Vadodara News: સાંસ્કૃતિક નગરી અને ગરબા માટે વિશ્વભરમાં પ્રખ્યાત વડોદરા શહેરમાં નવરાત્રીના પવિત્ર તહેવાર પૂર્વે એક મહત્વપૂર્ણ બેઠકનું આયોજન કરવામાં આવ્યું હતું. વડોદરા સર્કિટ હાઉસ ખાતે ભાજપ વડોદરા મહાનગર દ્વારા શહેરના વિવિધ ગરબા આયોજકો સાથે એક ખાસ બેઠક અને સંવાદ યોજાયો હતો. આ બેઠકનો મુખ્ય ઉદ્દેશ્ય આગામી નવરાત્રી મહોત્સવને માત્ર ધાર્મિક અને સાંસ્કૃતિક ઉત્સવ પૂરતો સીમિત ન રાખતા, તેના માધ્યમથી સામાજિક જાગૃતિ લાવવાનો છે.
આ ખાસ બેઠકનું આયોજન દેશના વડાપ્રધાન નરેન્દ્ર મોદીના જાહેર જીવનમાં સેવા અને સમર્પણના 25 વર્ષ પૂર્ણ થવાના ઐતિહાસિક અવસરે યોજાઈ રહેલા ‘સેવા સંકલ્પ અભિયાન’ અંતર્ગત કરવામાં આવ્યું હતું. વડોદરાના ગરબા મહોત્સવમાં દર વર્ષે લાખોની સંખ્યામાં યુવાનો ઉત્સાહભેર ભાગ લે છે. આ બાબતને ધ્યાનમાં રાખીને, ભાજપ સંગઠન દ્વારા ગરબા આયોજકોને ખાસ અપીલ કરવામાં આવી હતી કે તેઓ આ વિશાળ યુવા શક્તિનો ઉપયોગ સામાજિક સુધારણા માટે કરે.
બેઠકમાં યુવાનોમાં ‘નશા મુક્ત ભારત’નો સંદેશ ફેલાવવા અને વડોદરાને સંપૂર્ણપણે ‘ડ્રગ્સ મુક્ત શહેર’ બનાવવા માટે ગરબાના મંચ પરથી પ્રયાસો હાથ ધરવા વિનંતી કરાઈ હતી. આ ઉપરાંત, નવરાત્રી દરમિયાન ગરબા ગ્રાઉન્ડ્સ અને તેની આસપાસના વિસ્તારોમાં સ્વચ્છતા જાળવવા તેમજ ખેલૈયાઓ અને દર્શકોમાં સ્વચ્છતા પ્રત્યે જાગૃતિ લાવવા અંગે પણ વિગતવાર ચર્ચા કરવામાં આવી હતી. આયોજકોને વિનંતી કરવામાં આવી હતી કે તેઓ ગરબા સ્થળો પર સ્વચ્છતા સંબંધિત બેનરો અને એનાઉન્સમેન્ટ દ્વારા નાગરિકોને પ્રેરિત કરે.
બેઠકમાં વર્ષ 2047 સુધીમાં ‘વિકસિત ભારત’ના સંકલ્પને સાકાર કરવા માટે યુવાનો અને નાગરિકોમાં રાષ્ટ્રપ્રેમ તથા જવાબદારીની ભાવના જાગૃત કરવા પર વિશેષ ભાર મૂકવામાં આવ્યો હતો. કાર્યક્રમ બાદ વડોદરા શહેર ભાજપ પ્રમુખ જયપ્રકાશ સોનીએ ગુજરાતી જાગરણ સાથે વાતચીત કરતા જણાવ્યું હતું કે, વડોદરાના ગરબા એ આપણી ઓળખ છે. યુવા શક્તિને સકારાત્મક દિશા આપવા અને વડાપ્રધાનશ્રીના સેવા સંકલ્પને જન-જન સુધી પહોંચાડવા માટે ગરબા આયોજકોનો સહયોગ ખૂબ જ મહત્વપૂર્ણ સાબિત થશે.