Rajkot Lodhika Cooperative Sangh Election: રાજકોટ-લોધિકા સહકારી સંઘની પ્રતિષ્ઠિત ચૂંટણી સંપન્ન થયા બાદ હવે ભાજપ સંગઠનમાં આંતરિક વિવાદ ચરમસીમાએ પહોંચ્યો છે. પક્ષ દ્વારા જાહેર કરાયેલા સત્તાવાર મેન્ડેટની અવગણના કરી ચૂંટણી મેદાનમાં ઉતરેલા 4 અગ્રણીઓ સામે જિલ્લા ભાજપ સંગઠને લાલ આંખ કરી છે અને તેમની સામે શિસ્તભંગના કડક પગલાં લેવા માટે પ્રદેશ મોવડીમંડળને રિપોર્ટ સોંપ્યો છે.
આ અંગે પ્રાપ્ત વિગતો મુજબ, સહકારી સંઘની ચૂંટણીમાં પક્ષના વલણ વિરુદ્ધ જઈ કેટલાક આગેવાનોએ બળવાખોર ઉમેદવારી નોંધાવી હતી. આ બાબતને ગંભીર શિસ્તભંગ ગણી રાજકોટ જિલ્લા ભાજપ પ્રમુખ અલ્પેશ ઢોલરિયાએ સીધો પ્રદેશ અધ્યક્ષ સમક્ષ પત્ર વ્યવહાર કર્યો છે.
આ પણ વાંચો
પત્રમાં પક્ષ વિરોધી પ્રવૃત્તિ અને મેન્ડેટનું ઉલ્લંઘન કરવા બદલ ચારેય આગેવાનો સામે આકરા પગલાં ભરવાની ભારપૂર્વક માંગણી કરવામાં આવી છે.
વિજયભાઇ સખીયા – ડિરેક્ટર રાજકોટ ડેરી તેમજ પ્રતિનિધિ રાજકોટ ડિસ્ટ્રિક બેંક લી
વિજયભાઈ કોરાટ - વાઇસ ચેરમેન રાજકોટ માર્કેટયાર્ડ
જયેશભાઈ બોઘરા - ચેરમેન રાજકોટ માર્કેટયાર્ડ
ભૂપતસિંહ જાડેજા – પ્રમુખ વાજડી ગામ સેવા સહકારી મંડળી
સહકારી માળખામાં પક્ષના આદેશનું ઉલ્લંઘન કરનારા નેતાઓ સામે સંગઠન દ્વારા હાથ ધરાયેલી આ આકરી કવાયતથી જિલ્લાના રાજકીય વર્તુળોમાં ભારે ગરમાવો આવી ગયો છે. પ્રદેશ કક્ષાએથી હવે આ આગેવાનો સામે સસ્પેન્શન કે અન્ય કયા પ્રકારના શિક્ષાત્મક પગલાં લેવાય છે તેના પર સૌની નજર ટકેલી છે.