પ્રશાંત ગજ્જર, વડોદરા: વડોદરા શહેરના મુખ્ય અને વ્યસ્ત એવા પંડ્યા બ્રિજ પર આજે એક અત્યંત કરૂણ અને હચમચાવી દેનારી માર્ગ દુર્ઘટના સર્જાઈ હતી. બાઈક પર સવાર થઈને પસાર થઈ રહેલા યુવક અને યુવતીને અચાનક કોઈ ભારદારી વાહને જોરદાર ટક્કર મારતાં બંને વાહનની અડફેટે આવી ગયા હતા. આ ગંભીર અકસ્માતમાં ભારદારી વાહન નીચે કચડાઈ જવાથી યુવક અને યુવતીનું ઘટનાસ્થળે જ કમકમાટીભર્યું મોત નીપજ્યું હતું. એકસાથે બે જીવ ગુમાવવાના આ ગોઝારા બનાવથી મૃતકોના પરિવારજનો તેમજ સમગ્ર પંથકમાં ઘેરા શોક અને અરેરાટીની લાગણી ફેલાઈ ગઈ છે.
પંડ્યા બ્રિજ પર ગોઝારો અકસ્માત
આ પણ વાંચો
મળતી વિગતો અનુસાર, પંડ્યા બ્રિજ પરથી બાઈક લઈને પસાર થતી વેળાએ આ યુવક અને યુવતીને ભારદારી વાહને અડફેટે લીધા હતા. ટક્કર એટલી ભયાનક હતી કે બંને જણા વાહન નીચે કચડાઈ ગયા હતા અને ઘટનાસ્થળે જ તેમને દમ તોડી દીધો હતો. અકસ્માત સર્જાયા બાદ ભારદારી વાહનનો ચાલક પોતાનું વાહન લઈને ઘટનાસ્થળેથી ફરાર થઈ ગયો હતો. દુર્ઘટનાના પગલે આસપાસના લોકોના ટોળાં એકત્ર થઈ ગયા હતા અને બ્રિજ પર વાહનોની અવરજવર ખોરવાઈ જતાં લાંબો ટ્રાફિક જામ સર્જાયો હતો.
યુવક અને યુવતીનું ઘટના સ્થળે મોત
આ કરૂણ ઘટનાની જાણ થતાં જ ફતેગંજ પોલીસનો કાફલો તાત્કાલિક ઘટનાસ્થળે દોડી આવ્યો હતો. પોલીસે પરિસ્થિતિ પર કાબૂ મેળવી ટ્રાફિક હળવો કરવાની કામગીરી સાથે બંને મૃતદેહોનો કબજો લીધો હતો અને પોસ્ટમોર્ટમ માટે ગોત્રી હોસ્પિટલ ખાતે ખસેડવાની તજવીજ હાથ ધરી હતી.
આરોપી વાહન છોડી ફરાર થયો
હાલ ફતેગંજ પોલીસ દ્વારા મૃત્યુ પામેલા યુવક અને યુવતીની ઓળખ પ્રસ્થાપિત કરવા માટે વિવિધ દિશામાં તપાસ શરૂ કરવામાં આવી છે. આ ઉપરાંત, અકસ્માત સર્જીને નાસી છૂટેલા ભારદારી વાહન અને તેના ચાલકને ઝડપી પાડવા માટે પણ પોલીસે કાયદેસરની કાર્યવાહી તેજ કરી છે.
