કેવડિયામાં આયોજિત 72માં રાષ્ટ્રીય ફિલ્મ પુરસ્કાર સમારોહમાં દેશભરમાંથી ઉપસ્થિત પુરસ્કાર વિજેતાઓ, ફિલ્મ જગતના પ્રતિષ્ઠિત મહેમાનો તથા અન્ય વિશિષ્ટ આમંત્રિતોની સુવિધા માટે પશ્ચિમ રેલવેના વડોદરા મંડળ દ્વારા એકતાનગર સ્ટેશનથી વડોદરા માટે હેરિટેજ સ્પેશિયલ ટ્રેનનું વિશેષ સંચાલન કરવામાં આવ્યું હતું.
આ વિશેષ ટ્રેનનું પ્રસ્થાન એકતાનગર સ્ટેશનથી રાત્રે 9:00 વાગ્યે કરવામાં આવ્યું હતું. રાષ્ટ્રીય ફિલ્મ પુરસ્કાર સમારોહના અવસરે આયોજિત આ વિશેષ રેલયાત્રાનો હેતુ મહેમાનોને સુવિધાજનક મુસાફરી પૂરી પાડવાની સાથે-સાથે ભારતીય રેલવેની સમૃદ્ધ અને ગૌરવશાળી રેલ વિરાસતથી પરિચિત કરાવવાનો હતો.
રેલ્વેના સુવર્ણ યુગની અનુભૂતિ કરાવવાનો પ્રયાસ
હેરિટેજ સ્પેશિયલ ટ્રેન ભારતીય રેલવેની વિરાસત, આધુનિક ટેકનોલોજી અને પ્રવાસનના સમન્વયનું અનોખું ઉદાહરણ છે. ટ્રેનની વિશેષ સંરચના અને સંચાલન દ્વારા મુસાફરોને ભાપ એન્જિનના સુવર્ણ યુગની અનુભૂતિ કરાવવાનો પ્રયાસ કરવામાં આવ્યો છે. આધુનિક ઇલેક્ટ્રિક પ્રણાલીથી સંચાલિત હોવા છતાં ટ્રેનમાં ભાપ અને ધુમાડાની વિશેષ અસર તેમજ હોર્નની વ્યવસ્થા કરવામાં આવી છે, જે જૂના સમયના ભાપ એન્જિનની યાદોને જીવંત કરે છે.
મુસાફરોને આરામદાયક મુસાફરીનો અનુભવ
મુસાફરોની સુવિધાને ધ્યાનમાં રાખીને ટ્રેનના કોચમાં આધુનિક સુવિધાઓ ઉપલબ્ધ કરાવવામાં આવી છે. ટ્રેનમાં છ કોચ, પેન્ટ્રીની સુવિધા તથા આકર્ષક સેલ્ફી પોઇન્ટની વ્યવસ્થા કરવામાં આવી છે. વિશેષ રીતે તૈયાર કરવામાં આવેલા કોચ મુસાફરોને આરામદાયક અને સુવિધાજનક મુસાફરીનો અનુભવ પ્રદાન કરે છે.
સ્ટીમ હેરિટેજ ટ્રેનનો સમય પત્રક
ટ્રેન નંબર 09409 અમદાવાદ–એકતાનગર સ્ટીમ હેરિટેજ સ્પેશિયલ ટ્રેન દર શનિવાર અને રવિવારે સવારે 06:10 વાગ્યે અમદાવાદથી પ્રસ્થાન કરીને 09:50 વાગ્યે એકતાનગર પહોંચે છે. એ જ રીતે ટ્રેન નંબર 09410 એકતાનગર–અમદાવાદ સ્ટીમ હેરિટેજ સ્પેશિયલ ટ્રેન દર શનિવાર અને રવિવારે 20:35 વાગ્યે એકતાનગરથી પ્રસ્થાન કરીને બીજા દિવસે 00:05 વાગ્યે અમદાવાદ પહોંચે છે.
પ્રવાસનને પ્રોત્સાહન આપવાની દિશામાં અનોખી પહેલ
માર્ગમાં બંને દિશામાં આ ટ્રેન વડોદરા સ્ટેશન પર રોકાય છે. આ ટ્રેનમાં ચાર એસી વિસ્ટાડોમ પ્રકારના કોચ છે, જેમાં ત્રણ વાતાનુકૂલિત એક્ઝિક્યુટિવ ચેર કાર કોચ અને એક રેસ્ટોરન્ટ ડાઇનિંગ કારનો સમાવેશ થાય છે. ઉલ્લેખનીય છે કે, પ્રધાનમંત્રી નરેન્દ્ર મોદી દ્વારા વર્ષ 2023માં એકતાનગરથી સ્ટીમ હેરિટેજ સ્પેશિયલ ટ્રેનની શરૂઆત કરવામાં આવી હતી. આ ટ્રેન ભારતીય રેલવેની સમૃદ્ધ વિરાસતને પ્રદર્શિત કરવા તેમજ પ્રવાસનને પ્રોત્સાહન આપવાની દિશામાં એક મહત્વપૂર્ણ પહેલ છે.
ઐતિહાસિક અને સાંસ્કૃતિક વિરાસતનો અનુભવ
રાષ્ટ્રીય ફિલ્મ પુરસ્કાર સમારોહના અવસરે આ હેરિટેજ સ્પેશિયલ ટ્રેનનું સંચાલન ભારતીય સિનેમા અને ભારતીય રેલવેની ગૌરવશાળી વિરાસત વચ્ચે વિશેષ સમન્વયનું અવસર બન્યું. સમારોહમાં ઉપસ્થિત મહેમાનોને આ વિશેષ યાત્રા દ્વારા આરામદાયક રેલ મુસાફરીની સાથે-સાથે ભારતીય રેલવેની ઐતિહાસિક અને સાંસ્કૃતિક વિરાસતનો અનુભવ પણ પ્રાપ્ત થયો.