Morbi Ganesh Visarjan Accident: મોરબી નજીક સાદુળકા ગામ પાસે મચ્છુ નદીમાં ગણેશ વિસર્જન દરમિયાન ગંભીર દુર્ઘટના ઘટી છે. તંત્ર દ્વારા કુદરતી જળાશયોમાં વિસર્જન પર કડક પ્રતિબંધ હોવા છતાં નદી પર પહોંચેલા 4 યુવકો ઊંડા પાણીમાં ડૂબ્યા હતા. ઘટનામાં ફાયર બ્રિગેડે 2 યુવકોને સહીસલામત બચાવી લીધા છે, જ્યારે એક યુવકનો મૃતદેહ મળી આવ્યો છે. અન્ય એક યુવકની શોધખોળ ચાલી રહી છે.
સાદુળકા પાસે મચ્છુ નદીમાં વિસર્જન સમયે હોનારત
મોરબી નજીકના પીપળી ગામથી યુવકોનું એક ગ્રુપ સાદુળકા ગામ પાસે આવેલી મચ્છુ નદીમાં ગણેશજીની મૂર્તિનું વિસર્જન કરવા માટે પહોંચ્યું હતું. ગઈકાલે રાત્રે વિસર્જન દરમિયાન અચાનક ચાર યુવાન નદીના ઊંડા પાણીના પ્રવાહમાં ડૂબવા લાગ્યા હતા. ચાર યુવાન પાણીમાં ડૂબવા લાગતા જ સ્થળ પર હાજર લોકોમાં ભારે અફરાતફરી અને ભયનો માહોલ સર્જાયો હતો.
2 યુવાનોનું સફળ રેસ્ક્યૂ: એક મૃતદેહ મળ્યો, 1 લાપતા
મચ્છુ નદીમાં 4 યુવકો ડૂબવાની ઘટના બનતા જ ફાયર વિભાગની ટીમ ઘટનાસ્થળે દોડી ગઈ હતી. પાણીમાં ફસાયેલા ચાર યુવાનો પૈકી: ફાયર બ્રિગેડની ટીમે તાત્કાલિક હેમખેમ કાર્યવાહી કરીને આકાશ માલિયા અને આકાશ ગજાનંદભાઈ નામના બે યુવાનોને સફળતાપૂર્વક બહાર કાઢી સહીસલામત બચાવી લીધા હતા.
પાણીના ઊંડા વહેણમાં ગરકાવ થઈ ગયેલા યુવકો પૈકી મોડી રાત્રે એક યુવાનનો મૃતદેહ મળી આવ્યો હતો. મોરબી તાલુકા પોલીસ સ્ટેશનની અધિકૃત માહિતી મુજબ મૃતક યુવકની ઓળખ 34 વર્ષીય વિલાસ સુભાષભાઈ ગાયકવાડ (રહે. નવી પીપળી) તરીકે થઈ છે. પોલીસે મૃતદેહને પોસ્ટમોર્ટમ અર્થે ખસેડીને આગળની તપાસ હાથ ધરી છે.
મોરબી ફાયર ઓફિસર દેવેન્દ્રસિંહ જાડેજાએ આપેલી માહિતી અનુસાર, ગઈકાલે સાંજે આશરે 7:30 વાગ્યાની આસપાસ મોરબી ફાયર કંટ્રોલરૂમને કોલ મળ્યો હતો કે જુના સાદુળકા પાસે મચ્છુ નદીમાં ગણપતિ વિસર્જન દરમિયાન 4 લોકો ફસાયા છે. પાણીમાં ગરકાવ થયેલા એક યુવાન સોહન કુલડીયાને શોધવા માટે ફાયર વિભાગ દ્વારા મચ્છુ નદીમાં હજુ પણ તીવ્ર સર્ચ ઓપરેશન અને બચાવ કામગીરી ચાલુ રાખવામાં આવી છે.
કડક પ્રતિબંધ છતાં નિયમોના ઉલ્લંઘનથી ઘટી દુર્ઘટના
મોરબીમાં અકસ્માત અને દુર્ઘટનાઓ રોકવા માટે તંત્ર દ્વારા નદીઓ કે કુદરતી જળાશયોમાં મૂર્તિ વિસર્જન કરવા પર કડક પ્રતિબંધ લાદવામાં આવ્યો હતો. ચીફ ઓફિસર દેવેન્દ્રસિંહ જાડેજાના જણાવ્યા અનુસાર સુરક્ષિત વિસર્જન માટે શહેરમાં ચાર અલગ-અલગ સ્થળે ગણેશ મૂર્તિ એકત્ર કરવાની વિશેષ વ્યવસ્થા કરવામાં આવી હતી. એકત્ર કરેલી મૂર્તિઓને લીલાપર ઘુનડા રોડ પર આવેલી પાણી ભરેલી પથ્થરની ખાણોમાં વિસર્જન કરવાનો સ્પષ્ટ નિયમ હતો.
આમ છતાં, તંત્રના સ્પષ્ટ નિયમો અને પ્રતિબંધનું ઉલ્લંઘન કરીને કેટલાક લોકો સાદુળકા પાસે મચ્છુ નદીમાં ગણેશ વિસર્જન કરવા પહોંચી જતાં આ દુર્ઘટના ઘટી હતી. હાલમાં બચાવી લેવાયેલા તથા ડૂબેલા યુવકો અંગે પોલીસ અને ફાયર વિભાગ દ્વારા ઘટનાસ્થળે હાજર રહીને જરૂરી કાયદાકીય અને તપાસની આગળની તમામ કાર્યવાહી હાથ ધરવામાં આવી રહી છે.