Ambaji Mela 2026 Report: શક્તિપીઠ અંબાજી ખાતે ચાલી રહેલા ભાદરવી પૂનમ મહામેળામાં દર વર્ષની જેમ આ વર્ષે પણ ભક્તોનો અપાર ઉત્સાહ જોવા મળી રહ્યો છે. દેશ-વિદેશથી લાખો માઈભક્તો અંબાજી તરફ પદયાત્રા કરીને કે વાહનો દ્વારા મા અંબાના દરબારમાં હાજરી આપી રહ્યા છે. શ્રી અંબાજી માતા દેવસ્થાન ટ્રસ્ટ દ્વારા જાહેર કરવામાં આવેલા તાજેતરના દૈનિક ડેટા રિપોર્ટ મુજબ, મેળાના શરૂઆતના ચાર દિવસોમાં જ શ્રદ્ધાળુઓની સંખ્યાએ રેકોર્ડ બનાવ્યા છે.
4 દિવસમાં 27 લાખથી વધુ શ્રદ્ધાળુઓ દ્વારા દર્શન
આ પણ વાંચો
દેવસ્થાન ટ્રસ્ટના રિપોર્ટ અનુસાર, 20 સપ્ટેમ્બરથી 23 સપ્ટેમ્બર (સાંજે 5:00 વાગ્યા સુધી) દરમિયાન કુલ 27,27,512 ભક્તોએ મા અંબાના દર્શનનો લહાવો લીધો છે.
- મેળાના પ્રથમ દિવસે એટલે કે 20 સપ્ટેમ્બરે 4,37,850 ભક્તો આવ્યા હતા.
- 21 સપ્ટેમ્બરે 4,25,627 ભક્તોએ દર્શન કર્યા હતા.
- 22 સપ્ટેમ્બરે ભક્તોની સંખ્યા વધીને 7,21,906 પર પહોંચી હતી.
- જ્યારે 23 સપ્ટેમ્બરના રોજ એક જ દિવસમાં સૌથી વધુ 11,42,129 ભક્તો ઉમટી પડ્યા હતા.
પદયાત્રીઓ અને વાહનોની નોંધપાત્ર ઉપસ્થિતિ
અંબાજી આવતા માર્ગો પર પદયાત્રીઓની કીડીયારું ઉભરાયું હોય તેવું દ્રશ્ય જોવા મળી રહ્યું છે. ચાર દિવસ દરમિયાન કુલ 39,888 થી વધુ વાહનો દ્વારા ભક્તો પહોંચ્યા છે, જ્યારે હજારોની સંખ્યામાં પદયાત્રી સંઘોએ માર્ગોને ગજાવ્યા છે. અંબાજી તરફ જતા દરેક માર્ગ પર "બોલ માડી અંબે, જય અંબે"ના નાદ સાથે વાતાવરણ સંપૂર્ણપણે ભક્તિમય બની ગયું છે.
મહાપ્રસાદ અને ભોજનાલયની વિશાળ વ્યવસ્થાઓ
માઈભક્તોને કોઈપણ પ્રકારની અગવડ ન પડે તે માટે ટ્રસ્ટ અને સેવાભાવી સંસ્થાઓ દ્વારા અદ્ભુત વ્યવસ્થાઓ કરવામાં આવી છે:
મોહનથાળ પ્રસાદ વિતરણ: મેળા દરમિયાન પ્રસાદ મેળવવા માટે ભક્તોની ભારે ભીડ જોવા મળી રહી છે. અત્યાર સુધીમાં લાખોની સંખ્યામાં મોહનથાળ અને ચિક્કી પ્રસાદના પેકેટ્સનું વિતરણ કરવામાં આવ્યું છે. કુલ 22,73,240 થી વધુ પ્રસાદ પેકેટ્સની વહેંચણી થઈ ચૂકી છે.
નિઃશુલ્ક ભોજનાલય: ટ્રસ્ટના ભોજનાલયો અને વિવિધ સેવા કેમ્પોમાં કુલ 3,51,047થી વધુ ભક્તોએ મહાપ્રસાદનો લાભ લીધો છે.
આરોગ્ય સેવાઓ: પદયાત્રીઓના સ્વાસ્થ્યને ધ્યાનમાં રાખીને તબીબી કેમ્પો દ્વારા 1,75,963થી વધુ દર્દીઓને પ્રાથમિક સારવાર અને દવાઓ પૂરી પાડવામાં આવી છે.
અંબાજીનો આ મહામેળો આસ્થા, અનુશાસન અને ઉત્તમ વ્યવસ્થાપનનું અનોખું ઉદાહરણ પૂરું પાડી રહ્યો છે, જ્યાં લાખો ભક્તો કોઈપણ વિઘ્ન વિના શાંતિપૂર્ણ રીતે મા અંબાના ચરણોમાં શીશ ઝુકાવીને ધન્યતા અનુભવી રહ્યા છે.