Bullet Train Project Vadodara: દેશના અતિમહત્વાકાંક્ષી મુંબઈ-અમદાવાદ બુલેટ ટ્રેન પ્રોજેક્ટે વડોદરામાં એક મહત્વપૂર્ણ અને જટિલ પડાવ સફળતાપૂર્વક પાર કર્યો છે. દેશના સૌથી વ્યસ્ત રેલવે રૂટ્સમાંથી એક એવા દિલ્હી-મુંબઈ રાજધાની મેઇન લાઇનની ઉપર તમામ 14 પોર્ટલ બીમ્સ સફળતાપૂર્વક સ્થાપિત કરી દેવામાં આવ્યા છે. આ કામગીરી પૂર્ણ થવાથી હવે બુલેટ ટ્રેન વાયાડક્ટના ઇન્ટિગ્રેશન અને નિર્માણ કાર્યને અભૂતપૂર્વ ઝડપ મળશે.
5 રેલવે લાઇનને ડાયાગોનલી ક્રોસ કરતી ગીચ વસ્તી વચ્ચે કામગીરી
વડોદરામાં બુલેટ ટ્રેનનો આ ભાગ આશરે 8.3 કિલોમીટર લાંબો છે, જે અત્યંત ગીચ વસ્તી અને સતત ધમધમતા રેલવે નેટવર્ક વચ્ચેથી પસાર થાય છે. અહીં બુલેટ ટ્રેનનો ટ્રેક ભારતીય રેલવેની પાંચ લાઇનોને ડાયાગોનલી ક્રોસ કરે છે. ચાલુ રેલ વ્યવહારને સહેજ પણ અસર પહોંચાડ્યા વગર પૂરતું ક્લિયરન્સ મેળવવું એ એન્જિનિયરો માટે મોટો આહ્વાન હતો.
સુરત અને અમદાવાદ તરફ વિશેષ ડિઝાઇનવાળા 14 પોર્ટલ બીમ્સ
આ પડકારને પહોંચી વળવા માટે ખાસ ડિઝાઇનની મદદથી 14 પોર્ટલ બીમ્સ તૈયાર કરવામાં આવ્યા છે-
સુરત તરફ (વડોદરા સ્ટેશન અને વિશ્વામિત્રી વચ્ચે): 10 પોર્ટલ બીમ
અમદાવાદ તરફ (વડોદરા અને છાયાપુરી વચ્ચે): 4 પોર્ટલ બીમ
એક-એક બીમનું વજન 1,500 ટન: 'કાસ્ટ-ઇન-સિટુ' પદ્ધતિનો ઉપયોગ
જગ્યાની ભારે અછત અને સતત ચાલુ રહેતા રેલ ટ્રાફિકને કારણે પ્રીકાસ્ટ પદ્ધતિને બદલે આ બીમ્સને ઘટનાસ્થળે જ એટલે કે 'કાસ્ટ-ઇન-સિટુ' (Cast-in-situ) પદ્ધતિથી તૈયાર કરાયા છે. ટ્રેક પર નિર્માણ પામેલા પ્રત્યેક પોર્ટલ બીમનું વજન તૈયાર થયા બાદ આશરે 1,500 ટન જેટલું ભારેખમ છે.
હવે 40 મીટર લાંબા ગર્ડર્સ મૂકવાનો માર્ગ સરળ થયો
આ 14 પોર્ટલ બીમ્સ તૈયાર થઈ જવાથી હવે રાજધાની મેઇન લાઇનની ઉપર આશરે 40 મીટર લાંબા કમ્પોઝિટ ગર્ડર્સ મૂકવાનો માર્ગ મોકળો થયો છે, જ્યારે બાકીના ભાગોમાં 'સ્પાન-બાય-સ્પાન' ટેક્નોલોજીથી વાયડક્ટ તૈયાર કરાશે. આ સફળતાથી વડોદરાના સંવેદનશીલ રેલવે ઝોનમાંથી એલિવેટેડ બુલેટ ટ્રેન કોરિડોરને આગળ ધપાવવાનું એક મોટું સ્ટ્રક્ચરલ કામ સફળતાપૂર્વક સંપન્ન થયું છે.