Western Railway: પશ્ચિમ રેલવે દ્વારા કચ્છના રેલવે ઇન્ફ્રાસ્ટ્રક્ચરને આધુનિક બનાવવાના હેતુથી હાથ ધરાયેલ ગાંધીધામ–આદિપુર ચૌહરીકરણ (Quadrupling) અને 'Y' કનેક્ટિવિટીનું કાર્ય સફળતાપૂર્વક પૂર્ણ થયું છે. 10 ફેબ્રુઆરીના રોજ રેલ સુરક્ષા આયુક્ત (CRS) દ્વારા હાથ ધરવામાં આવેલ સ્પીડ ટ્રાયલમાં ટ્રેને 120 કિમી પ્રતિ કલાકની ઝડપ હાંસલ કરી એક નવો વિક્રમ સ્થાપિત કર્યો છે.
મહાવીર ચક્ર વિજેતાના નામે ગુંજ્યું એન્જિન
આ ઐતિહાસિક સ્પીડ ટ્રાયલ 'મહાવીર ચક્ર કેપ્ટન કપિલ સિંહ થાપા' નામના શક્તિશાળી એન્જિન સાથે કરવામાં આવ્યું હતું. રેલ સુરક્ષા આયુક્ત ઈ. શ્રીનિવાસ અને અમદાવાદ ડિવિઝનના રેલવે અધિકારીઓની હાજરીમાં આ નવા ટ્રેકનું બારીકાઈથી નિરીક્ષણ કરવામાં આવ્યું હતું.
પોર્ટ કનેક્ટિવિટીમાં ક્રાંતિ: ક્ષમતા 50થી વધીને 150 ટ્રેન થશે
કંડલા અને મુન્દ્રા બંદરથી થતા માલ પરિવહન માટે આ રેલખંડ અત્યંત વ્યસ્ત રહેતો હતો.
બમણી ગતિ: ત્રીજી અને ચોથી લાઇન શરૂ થવાથી હવે આ સેક્શન પર દરરોજની 150 જેટલી માલગાડીઓ દોડાવી શકાશે, જે હાલમાં માત્ર 50-60ની ક્ષમતા ધરાવે છે.
લોજિસ્ટિક ખર્ચમાં ઘટાડો: માલગાડીઓના ટર્નઅરાઉન્ડ સમયમાં ઘટાડો થવાથી કન્ટેનર, પેટ્રોલિયમ, ખાતર અને મીઠાના પરિવહનમાં ઝડપ આવશે, જેનો સીધો લાભ સ્થાનિક ઉદ્યોગોને મળશે.
'Y' કનેક્ટિવિટી અને ગોપાલપુરી સ્ટેશન: સમયની મોટી બચત
આ પ્રોજેક્ટની સૌથી મહત્વની વિશેષતા 'વાય' કનેક્ટિવિટી અને નવનિર્મિત ગોપાલપુરી સ્ટેશન છે:
એન્જિન રિવર્સલની મુક્તિ: અત્યાર સુધી અમદાવાદ તરફથી આવતી ટ્રેનોને ભુજ જવા માટે ગાંધીધામમાં એન્જિનની દિશા બદલવી પડતી હતી. હવે ગોપાલપુરી સ્ટેશનથી ટ્રેન સીધી જ ભુજ તરફ જઈ શકશે.
સમય અને ઇંધણ: આ ફેરફારથી પ્રત્યેક ટ્રેનનો 20थ 25 મિનિટનો સમય બચશે અને ઇંધણના વપરાશમાં પણ નોંધપાત્ર ઘટાડો થશે.
| પ્રોજેક્ટની વિગત | આંકડાકીય માહિતી |
| રેલખંડની લંબાઈ | 10.69 કિમી |
| મહત્તમ ઝડપ | 120 કિમી/કલાક |
| ટ્રાયલ તારીખ | 10 ફેબ્રુઆરી 2026 |
| સમયની બચત | 20-25 મિનિટ |
કચ્છના વિકાસમાં સોનામાં સુગંધ ભળશે
ગાંધીધામ શહેરના 78મા સ્થાપના દિવસના પૂર્વે મળેલી આ ભેટ કચ્છના સામાજિક અને આર્થિક વિકાસને નવી ઊંચાઈ પર લઈ જશે. પર્યટન, રોજગારી અને ઔદ્યોગિક રોકાણ માટે આ મજબૂત રેલવે નેટવર્ક પાયાનો પથ્થર સાબિત થશે.