Wadhwan Mela Accident: સુરેન્દ્રનગર જિલ્લાના વઢવાણ ખાતે આયોજિત જન્માષ્ટમી લોકમેળામાં મોડી રાત્રે એક ગંભીર દુર્ઘટના સર્જાઈ છે. મેળામાં રાઈડ્સની મજા માણી રહેલી 12 વર્ષની એક કિશોરી ઊંચાઈ પર ફરતા મોટા ચકડોળમાંથી નીચે પટકાઈ હતી. આ ગંભીર અકસ્માતમાં કિશોરીનું કરુણ મોત નીપજ્યું છે.
ચકડોળમાંથી પટકાતા કિશોરીને ગંભીર ઈજાઓ
આ પણ વાંચો
મળતી માહિતી મુજબ, વઢવાણના આ લોકમેળામાં પાલખીવાળા મોટા ચકડોળમાં કિશોરી બેઠી હતી. ચાલુ ચકડોળમાંથી અચાનક કોઈ કારણોસર કિશોરી નીચે પટકાઈ હતી. આટલી ઊંચાઈ પરથી નીચે પટકાવાને કારણે કિશોરીને શરીરે અને માથાના ભાગે ગંભીર ઈજાઓ પહોંચી હતી. અકસ્માત સર્જાતા જ મેળામિલાપ અને આનંદના વાતાવરણમાં ભારે ચીસાચીસ અને નાસભાગ મચી ગઈ હતી.
પોલીસ કર્મચારીની પુત્રીનું મોત, પરિવારમાં માતમ
લોહીલુહાણ હાલતમાં કિશોરીને તાત્કાલિક સારવાર અર્થે હોસ્પિટલ ખસેડવામાં આવી હતી. જ્યાં ટૂંકી સારવાર દરમિયાન કિશોરીનું મોત નીપજ્યું હતું. પોલીસની પ્રાથમિક તપાસમાં મૃતક કિશોરીની ઓળખ થઈ ગઈ છે. મૃતક 12 વર્ષીય કિશોરીનું નામ નિહારિકા પરમાર છે અને તેના પિતા થાન પોલીસ મથકમાં પોલીસ કર્મચારી તરીકે ફરજ બજાવે છે.
રાઈડ્સ સંચાલક સામે પોલીસમાં ગુનો, તપાસ તેજ
આ ઘટનાની જાણ થતાં જ પોલીસ કાફલો તાત્કાલિક ઘટનાસ્થળે અને હોસ્પિટલે દોડી ગયો હતો. પોલીસે કિશોરીના મૃતદેહને પોસ્ટમોર્ટમ અર્થે સરકારી હોસ્પિટલ ખસેડ્યો છે. આ રાઈડમાં સેફ્ટી લોક કે સુરક્ષાના માપદંડોની કોઈ બેદરકારી હતી કે કેમ, તે દિશામાં તપાસ કરવા માટે પોલીસે રાઈડ્સ સંચાલકો સામે ગુનો નોંધીને તપાસ શરૂ કરી છે.