ્રદ્ધાળુઓ તાત્કાલિક મદદે દોડી આવ્યા હતા. ગંભીર રીતે ઘવાયેલા બંને યુવાનોને તાબડતોબ સારવાર અર્થે નજીકની ગોત્રી જનરલ હોસ્પિટલ ખાતે ખસેડવામાં આવ્યા હતા. જ્યાં પિયુષ બજાણીયાની હાલત અત્યંત નાજુક હોવાથી તેને આઈસીયુ વોર્ડમાં રાખવામાં આવ્યો હતો. તબીબોની ભારે જહમત છતાં વીજ કરંટથી ખૂબ જ ગંભીર રીતે દાઝી ગયેલા પિયુષે આજે સારવાર દરમિયાન અંતિમ શ્વાસ લીધા હતા.

પરિવારમાં શોકનો માહોલ પ્રસર્યો

યુવકના મોતના સમાચાર મળતાં જ ગોત્રી હોસ્પિટલ પરિસરમાં પરિવારજનો અને સંબંધીઓના કરુણ આક્રંદથી વાતાવરણ ગમગીન બની ગયું હતું. ધાર્મિક પ્રસંગ અને ભક્તિમય માહોલ વચ્ચે અચાનક સર્જાયેલી આ દુર્ઘટનાએ એક આશાસ્પદ યુવકનો જીવ લેતાં સ્થાનિકોમાં પણ ભારે અરેરાટી અને શોકની લાગણી છવાઈ ગઈ છે.