Vadodara Accident News: વડોદરા નજીક રાષ્ટ્રીય ધોરીમાર્ગ નંબર 48 પર આવેલા દરજીપુરા બ્રિજ પર એક ગોઝારો અકસ્માત સર્જાયો હતો. પૂરઝડપે અને બેફામ રીતે હંકારવામાં આવેલી એક બોલેરો પિકઅપ ગાડીએ રોડ પરનો ડિવાઈડર કૂદીને સામેથી આવી રહેલી નાઈટ્રોજનના ખાલી બોટલ ભરેલી આઈસર ગાડીને જોરદાર ટક્કર મારી હતી. આ ગંભીર અકસ્માતમાં બોલેરો ચાલકનું ઘટનાસ્થળે જ કમકમાટીભર્યું મોત નીપજ્યું હતું, જ્યારે આઈસરના ચાલકને ગંભીર ઈજાઓ પહોંચતા સારવાર અર્થે એસ.એસ.જી. હોસ્પિટલ ખસેડવામાં આવ્યા છે. આ મામલે હરણી પોલીસ સ્ટેશન દ્વારા ગુનો નોંધીને વધુ કાયદેસરની તપાસ હાથ ધરવામાં આવી છે.
કેવી રીતે સર્જાયો અકસ્માત?
પ્રાપ્ત વિગતો અનુસાર, પોર સ્થિત જલારામ સોસાયટીમાં રહેતા અને ડ્રાઇવિંગ કરી પરિવારનું ગુજરાન ચલાવતા રાજેશકુમાર નારાયણભાઈ રાવ (ઉ.વ. 35) ગત સાંજે પોતાની આઈસર ગાડીમાં નાઈટ્રોજન ગેસના બોટલ ભરીને હાલોલ ખાતે આવેલી એલેમ્બિક કંપનીમાં ગયા હતા. ત્યાં ગેસના બોટલ ખાલી કર્યા બાદ, તેઓ તમામ ખાલી બોટલ પરત આઈસરમાં ભરીને હાલોલથી પોર તરફ પાછા ફરી રહ્યા હતા. પોરથી નીકળી ગોલ્ડન ચોકડી થઈને નેશનલ હાઈવે નંબર ૪૮ મારફતે સુરત તરફ જતી વેળાએ સાંજના સુમારે આ બનાવ બન્યો હતો.
બંને વાહનોને થયું મોટું નુકસાન
દરજીપુરા બ્રિજ પર પહોંચતા જ સુરત તરફ જઈ રહેલી એક મહિન્દ્રા બોલેરો પિકઅપ ગાડીના ચાલકે પોતાના વાહનને અત્યંત પૂરઝડપે અને ગફલતભરી રીતે હંકારીને રોડ વચ્ચે આવેલો ડિવાઈડર કૂદાવી દીધો હતો. ડિવાઈડર કૂદીને સામેની લેનમાં આવેલી આ ગાડી સીધી જ રાજેશકુમારની આઈસર ગાડીના આગળના ભાગ સાથે ધડાકાભેર અથડાઈ હતી. આ અકસ્માત એટલો ભયાનક હતો કે બંને વાહનોના આગળના ભાગને ભારે નુકસાન પહોંચ્યું હતું અને ટક્કરના પ્રચંડ અવાજથી આસપાસના લોકો પણ દોડી આવ્યા હતા.
બોલેરો ચાલકનું ઘટના સ્થળે મોત
ઘટનાની ગંભીરતાને ધ્યાનમાં રાખીને તાત્કાલિક ધોરણે '108' એમ્બ્યુલન્સને ફોન કરીને બોલાવવામાં આવી હતી, જે સમયસર સ્થળ પર પહોંચી ગઈ હતી. 108 ના ફરજ પરના તબીબે બોલેરો પિકઅપ ગાડીના ચાલકની તપાસ કરી મૃત જાહેર કર્યો હતો, કારણ કે અકસ્માતની તીવ્રતા એટલી વધુ હતી કે તેનું ઘટનાસ્થળે જ પ્રાણપંખેરુ ઉડી ગયું હતું. બીજી તરફ, ગંભીર રીતે ઘવાયેલા આઈસર ચાલક રાજેશકુમારને તાત્કાલિક એસ.એસ.જી. હોસ્પિટલ ખાતે ખસેડવામાં આવ્યા હતા.
આઈસર ચાલકને ગંભીર ઈજાઓ પહોંચી
એસ.એસ.જી. હોસ્પિટલના સર્જિકલ આઈ.સી.યુ. વોર્ડમાં ફરજ પરના તબીબો દ્વારા રાજેશકુમારની ઝીણવટભરી શારીરિક તપાસ કરવામાં આવી હતી. પ્રાથમિક તપાસમાં તેમના જમણા પગ તથા જમણા ખભા પર ગંભીર ફ્રેક્ચર હોવાનું અને પેટના ભાગે તેમજ આંતરિક શરીરે ગંભીર ઈજાઓ પહોંચી હોવાનું બહાર આવ્યું હતું. હાલ હોસ્પિટલ ખાતે તેમની સઘન સારવાર ચાલી રહી છે.
આ અકસ્માતના બનાવ અંગે ઈજાગ્રસ્ત આઈસરચાલક રાજેશકુમાર રાવની ફરિયાદને આધારે હરણી પોલીસે બેફામ અને ગફલતભરી રીતે વાહન ચલાવી અકસ્માત સર્જનાર બોલેરો પિકઅપ ગાડીના મૃત ચાલક વિરુદ્ધ કાયદેસરની ફરિયાદ નોંધી છે. હાઇવે પર બનેલી આ દુર્ઘટનાને પગલે ટ્રાફિક વ્યવસ્થા પણ થોડા સમય માટે પ્રભાવિત થઈ હતી, અને પોલીસે સ્થિતિ સંભાળીને વધુ તપાસ શરૂ કરી છે.
