102 Year Old Jethiben Climbs Pavagadh: પંચમહાલના પાવાગઢ ખાતે શ્રદ્ધા અને આત્મવિશ્વાસનું અદ્ભુત અને પ્રેરણાદાયી દ્રશ્ય જોવા મળ્યું છે. જામનગર જિલ્લાના આમરા ગામના 102 વર્ષીય જેઠીબેન ભગવાનજી કણજારીયાએ પોતાની વયમર્યાદાને બાજુ પર રાખીને પરિવાર સાથે પગથિયાં ચઢીને મહાકાળી માતાના દર્શન કર્યા હતા. ત્રીજી પેઢીના બાળકને સાકરથી તોલવાની ધાર્મિક વિધિમાં સામેલ થવા આવેલા જેઠીબેને પોતાની અડગ આસ્થા અને મનોબળથી આ યાત્રાને સૌ માટે યાદગાર બનાવી દીધી.
ત્રીજી પેઢીના બાળકની માનતા પૂર્ણ કરવા પહોંચ્યા
સામાન્ય રીતે વધતી વય સાથે શારીરિક ક્ષમતા મર્યાદિત બનતી જાય છે, અને ઊંચા ડુંગર પર ચઢવું પડકારરૂપ બને છે. પરંતુ જેઠીબેનની ભક્તિ અને જુસ્સાએ આ મુશ્કેલીને સરળ બનાવી દીધી. તેમને પાવાગઢના પગથિયાં ચઢતા જોઈને મંદિર પરિસરમાં ઉપસ્થિત અન્ય શ્રદ્ધાળુઓ પણ આશ્ચર્યચકિત થઈ ગયા હતા. પરિવારના સભ્યો માટે આ ક્ષણ અત્યંત ભાવનાત્મક અને ગૌરવપૂર્ણ રહી હતી.
ભક્તિ અને જુસ્સા સામે શારીરિક મર્યાદા ટૂંકી પડી
આજની આ ભાગદોડ ભરેલી જીવનશૈલીમાં નાની-નાની મુશ્કેલીઓથી હારી જતી નવી પેઢી માટે જેઠીબેને એક જીવંત ઉદાહરણ પૂરું પાડ્યું છે. તેમની આ યાત્રા સાબિત કરે છે કે જો મનમાં દ્રઢ નિશ્ચય, શ્રદ્ધા અને ઉત્સાહ હોય, તો કોઈપણ ઉંમરે મોટામાં મોટા પડકારોને પાર કરી શકાય છે. જેઠીબેનની આ પ્રેરણાદાયી ઘટના વર્તમાન સમયમાં યુવા પેઢી માટે આશા અને હિંમતનો મોટો સંદેશ આપી રહી છે.