Vadodara E-Bus Service: વડોદરા શહેરમાં જાહેર પરિવહન વ્યવસ્થાને વધુ આધુનિક, પ્રદૂષણમુક્ત અને પર્યાવરણલક્ષી બનાવવાની દિશામાં એક મહત્વપૂર્ણ પગલું લેવામાં આવ્યું છે. ‘ક્લીન સિટી, ગ્રીન સિટી’ના સંકલ્પને સાકાર કરવાના ભાગરૂપે વડોદરા મહાનગરપાલિકા દ્વારા પીએમ ઇ-બસ સેવા યોજના અંતર્ગત શહેરમાં વધુ 20 નવી ઇલેક્ટ્રિક બસોનું લોકાર્પણ કરવામાં આવ્યું છે.
ગુજરાત સરકારના મહિલા અને બાળ કલ્યાણ તથા સામાજિક ન્યાય અને અધિકારિતા મંત્રી ડો. મનીષાબેન વકીલના હસ્તે આ નવી ઈ-બસોને લીલી ઝંડી આપીને સેવામાં પ્રસ્થાન કરાવવામાં આવ્યું હતું. આ નવી બસોના ઉમેરા સાથે હવે શહેરમાં કુલ 50 ઈ-બસો નાગરિકોની સેવા માટે કાર્યરત થઈ ગઈ છે.
બીજા તબક્કામાં 20 નવી ઈ-બસો જોડવામાં આવી
પ્રથમ તબક્કામાં 30 ઈ-બસો સફળતાપૂર્વક શરૂ કર્યા બાદ, બીજા તબક્કામાં વધુ 20 બસો જોડાવાથી પરંપરાગત ડીઝલ આધારિત પરિવહનમાંથી ઇલેક્ટ્રિક મોબિલિટી તરફનું રૂપાંતરણ ઝડપી બન્યું છે. ઈલેક્ટ્રિક બસો ટેલપાઇપ ઉત્સર્જન કરતી ન હોવાથી શહેરના વાયુ પ્રદૂષણમાં ઘટાડો થશે અને હવાની ગુણવત્તા સુધરશે. મ્યુનિસિપાલિટીના આ નિર્ણયથી શહેરમાં વધી રહેલા ટ્રાફિકના ભારણને નિયંત્રિત કરવામાં અને નાગરિકોને સુવિધાજનક મુસાફરી પૂરી પાડવામાં મદદ મળશે. જોકે, આ બદલાવ વચ્ચે વિનાયક લોજિસ્ટિકની 50 સામાન્ય બસો બંધ કરવાનો પણ નિર્ણય લેવાયો છે, જેથી નવા રૂટ અને ફ્રિક્વન્સીનું યોગ્ય આયોજન કરવું અનિવાર્ય બનશે.
નાગરિકોને પાસ અને કન્સેશનની સુવિધા મળશે
નાગરિકોને સસ્તી અને સુલભ મુસાફરી મળી રહે તે માટે વિદ્યાર્થીઓ, મહિલાઓ, દિવ્યાંગો અને જનસાધારણ માટે ખાસ પાસ તથા કન્સેશનની સુવિધા ટૂંક સમયમાં શરૂ કરવામાં આવનાર છે. આ રાહતો મળવાથી દૈનિક મુસાફરો ખાનગી વાહનો છોડીને સાર્વજનિક પરિવહન તરફ આકર્ષિત થશે. ઉલ્લેખનીય છે કે, ગત મહિને જ અંદાજે બે લાખથી વધુ મુસાફરોએ ઈ-બસ સેવાક્ષેત્રનો લાભ લીધો હતો, જે તેની વધતી લોકપ્રિયતા દર્શાવે છે.
આગામી બે મહિનામાં વધુ 50 બસો જોડાવાની શક્યતા
આગામી બે મહિનામાં વધુ 30 થી 50 ઈ-બસો શહેરમાં તબક્કાવાર જોડાવાની સંભાવના છે. જો આ વિસ્તરણ સમયસર થાય તો વડોદરાનું પરિવહન નેટવર્ક વધુ વિસ્તૃત બનશે. વડાપ્રધાનના સ્માર્ટ અને ગ્રીન સિટીના વિઝનને અનુરૂપ વડોદરામાં ચાર્જિંગ ઇન્ફ્રાસ્ટ્રક્ચર અને સમયપત્રકની યોગ્ય જાળવણી દ્વારા આ સેવાને વધુ લોકભોગ્ય બનાવી શકાશે.