Panchmahal News: આસો નવરાત્રિના મહાપર્વ નિમિત્તે પ્રસિદ્ધ શક્તિપીઠ પાવાગઢ ખાતે આઠમના પવિત્ર દિવસે ભક્તિમય માહોલ જોવા મળ્યો હતો. મા મહાકાળીના ધામમાં વહેલી સવારથી જ શ્રદ્ધાળુઓનું ઘોડાપૂર ઉમટી પડ્યું હતું. રજાનો દિવસ અને આઠમના મહાત્મયનો સંગમ થતાં સમગ્ર ડુંગર ‘જય મહાકાળી’ના ભક્તિસભર જયઘોષથી ગુંજી ઊઠ્યો હતો અને વાતાવરણમાં એક અનોખી દિવ્યતા છવાઈ ગઈ હતી.
નવરાત્રિમાં શક્તિપીઠ પાવાગઢના દર્શનનું અનોખું ધાર્મિક મહત્વ હોવાથી ગુજરાત ઉપરાંત પાડોશી રાજ્યોમાંથી પણ મોટી સંખ્યામાં માઈભક્તો ઉમટી પડ્યા હતા. તળેટીથી લઈને મંદિર પરિસર સુધી ભક્તોની કિલોમીટરો લાંબી કતારો જોવા મળી હતી. માતાજીના નિજ મંદિરમાં શીશ નમાવી ભક્તોએ પોતાના પરિવારમાં સુખ, શાંતિ, સમૃદ્ધિ અને ઉત્તમ સ્વાસ્થ્ય જળવાઈ રહે તે માટે ભાવપૂર્વક પ્રાર્થના કરી હતી. દર્શનાર્થીઓની અવિરત ભીડને ધ્યાનમાં રાખીને મંદિરના દ્વાર વહેલી સવારથી ખુલ્લા મુકવામાં આવ્યા છે અને મોડી રાત સુધી ખુલ્લા રાખવામાં આવશે.
મહાઅષ્ટમીના દિવસે શ્રદ્ધાળુઓના આ ભારે ઘસારાને પહોંચી વળવા મંદિર ટ્રસ્ટ અને જિલ્લા વહીવટી તંત્ર દ્વારા વ્યાપક પૂર્વતૈયારીઓ સાથે કડક સુરક્ષા વ્યવસ્થા ગોઠવવામાં આવી છે. પદયાત્રિકો માટેના પગથિયાં તેમજ રોપ-વે સ્ટેશન પર ભીડનું યોગ્ય નિયંત્રણ થાય તે માટે હોમગાર્ડ અને પોલીસ કાફલો તૈનાત કરાયો છે. આ ઉપરાંત, તડકા અને ગરમી વચ્ચે યાત્રાળુઓ માટે ઠંડા પીવાના પાણીની સુવિધા, છાંયડાની વ્યવસ્થા તેમજ કોઈપણ કટોકટી માટે ઇમરજન્સી મેડિકલ કેમ્પ અને એમ્બ્યુલન્સની ટીમ પણ ખડેપગે રાખવામાં આવી હતી.
વર્ષો જૂની પવિત્ર પરંપરા અનુસાર, આવતીકાલે સાંજે 4 વાગ્યે મંદિર પરિસરમાં ભવ્ય નવચંડી યજ્ઞ તેમજ હવન-પૂજાનું ખાસ આયોજન કરવામાં આવ્યું છે. ભૂદેવો અને પંડિતોના શાસ્ત્રોક્ત વૈદિક મંત્રોચ્ચાર વચ્ચે મા મહાકાળીની વિશેષ આરાધના કરાશે અને યજ્ઞકુંડમાં નાળિયેર પધરાવી હોમ-હવન સંપન્ન કરાશે. આ પવિત્ર મહોત્સવમાં પાવાગઢ મંદિર ટ્રસ્ટના સભ્યો, વહીવટી તંત્રના ઉચ્ચ અધિકારીઓ તેમજ હજારોની સંખ્યામાં યાત્રાળુઓ હાજર રહી પુણ્યનું ભાથું બાંધશે. આ ભવ્ય અને દિવ્ય નવચંડી યજ્ઞની પૂર્ણાહુતિ સાથે જ આ વર્ષના આસો નવરાત્રિ મહોત્સવની શ્રદ્ધા અને ભક્તિસભર વાતાવરણમાં સંપન્નતા થશે.