Surat Road Accident: ઓલપાડ તાલુકાના સાયણ-દેલાડ રોડ પર ડમ્પર ચાલકે મોપેડ સવાર યુવતીને અડફેટે લીધી હતી. આ અકસ્માત એટલો ભયાનક હતો કે, યુવતીનું શરીર ટાયરમાં ખેચાઈ ગયું હતું.
આ અંગે પ્રાપ્ત વિગતો પ્રમાણે, દેલાડ ગામની સાઈબાબા નગર સોસાયટીમાં રહેતી મિતાલી પરમાર (28) મોપેડ પર સાયણથી દેલાડ પાટીયા તરફ જઈ રહી હતી. આ દરમિયાન પરીઆ ગામની સીમમાં કાકા કોમ્પલેક્સ સામે પાછળથી માંતેલા સાંઢની માફક ધસી આવેલા ડમ્પરે મિતાલીના મોપેડને ઉલાળ્યું હતુ.
આ પણ વાંચો
ડમ્પરની ટક્કરથી મોપેડ સવાર યુવતી હવામાં ફંગોળાઈને નીચે પટકાઈ હતી. આ સાથે જ ડમ્પરનું તોતિંગ ટાયર તેના શરીર ઉપરથી ફરી વળ્યું હતુ. જેના પગલે રોડ પર લોહીના લિસોટા તેમજ માંસના લોચેલોચા વેરવિખેર થઈ ગયા હતા.
આ અકસ્માતના પગલે લોકોના ટોળા એકઠા થઈ ગયા હતા. બીજી તરફ આ બનાવની જાણ થતાં સ્થાનિક પોલીસની ટીમ તાત્કાલિક સ્થળ પર આવી પહોંચી હતી. હાલ તો ડમ્પર ચાલક વિરુદ્ધ ગુનો નોંધીને આગળની કાયદેસરની કાર્યવાહી હાથ ધરી છે.