Bhadarvi Poonam Mela 2026: આગામી તા. 20/09/2026 થી તા. 26/09/2026 દરમિયાન અંબાજી ખાતે વિશ્વપ્રસિદ્ધ 'ભાદરવી પૂનમ મહામેળો-2026' યોજાનાર છે. આ પ્રસંગે દેશ-વિદેશથી લાખો માઈભક્તો આસ્થાભેર પગપાળા યાત્રા કરીને માં અંબાના દર્શનાર્થે અંબાજી ધામ પહોંચે છે. પદયાત્રીઓની આ પવિત્ર મુસાફરી વધુ સુગમ, સુરક્ષિત અને અનુકૂળ રહે તે માટે બનાસકાંઠા જિલ્લા વહીવટી તંત્ર અને અંબાજી મંદિર ટ્રસ્ટ દ્વારા વિશેષ આગોતરું આયોજન કરવામાં આવ્યું છે.
28 વિશેષ સમિતિઓ દ્વારા વ્યાપક તૈયારીઓ
જિલ્લા કલેક્ટર અને અંબાજી મંદિર ટ્રસ્ટના અધ્યક્ષ મિહિર પટેલના માર્ગદર્શન હેઠળ 28 અલગ-અલગ સમિતિઓની રચના કરવામાં આવી છે. આ સમિતિઓ પદયાત્રીઓની સુવિધા, સ્વાસ્થ્ય, સુરક્ષા અને ટ્રાફિક નિયંત્રણ માટે સતત કાર્યરત રહીને માઈભક્તોની સેવાને સર્વોપરી રાખી રહી છે.
હરતા-ફરતા (મોબાઈલ) સેવા કેમ્પો માટે ઓનલાઈન નોંધણી ફરજિયાત
મહામેળા દરમિયાન પદયાત્રીઓની સેવા માટે વિવિધ સંસ્થાઓ અને સેવાભાવીઓ દ્વારા સ્થાયી કેમ્પો ઉપરાંત વાહનો મારફતે આઈસ્ક્રીમ, ઠંડા પીણાં, ફળો અને પાણી જેવી ખાદ્યસામગ્રીનું વિતરણ કરતા હરતા-ફરતા (મોબાઈલ) કેમ્પો ચલાવવામાં આવે છે.
રજિસ્ટ્રેશન પ્રક્રિયા: આ સેવાઓ તમામ યાત્રાળુઓ સુધી વ્યવસ્થિત રીતે પહોંચે અને માર્ગો પર ટ્રાફિક કે ભીડભાડની અગવડ ન સર્જાય તે માટે મંદિર ટ્રસ્ટની સત્તાવાર વેબસાઇટ www.ambajitemple.in પર સરળ ઓનલાઇન નોંધણીની વ્યવસ્થા કરાઈ છે.
ઝડપી મંજૂરી: એસ.ડી.એમ. (દાંતા પ્રાંત) કચેરી દ્વારા અરજીઓની ચકાસણી કરીને ઝડપથી મંજૂરી આપવામાં આવશે, જેથી સેવાભાવી આયોજકોને વહીવટી સહયોગ અને યોગ્ય માર્ગદર્શન મળી રહે.
સ્વચ્છતા જાળવવી અનિવાર્ય: ડસ્ટબિન રાખવું પડશે ફરજિયાત
સેવા અને ભક્તિની સાથે પવિત્ર ધામમાં સ્વચ્છતા જાળવવી એટલી જ જરૂરી છે. મંજૂરી મેળવનાર તમામ સેવા કેમ્પોએ પોતાના વાહનની સાથે ફરજિયાત ડસ્ટબિન (કચરાપેટી) રાખવાનું રહેશે.
સેવા કાર્ય પૂર્ણ થયા બાદ સમગ્ર પરિસરની સફાઈ રાખવાની પ્રાથમિક જવાબદારી આયોજકોની રહેશે, જેથી યાત્રાળુઓને સ્વચ્છ વાતાવરણ મળી રહે.
વહીવટી તંત્રની નમ્ર અપીલ
મંદિર ટ્રસ્ટના વહીવટદાર અને અધિક કલેક્ટર કૌશિક એસ. મોદી દ્વારા તમામ સેવાભાવી સંસ્થાઓ અને માઈભક્તોને સમયસર ઓનલાઈન નોંધણી કરાવી આ સુગમ વ્યવસ્થાનો લાભ લેવા તથા વહીવટી તંત્રને પૂર્ણ સહકાર આપવા માટે નમ્ર વિનંતી કરવામાં આવી છે.
મોબાઈલ સેવા કેમ્પ માટે નિર્ધારિત કરાયેલા નિયત સ્થળો
પદયાત્રાના મુખ્ય માર્ગો પર સંતુલિત રીતે પ્રસાદ અને જળસેવા મળી રહે તે માટે તંત્ર દ્વારા ચોક્કસ પોઇન્ટ્સ નક્કી કરવામાં આવ્યા છે:
અંબાજી – હડાદ માર્ગ: કામાક્ષી મંદિર, મચકોડા બસ સ્ટોપ નજીક તથા મંગલમ પેટ્રોલ પંપ નજીક (હડાદ રોડ).
અંબાજી – દાંતા માર્ગ: શ્રી શક્તિ સેવાકેન્દ્ર સ્કૂલ સામે, ધાબાવાળી વાવ તથા ત્રિશૂલિયા ઘાટ.
દાંતા – પાલનપુર માર્ગ: રતનપુર ચોકડી તથા મોટાસડા.
રતનપુર ચોકડી – આંબાઘાટ માર્ગ: કુંડેલ તથા આંબાઘાટ.